Phaisa duhzat poah rial i duhzat paoh zamh ahcun thil man cu van a tawn ko lai.

Zeidah a cang lai… a peh II January 31, 2021 ah sui man hi zuar ah 1,322,000 a rak si. Cawk ah 1,318,000 a rak si, dollar hi 1331 a rak si. Diesel hi 1 liter ah 660 a si. Octane 92 hi 625 le 95 hi 750 a rak si. Nihin ah sui man hi sing 28 tiang a phan, a hring hi 3030 a phan. Datsi 92 hi 2320 le 95 hi 2390 le diesel hi 2730 a phan.

Yangon Stock Exchange (YSX) ah Thilawa MTSH stock hi MMK 3,900 a rak si i nihin ah one share ah 2,450 a si i 35% a tum. FMI hi MMK 9,700 a rak si i nihin ah 7000 a si. First Private bank hi one share ah 22,000 a rak si i nihin ah 18,000 a si. YSX stock zong buaktlak in 30-35% hrawng an tum dih.Facang tun khat ah 30,000 hrawng a rak si i nihin ah 100,000 (sing khat) deng a si cang. Ramdang phaisa – Foreign reserve fund a rak ngeihmi hi USD 5 billion hrawng a rak si i nihin ah billion cheu hmanh a ngei ngai hnga maw?

Phaisa duhzat poah rial i duhzat paoh zamh ahcun thil man cu van a tawn ko lai. Cu lawng hlah, dollar a control ciammam i dollar account a ngei mi vialte Kyat ah thlen dih uh baho bank khiahmi rate in a ti ai. Us phaisa a hringmi a khomh dih i thil rawh a vun i tinh ah a lung a fim than man hi Naite Aug 7 ni ah ramleng in export a tuah taktakmi export proceed pawl caah cun nan dollar account i 65% lawng cozah rate in thlen uh, a tangmi 35% cu Baho ban hnatlaknak in nan duhnak ah nan hman khawh a ti than. Ramdang kampani pawl nih raw materials le an herhmi cahnak ah dollar kuat duh ah the Foreign Exchange Supervisory Committee (FESC) timi committee ah sawk a hau. A thla thla in a rau, cucaah Suzuki cu minung riantuan 400 leng nih nifa tuan ding an ngei lo.

Mawtaw an chuah kho ti lo an ngol. Yangon Can Manufacturing kampani hi Kawl, Thai le Japan JV a si an rian an kal tak, an chuak ve zungzal byebye an ti. Pakhat hnu pakhat an chuak. Kampani vialte le pumpak hmuhmi dollar vialte ralkap nih baho bank hman in a duhmi rate a khiahmi in a cawk dih (kyat ah thlen lo ngah lo) policy a chuah, zuar a siang bak ti lo.

Kampani pawl le importer pawl nih cawk an duh ah le an duh zat a zuarh fawn hna lo. Zei tindah kampani pawl rian an tuan lai? Thil thitnak sezung (garment sehzung) pawl pakhat hnu pakhat an pur, thlakhat chung ah riantuan milu sing 2 rian an phuah hna. Industrial zone tampi ah Id 5 le 4 a thawk pawl rian an phuah thluahmah hna. Ramchung um kan miphun caah hmailei caah rian sawknak ah siseh, ramchung ramleng khual tlawn umkalnak ah le hmatpuntin, passport te hna sawknak, umkalnak hotel thumhnak tbt tehna ah hmailei ah a lam a bi chinchin, kan mipun caah tih a nung.

Ramdang phaisa hi rate pakhat a duh paoh in a khiah i “fixed rate” in cu rate cun a cawk hna. A poinak cu kampani importer pawl nih an duh zat a zuar kho fawn lo caah riantuan awk a tha bak lo. A zuar khawh fawn tun lo ahcun ziah “floating rate” ah a chiah kun lo. Market nih a kalpi mi rate in ziah a chiah kun lo? Cu ti a tuah ahcun dollar zong a duhmi nih duhmi rate in an i caw an i zuar lai. Market nih a kalpi mi rate in a hnu ahcun a kal lai. Sipuazi a tuahmi ca zong ah a tha i hmailei caah dollar a man a tum a kai tampi purhdah a ruahdamh khawh lai, rian hma a kal lai. Open market economy pawlisi a hman a hau, ziah a tuah lo?

Atu a kal ning ahcun kampani pawl nih ramleng in an sehzung caah thil a hrang (raw materials) an cah kho ti lo, riantuan ding an ngei lo, kampani pawl an income a tla, pakhat hnu pakhat an ngol lo ah an fa chinchin, rian a har chinchin ti bantuk in “domino effect” an ti mi thil pakhat a ziaza thlen ruang ah thil dang vialte a tluk pi dih hna. Thil pakhat ruang ah thil dang vialte har a thawk, minung har nak a pek, kampani pawl rian an i dinh ahcun thil pawl cawk awk a har chinchin. Cawk awk a har ahcun a man a kai ding cu a phun a si ko. Cucu heh tiah cozah nih aman control tuah phung zong a si lo. Phaisa a man a tumnak le thil man a kainak zong cu amah phaisa policy thiamthiam in control khawh a si ko.

Inflation hi zeitin dah a control khawh lai ti hi a lam tampi a um ko, Inflation a kai tuk ahcun ramdang ahcun countermeasures a tuah tawn. (Tachunhnak hmanthlak thilmi).

Inflation a mersan khawh ding ah a lam an um ko nain a tha bik mi cu Kawlram caah cun a tuan lio mi minung pawl thlen hi a tha bik a si lai dah…… Atu hnupi ah free market economy policy in kal hman sehlaw sipuazi thlakchuknak in a khamh kho ti lai lo dah…Crd-Sui Hingz

Be the first to comment

Leave a Reply

Your email address will not be published.


*