Mizoram lei ah a zaam mi hna ca ah kan ruah a hau mi

Pakhat le pakhat bawi duh le Lal duh ruang ah kan ram ah uknak an i chut. Hi hna pahnih ruang ah mipi a sing le a tawng in harnak kan tong.

Mah inn le lo, ram le hmun hmanh ah um ngam loin mi ramdang ah zaam le panh cio kan si. Meithal a tlai kho nih meithal tlaih in doh a si. Tangka chawva lei in a ti kho nih hi lei in doh cio a si.

Atu ah a tam deuh kan zaamnak hi Mizoram ah a si. Mino deuh a zaam mi a tam deuh cu, Delhi, Dubai, Malaysia le Thailand deuh ah kan si. Hi chung ah mizapi nih kan ruah taktak ding ah a herhmi cu Mizoram i a zaam mi Chin ralzaam hna hi an si.

ZEIDAH RUAHPIAK DING AN SI*
– A pakhatnak ah ngakchia ca ah ruahpiak ding an si. Sianginn an kai lo cu va chia ta rih ko sih (kai nakding lam a ngei lo an tampi). Bawi duh le lal duh ruang ah mipi kan tuar hi kum khat leeng a si zapi nih kan theih. Ngakchia runvennak ca ah kan tuah peng mi kan chunh pengmi sii atu ah Mizoram a zaam mi ngakchia a tam deuh an i chun kho ti lo (an ngandamnak a si ca ah a biapi). Hihi kan MP hlun le kan Ramkhel sazakyi pawl nih tawlrelpiak ve awk an si ve lo maw?

A pahnihnak ah ruah lo awk a tha lomi cu an fimfawnnak hi a si. Fimcawnnak le Chinmi kan fale an i hlatnak hi COVID lio in a si cang. Atu Mizoram lei ah an zaam an kal. A cheu mirum deuh cu sianginn ah an chiah khawh hna. A tam deuh cu sianginn ah chia kho lomi tampi an um.

Ralzaam ngakchia lak ah sianginn kai a duh tuk nain kai kho lo tampi an um. Pakhat um ve mi cu sianginn an chiah khawh hna zong ah Myanmar ram ca pakhat hmanh aa tel ti lo. Myanmar mi nih Myanmar ram ca kan cawn lo a si cun a si kho ve lo. Anmah Mizo hmanh nih an ruah mi a si.

– Mizo nih an kan ruahpiak tuk ko nain zarhkhat ah nikhat lawng kan ram i cawnmi ca cawn ding in khua an khaang. Hihi ralzaam lei tawlreltu hna le kan Ramkhel sazakyi pawl nih ruah le nam a hau ve ko lo maw?

Hitining in kan um kan zoh sawh ko a si ahhin cun Myanmar ram huap chim hlah kan Chin miphun zong loh kan tawi te. Khua an ruahpiak hram uh. Ruahnak thatha kan chuahpiak hram uh.Crd-Salai Tluang Te

Be the first to comment

Leave a Reply

Your email address will not be published.


*