Parborhsung a man zeizah a si ding cu aho kan nawl hmanh a si lo i a ngeitu nawl a si.

Mithil le Mahthil (Part II) LV te pawl, Gucci le Dior te pawl hmanh pei copy cio si ko cu.

No! Asilo! LV tepawl, Gucci tepawl hi copy a ngah caah an i copy mi a si lo. Copy a ngahlo buin abikin Tiluk nih a thli tein a copy mi khi a si deuh. Gucci te pawl, Dior te pawl nihhin Tiluk online market platform a simi Alibaba hna khi voitam nawn taza a cuai cangmi a si. Cuti taza cuaimi thil cu athli tein an kan zuarh i kan i cawk khawh cionak khi a si. Hi bantuk atuh pawl kan zuar lenmi hna hi a lang in an kan theihkhawh nakding a har ngai caah tazacuai in kan luatnak a si.

Laimi kan market size (chawlehnak hmun) hi a fat tuk lengah social media chan kan vun phanh tikah aho nih zei a tuah timi hi hlat ahcun hlat khawh ningin a diktlir in theih khawh dih a si. Cucaah Luxury thil chuahmi pawl nih Tiluk taza a cuai bantukin Aidii nih a thil copy mi a duh lonak kong a langhter mi hi a si. Cucah copy cu khoika hmanhah cohlanmi thil a si lo ti kan theih ah a tha.

Parborhsung cu a man a fak tuk i, i hruk cu kan duh cio, thil zong cu an tah i pei an kan zuarh caah pei kan lak ko cu, a thiamtak pawl zong thlahlawh a pek khawh hna lo caah pei kan lakmi a si ko cu timi kongah;

Parborhsung a man zeizah a si ding cu aho kan nawl hmanh a si lo i a ngeitu nawl a si. Thil man fak kan duh ahcun mah tein cu thilman fak cawk khawhnak i zuam ding a si. Cawk khawh lo ahcun kan cawkkhawh lo ning in mah le banh khawhtawk te i cawk le i thumb cio ding a si hnga.

Cun, a thlahlawh pek khawh le pek khawh lo hi kanmah nih kan i ceih ding le kan va i thlak ding thil a si lo. A taktu nih rak zuarh hmanh ah a taktu nih Aidii cungah nawl a buar a si caah va i tel chinchin lo ding khi a si. Kan rian lo le kan zawn lo ah kan va i tel tiah ka hmuh. Cucaah hihi bia pawl hi cu tangka ruahchannak le mah i vennak ah reason kawlnak bia a si ka ti.

Business hi pum pawcawnnak caah aho paoh tuah cio kan si. Cuti ka tuah tikah mi hnursuang lo tein a diknak lei cu kan theih khawh tawk tuahkhawh i zuam cio kan hau. Kan theih lo ahcun theih khawh le hngalh khawh kan i zuam a hau. Ahlan ah kan theih lo caah kan tuahmi a um hmanhah atu kan theih cang ahcun ngol ding a si.

Mah le pawcawmnak cio kan ti bu ah mithil copy lawng in pawcawm khawh dingah i ruah ding kan si lo. Parborhsung rak um hlah hmanh sehlaw pawcawm lo in kan um hlei lai lo cu mu! Cucaah vawlei pi chim lo kan Laithil hmanh ahhin tuah cun tuah khawh chungin a chuak khomi thilthar he thilhlun he rili tibang a tam in a liam liangluang ko. A um ciami hmanh kan zuar duh ahcun a tam liangluang ko. Cucaah kan thil, mi thil timi le a si awk si maw ka nawl a si maw, nawl kan ngei maw timi biahalnak i tuah buin riantuan cio hna usih law ti sawm kan duh ko hna.

Atu lio alinsa ngaimi Aidii Parborhsung Thawi kong he pehtlai in siseh, keimah nih hawi thil zohchun in ka chuah chunmi “Tialku Thuam” kong he pehtlai in siseh ka um khawh lo ngai caah ca saupi tial in ka ruahnak kan hrawmh ve hna.Aven(Sungkhunnu)

Be the first to comment

Leave a Reply

Your email address will not be published.


*