Ni khat ah cun Ming Aung Hlaing hi tei a si te ko lai. Rangoon, Mandalay, Nay Pyi Daw le vanlawng bual hna hi an laak khawh te men ko lai.

Hriamtlai Dothlennak le Tlangchung mi hna.“Rangoon, Mandalay, Nay Pyi Daw le a biapimi khuapi pawl le valawng bual pa hnih khat hrawng kan ngeih khawh tik ah cun ram dang hriamnam bomhnak cu a phan colh lai, ruah sur in a sur lai…” tiah Dr. Sa Sa nih tonbiaruahnak pakhat a chim (Kan hnulei ah khan le Dr. Zaw Wai Soe nih, “Federal kong hi nizan nai te lawng in ka theih” a ti ai lak fawn). NUG hruaitu cheukhat hna bia zeimaw hi ruah setmat tik ah an lung chung in a chuakmi an si rua lo dah ra maw ti awk in a um. Lung a hmui lo ngai. Dr. Sa Sa bia hi keimah ruah in ka hei ruat:

Cu vialte cu la kho hna seh law ram dang bomhnak raltuknak hriamnam hna hi a herh ti hnga hleh i?

Myanmar ram chung khua ngan pipi le vanlawng bual hna laak khawh hnu i bomhnak a pemi ram hna hi zei lungput dah an ngeih hnga: Uktu ṭha lo tang ah harnak phun kip a ingtuarmi khua mi hna zawn ruah ah maw, cozah thar a si lai tiah ruahmi hna sin in hlawknak ruahchan ruang ah dah?

Ni khat ah cun Ming Aung Hlaing hi tei a si te ko lai. Rangoon, Mandalay, Nay Pyi Daw le vanlawng bual hna hi an laak khawh te men ko lai. Cu hnu ah ram dang nih bomhmi raltuknak hriamnam hi ruah sur in a sur te men ko lai. Sihmanh seh, mi tampi nih hi ti hin an ti ve te lai:

Hriamtlai dothlennak an rak thok hnu lawng ah NUG hi lakhruak in an rak dirhmi a si.

Tlangcung hriamtlai phu hna lak i a ṭhawngbik pawl a simi Kachin pa kha president rian, Karen pa kha prime minister rian an rak peek hna.

Hriamtlai dothlengtu phu hna nih Myanmar ram khuapi hna le vanlawng bual hna an rak laak tiang ah hin NUG nih raltuknak hriamnam a rak bawm hna lo.

Min Aung Hlaing tei hnu ah khin Daw Aung San Suu Kyi le U Win Myinh hi an nung dam ko nain an rian ṭhing tlaih an duh ti lo ti hei si seh law Tlangcung mipa hi Myanmar ram president ah hmunhma an pe len te hnga maw?

Dothlennak lio i tlangcung mi hna an bochan hna i rian pipa an khinh hna bantuk in dothlennak hlawh a tlin hnu zong ah u ting nau zo lungput an ngeih khawh tu ah cun lunglomh awk taktak a si hnga. Asinain, tlangcung mi hna an si ah siseh, mi dang sin ah siseh, herh caan lawng i hmurka ṭha peek i herh ti lo hnu vial i an pheo sual hna ah cun zei tin…?

2004 kum ah khan India ram ah Congress hruaimi United Progressive Alliance (UPA) hi [party dang dang hna aa fonhmi]cozah an rak si. An hruaitu Sonia Gandhi nih hin Oxford sianghleirun in chawlehnak lei i Ph.D a awngmi Dr. Manmohan Singh kha ruah lo piin prime minister rian a peek. Manmohan Singh hi India ram ah milu tlawm pawl a simi Sikh miphun a si. Asinain, amah hi chanthar fimthiamnak a ngeimi a si. Singh nih prime minister rian a tlaih hnu ah hin India ram ṭhancho hram a rak i thok lawng si lo in amah zong hi vawleipi nih theihhngalhmi pakhat a rak si.

A tu kan chan ah hin Myanmar ram chung milu tlawm tlangcung mi hna lak zong ah hin vawlei ki li ah chanthar fimthiamnak a cawngmi tampi an um. Mah le buantual cio ah chanthar fimthiamnak a ngeimi mino hna hi Sonia Gandhi nih Manmohan Singh rian a hoih bantuk khan an hoih kho te hna hnga maw?

Kawl rawn cu Kawl pawl ta a si ko. Tlang ram cu Tlangcung mi hna ta a si ve ko. Kawl unau pawl hi thlanglamh awk zong an si hlei lo i ṭih awk zong an si hlei ṭung lo. Pakhat le pakhat i upat i ṭihzah cio hi a za ko.

Chin ram cu Chin miphun hna ta a si. Dothlennak tuah lio caan le a pinlei zong ah khin u ting nau zo lungput hi a biapi ko lai.

Dothlennak ah hin vawleipi hmuh in bia a chimmi le ramtang ah khua a sami ralkap hna khi an rian aa khat lo nain an man cu aa khat ko.A Ruang 20/08/2022

Be the first to comment

Leave a Reply

Your email address will not be published.


*