Naitan Facebook video pakhat ah ka hmuhmi cu Mirang ngakchia pa te, kum 5 hmanh a tling rih lai lo,

NULEPA NIH KAN RAWNH HNA A HERH:Naitan Facebook video pakhat ah ka hmuhmi cu Mirang ngakchia pa te, kum 5 hmanh a tling rih lai lo, mah cu a nu sinah a kal le a nu cu; «Kan uangthlar tuk.» tiah a ti. A nu nih «Si maw? Zei caah? Zeidah ka tuah?» tiah a hal i «Ka ihnak khaan na ka thianhpiak cu. Na ṭha tuk.» tiah a leh.

Cu tluk ngakchia te i lawmhnak biachim thiam le mi lawmh thiam cu dah tiah ka uar kho tuk. Hi bantuk ngakchia hna hi mi tampi nih cun anmah pumpak fel le fim ah kan ruah men hna lai, nain a hrampi taktak cu nulepa hi an si zungzal. Hi ngakchia te kum 5 hmanh a tling rih lomi ziaza zoh tikah a nulepa nih a thil tuahmi tete ah an rak conglawmh, an rak thangṭhat i, a sin ah hmurka thlum tampi an chim lengmang ti a fiang. Kha a nulepa ziaza kha aa lak ve i a hman ve kha a si.

Psychology biafang ah a ummi «Social learning» ti a si i cu nih a chimmi cu ngakchia hna nih an tonmi, an hmuhmi le an theihmi kha an i lak i an i nunpi ti a si. Volhpamh, biafak le aw hrang tibantuk an theih lengmang ahcun khakha an i lak, an i nunpi lai i an hman ve. Tukvelh tibantuk zong an ton asilole an hmuh lengmang cun anmah lila an hmang ve. Cu bantuk ṭhiam ṭhiam cun nulepa sinin biathlum, biadawh le bia ṭha kha tampi an theih cun an i lak, an i nunpi i an hman ve.

Cucaah kan fale hna hi a ṭhami le a dikmi le aa dawhmi thil kha tampi rawnh ko hna usih. Hmurka lawngin «Cucu tuah.» «Cu ti cun chim» ti a za lo. Kan tuahsernak hrimhrim hin an cung ah kan langhter a herh.Crd.Roro Fambawl