Mizoram ah an nehsawh bikmi hna miphun cu Tuikuk miphun an si.

Mizoram ah an nehsawh bikmi hna miphun cu Tuikuk miphun an si. Bru ti zong in an auh hna. Keizong Aizawl thlang i ka rak um lio ah Tuikuk miphun pawl cu tampi ka hmuh ve hna. Tuikuk miphun pawl hi a thangcho lobik le a molh bik le ram nei lo an si.

Mizoram cozah sinah ram an hal hna i Mizoram cozah nih a pe duh hna lo. A caan ahcun Tripura state hna ah an va zaam tawn. Tripura state le Assam state hrawng zongah an um hna. An muisam le an umtu le an sifak ning hrim in an thangcho lo ning a fiang tuk/a lang tuk. Mah cu an si ko nan atu video ah khin Tuikuk nungak pakhat cu Kala tlangval pawl sin i a um ruangah Tuikuk tlangval nih an bengh i an tthawl. An nungak cu kala tlangval vatter cu an duh bak ve lo.

Tuikuk tlangval an hlei sual lai an phang bia zong a si kho ve. Asinain tuikuk tlangval khi an palh ngai. Aruang cu nu pakhat nih right a neihmi cu zei ah an rel lo zong a si fawn i an upat lo zong a si fawn. Comment tampi zong nih Tuikuk tlangval cu an soisel len hna. A cheu le bang nih cun keicu ka ti hna seh law cei lak in ka leh ve hna hnga a ti tawk zong an um. Aruang cu rawl zong in an cawmmi a si fawn lo. An i thlak hrim a herh lo an ti.

A hman ngai ve. Zei si hmanh ah Tuikuk miphun nauta bik hmanh nih Mizoram ahcun miphun ngan Kala miphun cu an nek hna i zei ah an rel hna lo. I nek kha a ttha ka ti duhnak a si lo nan anmah le an ram ahcun an lal ngai ve ka ti duhnak a si. Laitlang ahcun Kawl pawl an lal tuk. Mizoram ahcun ram nei lomi Tuikuk hmanh nih Kala cu zei ah an rel hna lo. Kala tlangval rual zong an zamter ko hna. Tuikuk miphun ka hmuhmi hna pawl cu Rua-inn ah a ummi an tam.

Tuikuk tiah Mizo pawl nih an auhnak hna aruang cu Tuikuk pa pakhat hi a kholh lioah Mizo pawl nih an hmuh i zei miphun thla na si tiah an hal i tuikuk pa nih cun ka kholh tiah a leh hna. Tuikuk holh cun i kholh kha tuikuk ti a si. Mah ruangah mizo pawl nih cun a miphun min ah tuikuk a si ko hi tiah an ruah. Mah ruangah tuikuk tiah an auh thai hna tiah ka rel bel ve. A tak te cun Bru miphun an si. Bru ti hi an miphun min diktak cu a si.

Aizawl thlang i ka rak um lio ahcun voikhat cu Tuikuk miphun tor an rak lut lai an ti i ka umnak khuabawi nih nihin cu aho hmanh lengah chuak hlah uh, nan innka nan khar dih lai i innchung ah nan i erh dih lai an kan ti. Aruang cu tuikuk pawl kha kan khua um ding ah kan in duh hna lo ti langhter nak a si. Asinain cu ni ahcun Tuikuk pawl cu an ra tthan lo.Crd-Van Tum