Mitku vuai lo nawn tein kan i timhnak hmun lei cu Jan 12 kan kal than

Manipur tapung he kan rak i kah lioJan 13.l Hriam kan vun i tlaih ka te, ralram ah meithal i tlaih in ka kal a voi thumnak a rak si.

Nikhua a rak dawm ngai, khua zong a rak sik ngai. Ralkap ve fom cu a herh ahcun kal ding a si ca ah kan pu le nawl peknak in ralram ahcun ka rak i thawh (ka rak dam pah lo). Khoika lei kan panh lai timi hi kan pule lawng nih an rak theih.

2022 January 10 suimilaam 10:00AM hrawng a si. Minung cu kan vun tam ngai, kan meithal um ek in kan vun khomh i meithal nih an kan zaat ti lo. Kan hawile cheukhat a kir mi an um.

Suimilaam 4:00PM a hun tling, tuahkel bang in minung kan hun i check. Minung check ah a hmai in ralbawi nih au a si i, “A aumi kan ralbawi pa kha au dan a philh i Mj. Ngun Vung nih phaawk tiah capo pah in a tawphet ah a chuih).

Minung kan vun tling, Pu Thawng le Pu CS nih bia an kan cah. Kan tha a tho ngai kan i hliphlau ngai. Cu ti cun kan khuallam kan hun peh i Falam Peng, Singai khua kan phak ah khua a mui. Khuallam kan peh than i Rih kan phak lai te ahkhin vanlawng a zuang mi kha Drone ah kan ruah (Drone le vanlawng zong cu kan rak thleidang kho tuk lo cu mu). Riah kan i timhnak kanmah CNA ralkap camp Tedim Peng ah a ummi hmun cu therh pah bu in Jan 11 suimilaam 1:00AM ah kan phan. Vok an rak kan thahpiak i kheeng 4 ka rak ei (a pawkau ka ti hlah uh a ngandam ka ti uh).

Mitku vuai lo nawn tein kan i timhnak hmun lei cu Jan 12 kan kal than. Tedim khuapi lei kan panh. Tedim hi a muih ah kan phan. Tedim cu ralhrang sakhan ngan umnak si kaw fawi tein tan awk a tha lo. Curfew an tuah lio hrawng kha a si. Khuachung ah aa chok mi a hohmanh an um lo.

Tedim khuapi tan lo ahcun kan khuallam a hla tuk ding a si. Tan ah le ralhrang sakhan a tang bakin kal ding a si. Kan pu le nih khua an khaan, a zei si zong ah pah phot ko hna sih an ti i kan i thawh. Kan vun pah cu kan cycle a tam ca ah an rak theih. An sakhan tang kan phak ah an kan kah (Pathian a tha kan i thup manh kan him dih).

Kan pah khawh lo ca ah kan kir than i lam aa naihnak ding poh a chia he a tha he kan kal. Laitu timi khua kan phan suimilaam 4:00AM a si cang. Laitu in kan i thawh than. Tonzaang tan pah ding a si Tonzaang cu ralhraang sakhan umnak a si ve. Kan kal nakding hi Tonzaang ralhrang sakhan pah hrimhrim a hau ve hoi…hmmm kan ti i mitchinh bakin kan pah i an kan kap lo (Tonzaang kan luh cu hmmm tiah thawpi kai chuah).

Tonzaang kan lonh ah nikhua a chia i Tonzaang tang Nahzaang khua ah kan riak (ruah nih ceilak a kan thuat). Kan ih lonak sau i Nahzaang khua slm 7 hrawng kan it. Jan 13 slm 1:00AM hrawng ah kan pu nih a kan thangh i khuallam kan peh. Ruah a sur lam a naal lam a cet a chia. Kan khuallam hla tuk aa duh rih. Cuticun kan i timhnak hmun kan phak lawng ah kan tuah ding kan pu nih a kan chimh.

Kan pu nih cun, “PLA, Kathe tapung tiah auh mi manipur tapung pawl kah ah kan kal mi a si hih,” tiah an kan chimh. Cu tapung pawl umnak khua cu nu lawng te an si i pa cu an khuabawi pa le khuadang in rian a tuan mi telh in pa pali lawng an um. Tapung pawl sakhan cu kan vun fuh cuahmah kan naih cuahmah thin cu a phaang ngai.

Mj Ngun Vung hi hmaisuang a si, an sakhan chung ahcun kan vun lut i, an gate hngak pahnih kah hmasa an si. Cu ticun sau taktak kan i kap. Kanmah ca ah kuan phen kan ngei lo. Kan bawhnak hi hnu kan kir hnu ahcun lo vah mi tluk in a kawng dih (Kuan le zeen zeitluk in an rak ngeih ti nan fiang lai dah).

Hnu kan vun kir minung kan hun i check than, Mj le sen hnih pakhat nih a kan liam tak (kan tap dih). Minung pasarih hliam kan tuar.

Kir kan i tim kir lei kan hmai ah ZRA nih a kan bawh. A hmai deuh ah ralhrang nih a kan bawh. A hnu ah PLA nih a kan bawh. Keh orh ah ZRA nih a kan bawh. Chuahnak lam kan kawl… lungdong in kan um. Pathian khuakhan ngai hi lam an hman ti lomi Kinglaang timi khua pawng ah a rak um i hliam a tuar mi hna puak pah le zonh pah le hruai pah in kan kal. Cycle kan chiah ta dih. A cho ning hi taw lang cho tluk a si i cu i hliamtuar an vun kai ve hrim kha ka ruah ah ka celh lo.

Cu ticun kan hun pehtlaih cio hna i Tonzaang khuapi ning in an rak kan don. Tonzaang CDF sin ah zaan hnih kan rak riak i Kalay khuapi lei in kan rak kir.

 Kalay peng cu kan hriamnam he mitchinh in kan hun pah i tluang tein kan pah khawh. Taingen kan phak ah vanlawng kahnak in kanmah CNA bawino Pui Aa timi a nunnak a liam ve. A ruak an rak vui cang. Camp kan phak ah mitthli he mipi nih an rak kan don i biakinn ah upat peknak pangpar he an rak kan don…Mah tan ka Bible ca cang kaa tlaih mi Josuah 1:9 Crd-Salai Tluangte