Pathian khuakhan a mak ning

Laiforum le Rungcin chanah ‘’Norway Laimi Genesis‘’ timi zarhkhat voikhat in ka rak ṭial tawn. Cu chungah ‘’kanmah te hna Norway ram kan hong phak hi Pathian khuakhan a si zia kan fale chanah a fiang te lai’’ tiah, ka rak ṭial. Cu ‘’Norway Laimi Genesis’’cu cauk in ka hon chuah i, ‘’Biahmaiṭhi’’ah ka ṭial ṭhan.

Atu Norway ah kum 19 kan um cang hna i, kanmah te hna Norway ram kan hong phak hi Pathian khuakhan a si zia pakhat hnu pakhat in a hon fiang thluahmah. Corona le covid zawtnak nih Kawlram a den ve hnu le PDF/CDF/CDM a phunphun an hon chuah hnu chinchin cu Pathian khuakhan a si zia a hon fiang chinchin ve. Zaw Me Lung dah lo, aho fapa hmanh nih an el ngam lai lo dah.

Norway ramah Laimi a tam bik minung 2000 hrawng kan um lai dah. Cu hmanh cu kan va tling maw tling lo maw kan si rih lai. Kum 19 kan um cang i, a milurel in tuak tikah B.A a awngmi le ‘’Master’’ a awngmi kan fale an tlawmte ti lo. Biaknak(Theology) lei hmanh ‘’Master’’an um len cang i, siibawi koko hmanh panga paruk hrawng an um cang. Norway University pi nih ‘’degree’’ an peek hnaning belte ka lung a tling lo tuk ve. An ‘’degree’’ hna hi carek(Post) hna in an hei kuat salam ko hna. Lailei tanghra awn tluk hmanh a si tawn lo(Katu pa US ah Ph.D degree a laak lio kan va kal i, US University nih degree an peek hna ning he cun van le vawlei in aa dang).

Cu chungah Master degree bak pahnih in a kemhmi minung pahnih an um ve. Thangpi(Ngun Lian Thang Cunkap) nih ‘’Business & Administration’’ in Master a hmuh i, tukum ah ‘’Auditing’’ in Master a hmuh ṭhan. Cun, Pu Peter Sang Lian Thang nih ‘’Public Administration’’ in Master a hmuh i, naite taktak kha ‘’Energy, Environment & Society’’ in Master a hmuh ṭhan ve.

Norway ramah rian hmuh a har tuk. Rian hmuh khawhnak ding caah certificate pakhat te hmuh zong a har. Thil dang cu chim lo, mawṭaw mongh khawhnak Theory awn hmanh a har tuk. Culio i Master degree bak pahnih kemh khawh cu thlachiat hna hei ruat lem lo ahcun ‘’Laimi kan men loh’’ ti khawh hmanh a si hnga.

Norway ramah kan fale nih catang sang an awn tikah keimah pumpak in a awngmi bantuk in ka lung aa lawm ve tawn. Khuazeimaw, an degree an ka peek bang lai hei ti bang! Asiloah, an thlakhat lahkhah an ka peek te lai hei ti bang! Norway kan rak phak kaa i kan saduhthah le kan chunmang a tling cang ti phun in ka um rua.

Norway ramah catang sang a phanmi kan fale vialte Bawipa nih miphun le Khrihfabu caah thluachuah pe ko hna seh!BY-Perhkalh

Be the first to comment

Leave a Reply

Your email address will not be published.


*