NIHIN KAN DOTHLENNAK KONG AH RUAH A HERH NGAI CANG MI PAWL:
Kan dothlennak hi a har lawng si lo in a caan zong a sau bantuk in kan rak i ruah cia mi harnak lawng si lo in kan rak i ruah lo mi harnak zong kan tong cuahmah i hi pin zong ah tampi kan ton rih lai.
Cucaah nihin ah mi tampi kan lung a dongpah cang. Pakhat le khat kan i mawhchiat. Cucaah a hnu ah cun Min Aung Hlaing nih doh hau lo in kanmah tein “Caangvat tilh in” tilh kan fawi.
Cucaah hi dothlennak lamthluan ah hin ruah awk le fian awk le tuah awk le thlen awk hna kan ruah le kan tuah an herh ngaingai mi thil an hung lang cang.
A tanglei hna hi kan dothlennak (CDF rian) dirhmun kong ah keimah nih dothlennak kan thawknak in nihin tiang a chung in siseh a leng in siseh ka hmuhton mi chung in zapi nih ruah awk ah ka van chuahpi:
Ral kan doh lio a si i raal nganpi kan ngeih lio a si ca ah kanmah le kanmah i do hlah usih. Kan dothlennak hi kan ruah leng in a rau kho i a har kho hih!
Kum hnih kan kal cang i kan ba ngai cang nain cho canceo hmanh kan kai rih lo tiin ruat hna sihlaw daithlang hlah usih.
Kum hnih chung ah Min Aung Hlaing raljap maw a zor deuh hnga CDF ralkap dah a zor deuh hnga? Min Aung Hlaing a tluk nakding ca ah a ca ah thinphang a si bantuk in CDF a tluk nakding ca ah thinphang dirhmun ah kan phan ve cang ti hi thei usih!
Ralzaam nulepa kir duhnak maw a fak deuh hnga mino nih CDF ralkap tuan duh ti lo dah a fak deuh hnga?
Ramleng um dothlennak thawhvo tuk maw a har deuh hnga ramchung CDF ralkap khawmhsuat rian dah a har deuh hnga?
Ramchung mino CDF le F lo karlak dirhmun hi hruaitu le nulepa nih thlopbul lo ahcun “Kuang ti zut” bantuk si khawh a si.
Nihin kan dothlennak rian nakin a herh deuh mi rian dang a um awk a si ti lo. Hi lio ah khua thanchonak rian ngan (big projects) ramleng lei nih kan i hmaithlak awk a si rih lo.
“Min Aung Hlaing Ralkap an batuk cang, an dertuk cang!” kan ti mi nakhmanh in kanmah CDF le rammi kan ba in kan der deuh cang sual maw?
Dothlennak ah hriamnam maw kan chambau deuh miphun dawtnak lungput dah?
Dothlennak ah ramchung lei kan santlaih lo maw ing a puang deuh ramleng lei kan baat ruang i biaholh dah?
Kawlrawn lei in MAH ralkap kham khawh lo in a hong kai cuahmah mi zoh maw tha a chia deuh, khuachung mino pawl “sia hnaar vuak” bang raldoh a tih mi le auh khawh an si ti lo mi zoh dah tha a chiia deuh hnga?
Nunnak a thaap mi le a pe cuahmah mi miphun Ralkap an ralthatnak maw a sang deuh hnga, hi lio ah “Vokte kawm tel” in leiba tampi he ramdang kal aa tim mi mino hna tinh mi dah sang deuh hnga?
Min Aung Hlaing nih a uknak a kalpi ning (strategy/policy) a thlen a biapit tluk in nihin CDF kan kalpi ning (Ralkap kong) kan thlen a herh ve.
Min Aung Hlaing ralkap nih fahnak a kan pek mi maw a tuar a har deuh hnga, kanmah chung in a chuak mi hnahnawh buaibainak dah kan ca ah tih a nung deuh hnga?
Min Aung Hlaing nih hong kan tei sual sehlaw a kan teinak ding hi a meithal le bomb in si lo in cu hlan kum 60 leng tiang uknak ah an rak hman peng mi “kanmah le kanmah sehter i thencheuter i uk) ti mi a hriamnam hlun a si lai kha kan philh lo a herh cang.
Nihin ralram ah a dir lio mi kan CDF ralkap khi anmah lawng nih hi dothlennak a dongh tiang an hmun kho lai lo ti cu 100% in a fian bantuk in khuachung um mino vialte CDF rian ah luhter than dih an herhtuk cang ti zong 100% in a fiang mi hmanthlak a si.
Kum hnih chung ah CDF ralkap “vom sa chumh zor in” kan zornak ah CDF hruaitu upa lawng si lo in nulepa le ramleng unau tiang kan i tel dih ti hi kan fian ah a tha.
Dothlennak ca ah ramchung ramleng in a pethotu vialte nih kan pekthawh mi hi ramchung pumpak le a bu ca ah pek si lo in kan ram ca ah kan pek mi a si ca ah i hngalsak in holhchuahnak ah hman sual lo le ram dawtnak thinlung taktak a si a biapituk.
Nihin Raalhraang uknak doh hi ramchungmi rian lawng a si lo ca ah ramleng mi he a dongh tiang kut tlai in kan tuanti khawh nakding ah CDF le Dothlennak hruaitu upa hna nih kalpi thiam a biapituk.
Nihin kan dothlennak rian tawlrel le thithruai hi ceertual tlaang in bawlung chuih zoh bantuk a si lo i nunnak thaap le thisen he raal doh a si zia kha zapi nih theihfian lo ahcun dothlennak lamtluan ah kanmah le kanmah i chuihpah lengmang a fawituk ti hi philh lo ding a si.
CDF hruaitu le CDF Ralkap hna nih rili raal in nihin kan dothlennak raal a kan dohpitu kan unau hna thazaang lawng si lo in an thinlung le ruahnak zong kan cohlan thiam a herh ti philh lo a biapituk.
Nihin kan dothlennak rian hi Min Aung Hlaing tei vial lawng ah ruat lo in kan unau Mizo le miphun dang nih an miphun an dawt le an dirkamh bantuk in miphun dawt le sersiamnak caan tha a si tiin ruah a biapituk.
Nihin CDF Ralkap hi thaizing ah aa din kho le aa ngol kho dih mi an si ca ah thaizing ah raal doh ah aa thawh ding ka rian a si ve ti philh hlah usih.
Kan duh mi teinak hmuh taktak nakding ah nangmah le keimah nunnak zeimaw zat pek a herh rih ko ti hi philh hlah usih.
Chinmi cu kan lung a tawituk ca ah Dothlennak aa lim tiang Chinmi nih kan zuamnak le kan thazaang nih a tlinh te hnga maw ti hi ralrin ngaingai a hau.
Dothlennak hi a caan a sautuk cang, kan batuk cang, a dih mi zong a tamtuk cang tiin ngol taak men awk a tha mi thil a si lo ca ah aa lim tiang in cu hlan nakin kan i hneek a hau ti hi zapi nih kan fian a herh.
Dothlennak ah kan raal hriamnaam tluk in tih a nung mi zumhtlaklonak le ziknawh eihmuarnak nih a kan luhhnawh pah ziahmah cang sual maw ti hi kan raal i ven tluk in i ven kan hau.
“Raal lak ah or zaal” ti bantuk in MAH sin ah tangka, rian, min thatnak tibantuk hmuh duh ah cozah riantuan, pastorte, khua upa le mirum pawl nih caan tha kawl le laak a fawituk ti kha philh hlah usih.
Ralkap party USDP a rak si mi cheukhat nih Ralkap uknak kan duh ti lo tiin muihmai i thlen le biachim a fawi tluk in a thli tein a hrik a thi lo mi le “Vomkhuai thi kaw ngalhriang a hnaak a faak” tiin lungthli tein Party feeling a ngei mi um khawh a si ti ralrin a herh.
Nihin kan dothlennak hi “ramchung ral” (civil war) a si bantuk in kanm ramchung le Tlangmi kan biapitbik ti hi kan fian a hau.
Dothlennak ah khuami le Tlangmi nih kan CDF hi lohma bantuk in kan i hmaithlak i a herh mi riahcaw, mehhaang le an Camp hngahpi ti pawl kan rian cio a si ti hi chimh hau lo in i fian kan hau.
Patung no pawl vialte zong nih kan tlangval pawl an ba ve cang, kan chawnpah ve hna awk le kan rian cio a si tiin kan luh cio a herh i CDF upate tuanvo ngeitu zong nih an i tel cio khawh nakding in rian /policy/training hna tuah a herh.
Nihin kan dothlennak ah mino tampi an zuamnak, an i pek khawhnak le an ngamhnak nih a daih ti lo i hihi i rinh peng le mahti hin kalpi peng mi nih a dongh tiang a nguh lai lo ti 100% a fian cang ca ah, “Thangthar hna” (next generation) kum 18 tang mino pawl hna hi nihin kan dothlennak ralkaap ca ah timhlamh le an thisa ah luhpi kan hau cang (sianginn ah siseh, a leng ah siseh training) pek an herh cang ti kha CDF hruaitu upa lawng si lo in nulepa zong nih fian a hau cang.
Nulepa nih raalhraang pawl le vanlawng bomb thlak vial tih ngai tung i fapale vial CDF luh sianh lo ti mi lungput hin cun a rauh hlan ah CDF hi a piat te lai i cupin ah kan dothlennak lohma zong kan chuah kho te lai lo.
Ramleng kan unau cheukhat nih “CDF hi a hau lo, tangka bawmhnak lam aa thencheu, cun nan kan kalpi ning zong rammi ca ah thilrit men nan si, CNF tu ah kan naule hi rak kalter hna u…” nan ti mi hi, a policy cu a tha nain a practical ca ah, CNF tlak cu chim lo hitluk a neem mi CDF tlak hmanh an i harh i an duh ti lo hnu ahcun CNF cu baan rawt dah lo cun an lut hlei ti hnga maw ti hi ruah a hau.
Nihin ah CDF hruaitu le aa pe ngai rih mi mino a tam deuh hna zong hi a rauh hlan ah an hawile bantuk in: Dam lo ruang, raal kut in thih ruang, thih tih le ngamh ti lo ruang, nupi pasal ngeih ruang, zuam ti lo, nulepa nih thloh, chungkhar inn-lo harsat, hruainak sikan le upadi zulh khawh lo, hruaitu le hawile he i sikvelh le lung i khah lo ruang, ramdang kal le sianginn kai, hmailei an bavuah rawk lai phan tibantuk ruang pawl ah an i din cio te hna lai i khipinlei kan dothlennak zei dirhmun dah kan phanh te lai ti hi nihin hruaitu le nulepa nih ruah cia a herh.
Zeibantuk miphun dothlennak zong ah teinak hi meithal nakin miphun lungput in a si deuh ti hi kan dothlennak lungput a si a herh.Crd :Pa Pui
Leave a Reply