Misifak pa nih mirum pa inn hmai hnawmbung ah thil a char lio kha mirum pa

Misifak pa nih mirum pa inn hmai hnawmbung ah thil a char lio kha mirum pa nih thlalangawng in a hmuh tikah “Bawipa, mah bantuk sifak ka si lo caah kaa lawm tuk” a ti.

Misifak pa nih lam cungah taklawng in aa chawk lenmi pa kha a hmuh tikah “Bawipa, kaa lawm tuk, taklawng in ka um lo caah” a ti.

Taklawng in lam cungah aa chawk lenmi pa nih ambulance in sizung ah ah mizaw an kalpimi kha a hmuh tikah “Bawipa, kaa lawm tuk, mah bantuk mizaw ka si lo caah” a ti ve.

Cun mithi an țah lenmi le puan in an zualmi mithi ruak an kalpimi kha ihkhun cung in mizaw pa nih a hmuh tikah “Bawipa, kaa lawm tuk, nihin tiang ka nunnak na ka zuah rih caah” a ti ve.

A si, Pathian cu mirum pa nih a thangthat, sifak pa zong nih a thangthat, taklawng ummi pa zong nih a thangthat i mizaw pa zong nih a thangthat țhiamțhiam ko. Buan in an zual i thlan ah an kalpimi mithi lawnglawng nih Pathian an thangthat kho lo.

Baibal vun rel ta. “Bawipa a thangṭhattu cu mithi an si lo, holh lo i dai tein umnak hmun ah a vung kalmi nih an thangṭhat kho lo, ” “sihmanhsehlaw kannih a nungmi nih amah cu kan lawmh lai, atu in zungzal tiang kan lawmh lai. Bawipa cu thangṭhat u! ” Salm 115:17-18

Nundamnak hi zeitluk in dah a sunlawi ti hngalh na duh ahcun hmun pathum ah va kal: Sizung, thonginn le thlan. Sizung na phak tikah zeidang nakin damnak a biapit zia na fiang lai. Thonginn na phak tikah luatnak hi zeitluk in dah a nuam na hngalh lai i thlan na phak tikah nunnak man a ngeih zia na pemh lai.

Kan tli, kan zam, kan hrum i kan ai ko. Sihmanhsehlaw kan dam rih, kan nung rih, kan ei kan ding rih ko caah kan Pathian cu thangțhat ko hna usih.Crd-Biak Mawng