Pastor le Evangelist pawl, atu lio ah cun kan i dannak nakin kan i khahnak tu kan kawlpi deuh u

Nihin kan boruak le khuacaan cu a si khawh chung in i funtom le tanti kan herhtuk lio caan a si.

Kan ram le miphun dihlak kan raal MAH lei a tang lo mi poh: Zei biaknak le bu zong, holh phun aa khat lo mi le aa thei bal lo mi zong kan i funtom le kan tanti cuahmah lio caan a si.

Hi lio ah ngaihchia ngai a si mi pakhat cu:Chinmi pastor le Evangelist cheukhat le Online Media cheu khat nih hi hnu zong ah va ceih le vaa al awk a tha ko mi: Khrihfabu kan zumhnak kan i khahlonak “Trinity e, Sunday e, Sabath e, Khamh tlau e, Tlau lo e…” ti pawl an kan buaipi mi hi a poi ngai.

Hi hi a liam cia mi kum 500-1000  hrawng ah khan minthang Theologian pawl zong nih a phi an chuah khawh lo mi le anmah bia in an donghter khawh lo mi a si. Vawlei cung hmun dang ah cun i al awk le thiam i cuh awk ah an ruah ti lo mi “bia thi” bantuk a si.

Anmah zong nih a phi an chuah kho lo. Ka tei rua an ti le a hnu ah a dang nih an tei than. Aa al mi ca ah: I huatnak le le zuri buai mi sawh men bantuk an lo. Cun a zohtu ca zong ah cu thiam. “Aho dah aa tei lai i aho dah a sung lai” ti vial lawng a si. A lang mi an chuahpi khawh mi ah cun Khrihfabu kip aa rem cia mi huatnak chuahter deuh hi a si.

Atu lio cu rampi do kan thlen lio a si. Hi tluk in kan ram dothlennak rian ca ah i funtom le tanti kan herh lio ah hin cun Pastor le Evangelist pawl zong nih “Khrih ah pumkhat kan sinak, Pathian nih miphun khat le ram khat ah a kan chiahnak le a kan dawtnak kong tu hi hong kan aupiak deuh ulaw a tha deuh lai tiah ka ruah.

Ramkheel (politics) kong au nan i thlachiat a si zong le thiam i cuhnak le thencheunak a chuahter mi “kan i khahlonak” kong tu hi cu kan aupiak hlah ulaw a tha tiah ka ruah.

Baibal chung ah Profet te hna bang in Peng le Tlang lungrualnak, ramchung ramleng tanti a herhnak, Israel miphun Pathian nih a dawt hna bantuk in Pathian nih a kan dawtnak le amah thawng in kan tei lainak, raalzaam pawl le rammi thazaang peknak bia tu hna hong kan aupiak deuh ulaw a tha lo maw?

Atu i nan aupi mi le nan kan buaipi mi hi cu, “Mithi inn i Bawi Zisuh chuahnak hla sakpi le ruak inn hmai i dawr a rak i hong mi he hna aa lopah cang eh! A caan le a boruak kan zohpiak deuh tuah ulaw a tha maw?

Miphun le ram ca ah tiin nunnak thaap in heh tiah kan hawile ral an doh lio ah hin cun anmah he aa pehtlai mi boruak tu kan aupi ulaw kan buaipi deuh u.  Mah kha nan bia-alnak kha cu ram that hnu ah nan i al te lai. I chiah rih ko u. Kan hlan ah kum thong khat chung an i al mi biatung dawh a si ko khah.

Online media pawl zong boruak hai le dawi kan thiampiak tuah u. Mithi inn le Christmas ni hla thim thiam lo nan lo. Editor le Journalist rian zong tuaktanpah tuah ngat u. Media ka tuan ko lai a ti mi nih cu Editor le Journalist rian tal cu cawn ah kan tha tiah ka ruah. Zeica tiah a thiah le a fang khei le vamh lo, a zei zei lo a ningpi in zapi sin ah a van chuahpi mi nan tamtuk. Mah hna pawl nih kan zaatlaang thawngzamh nan hnawmhter ngai tiah ka ruah.

“A hrut nih a fim chim” tiah kan Pastor le Evangelist pawl, “Chinmi kan zaatlaang thawngzamh (social media) hi rawlbel tlawh in tlawh le phulnak si lo in chungkhar zapi rawl thawte chumhnak tappi” i ser khawhnak ca tu kan zuampiak u.

Cun ka van chap rih ko lai: “Baibal ca hi kan i khahlonak zawn i thim in kan cawnpiak hlah ulaw, kan i khahnak zawn tu thim in kan cawnpiak deuh u.” Cucu kan i thathnempi deuh lai tiah ka zumh.

Nihin kan ram dothlennak nih tanrual le i funtom kan herhtuk lio a si hih!Crd-Pa Pui

Be the first to comment

Leave a Reply

Your email address will not be published.


*