Na rat lai hi zeicadah na ka chimh/ theihter hmasa lo?

Laikhat Ṭangṭi A Si Ko Mi Cu A Caan A Remnak Hmun Paoh Ah Ral Cu Va Doh Ding A Si Ko Cu Ta.

Tahchunhnak:Unau Ṭangṭi, Ral pakhat nih kan unau rual an kan doh tikah, Inn dangah a ummi ka nau pa innchungah kan ral pa cu a um, a caan a rem lioah cu pa cu ka va tlaih tikah, Ka naupa nih aa thawh i keimah theih loin le nangmah nawl in na ra riangmang i ka inn chungah kan ralpa hi zeicadah na rung tlaih?

Na rat lai hi zeicadah na ka chimh/ theihter hmasa lo? tiin a thin a hun ahcun, cu ka nau pa cu Miṭha lo ngaingai a si hnga. Ka nau innchung i a ummi kan ralpa kha a caan a rem lio i ka va tlaih khawh tikah ka nau pa cu aa lawmh awk a si ko hnga lo maw?. Zeicatiah a ṭangṭi pei kan si ko cu tiah.

CNF cungah CNDF hi an thin a hun awk a si hrimhrim lo tiah Keinih cun ka ruah, zeicatiah an meithal hmur hoihnak aa khat ko cu ta? ralhrang a dotu an si i ṭangṭi veve an si ko. Kan ram/ na ram, kan khua/ na khua i tilen awk kan si hme maw ka ti.Crd.F Bawi Khamh

Hrial Dingmi Minung Phun ( 9 )
Minung cu nifatin kan nunnak lamthluan ah le pakhat le pakhat kan i hawikomhnak ah ṭhatnak a um bantukin ṭhat lonak zong a um i remnak a um bantukin rem lonak le buaibainak zong a um. Hi lakah a tlonglengmi kan si hna i tlonlen thiam hi a biapi ngaingaimi a si. Atu cu 2023 kum thar chungah kan lut cang hna. 2023 kum chung nifatin kan kalnak dingah kan nunning le kan sining cio kha i chek, i zoh ṭhan in zei hi dah kan i remh awk a si i, zei hi dah kan hrial awk an si ti hi ruat cio hna usih.

(01) Hmun Khat I Um Le Cangka A Minung Hawi Caah Thilrit A Simi

Minung nunnak ah hin lungthin buaibainak le harsatnak, teminnak le mi nih thlanglamhmi sinak hna hi amah le a caan te ah cun a um tawn phung a si ko. Asinain a herh ning leng tiangin a minung hawi cungah nihsawh thlanglamh a hmang zungzalmi pawl hna cu hrial ziar ah an ṭha. Na caah hnawmtam le thilrit men an si. Anmah he hmun khat i um cu a ṭha lo.

(02) A Hmurka, A Bia Lawngin A Minung Hawi Rian Chimh A Hmangmi

Na pawngah hmaifa bangin a zungzal an um hnawh i amah pumpak tuahser huam ṭung loin (Cu cu tuah, kha kha tuah tiah) a kaa lawngin rianṭuan ai timmi hna cu hrial ah an ṭha. Cu bantuk mi hna cu anmah ṭhanchonak le hlawhtlin nakding a si ahcun zeipaoh kha a chim ngam i a tuah ngam ding phun an si. A donghnak ah cun a minung hawi, pawngkam minung nih huatmi ah an i chuah tawn.

(03) MI Zeirello A Hmangmi (A Minung Hawi Minung Ah A Rel Lomi)

Vawlei cungah hin minung pakhat le pakhat i upat thiam le i theihthiam ahcun zei thil paoh hi a tluang i a tlamtling kho. Nangmah nih cun a cungah toidornak nun he na pehtlaih, na upat, na chawnhbiak ko, nain amah nih mah ti i na tuahmi kha zeirellonak i an hman ahcun amah cu hrial ko. Kom hlah na caan lam a paam men.

(04) A Lungchung I A Ummi Paoh Chimphuan A Hmangmi Zeihmanh tuaktan lo le ruat huaha loin chimmi nih hin midang cungah ngaihchiatnak le fahnak a chuahpi ṭheu tawn. Cu bantuk minung cu lamhlapi in hrial khawh i zuam ahcun a ṭha khun.

(05) Lihchim A Hmangmi. Minung aho paoh hi a hmun le a hma, amah le a caan hoih in thil sining cungah lih le hrokhrol chim hi hman cio a si tawn. Asinain rian kong ah siseh, pakhat le pakhat i pehtlaihnak le i hawikomhnak ah a zungzal in lihchim le hrokhrawl chim rumro a hmangmi pawl he cun i komh lo ah a ṭha bik ko.

(06) Na Umhngan Ah Phun Dang, Na Um Lo Karah Phun Dang In A Ummi

Nangmah hngan le na hmaika cang ah cun bia dawh dawh le bia thlum thlum in an chawn bia i na um lo kar cang ah cun midang sinah ṭha lo tein thangchiat a hmangmi hna le kong ceih a hmangmi hna cu i ralring bak ko. Mah bantuk minung pawl cu anmah ca ṭhatnak le hlawknak lawng kha hmai ah a chiami le a ruatmi an si caah hrial ziar le komh lo ah an ṭha bik.

(07) Velhle In Hawikomh A Hmangmi.Nifatin kan nunnak le kan cawlcanghnak le kan ṭuan kawlnak ah ṭih a nung taktakmi cu velhle(Kaapahle) pi in hawikomh a hmangmi kan minung hawi hi an si. An mithmai cu panh ngai in an i umter, an i nihter len, nain an lungchung cun canghngia tuuphaw aa aihmi bantuk an si. Zeitindah hi nu, hi pa hi ka thluk khawh lai i, zeitindah ka hrawh khawh lai? ti lawng a bawhmi an si. A rianțuan ṭi hawi sinah a lungchung tein ṭhat lonak khua lawng a khaang i a thlithup in mi kehlengphelh ai timmi an si. Hmunkhat i um ṭi lioah cun hawikom ṭha taktak bantukin i umter ṭung i a taktak i harnak van ton tikah cun a thei lo le a hngal lo bantuk tein i umter a hmangmi cu a rannak in hrial zokzok ding an si.

(08) A Herhnak Leng Tiangin Bawmh A Hmangmi.Midang va bawmhchanh khawh hi thil ṭha taktakmi cu a si. An herhnak cung i bawmh ah hin bawmhchanhnak sullam zong a um i man zong a ngei fawn lai. Asinain a herhminak leng tiangin bawmhchanh ai tim i, an sin in thil ṭha pakhat khat ka hmuh ve ṭheu lai timi ruahchannak le lungput he mi bawmh a hmangmi cu hrial ah an ṭha deuh suaumau.

(09) Ṭhat Lonak Leiin A Chim I Mi Thloh A Hmangmi.Hmailei kan lamthluan ah zeitindah kan ṭhutdir lai i zeitindah kaar kan hlan lai tiah khua tuaktan lio caan ah tha petu le ṭanpitu si loin a ṭhat lonak lei rumro in a chimmi le tuah lo dingah kham, thloh a hmangmi hawikom cu hrial colh ko. Amah cu na caah man ngei lomi a si.

Cucaah cun minung hawi le hawikom hi chikkhatlo pi ah hrial colh le kaltaak colh cu a har ngaimi thil a si ko. Nain a caan le hmunhma kha zoh in hmuansam in hrial khawh kha i timh ding a si.

Khah! Si le, Facebook hawile hna 2023 kum chung nan karhlannak le nan lamthluan kipah Bawipa nih thluachuahnak in pe hna seh law lungthin thar, ruahnak thar he nan saduhthah cio tling hraam ko seh tiah thlaza cam buin…

Hi ca a reltu nan dihlak cungah kumthar lawmhnak um ko seh.
Vawlei parpahlik in,Salai K. Biak Lian Thawng Norway

Be the first to comment

Leave a Reply

Your email address will not be published.


*