Mirang nih, “A friend in need is a friend indeed” (Herhlio caan i mi dirkamhtu cu hawi thaa taktak an si) tiah an ti.

Mirang nih, “A friend in need is a friend indeed” (Herhlio caan i mi dirkamhtu cu hawi thaa taktak an si) tiah an ti.

Atu hi Kawlram cu a muih cem caan ah a um cang. Cucaah, kawlram ummi na nu le pa, na u le nau, na hawile cungah dawtnak kut samh caan a si.

Nu le pa, u le nau le hawile cungah zei bantuk minung dah kan si timi langhtertu le fiantertu caan ah kan um dih hna. Atu caan i daite kan i umter ahcun nu le pa, u le nau le hawikawm caah santlai lo minung pakhat sawhsawh men khi kan si ko hnga.Crd-CK Tiam

“Aa Lim Cang” Misual tlanhnak caah vailam cungah khenh chihmi Jesuh nih a donghnak a chimmi bia cu “aa lim cang” ti a si.

A si ahcun zeidah “aa lim cang” a timi cu a si? Vawlei mi vialte khamh nan si cang tinak a si maw? Nu nih pawimi paoh kan nu paw chung hmanh in Adam sual kan i hrawm tiah kan zumh bantukin maw mi vialte cu Khrih Jesuh vailam cung thihnak thawngin khamh kan si lai i vancung khua kan lut dih lai?

Cucu si taktak sehlaw misual hna sualngaichihnak cu zeidah san a tlai? Zumhnak cu zeidah san a tlai? Ti le Thlarau baptisma cu zeidah san a tlai? Sualngaihchih in Jesuh zumh loin khamh na si lai maw? Ti le Thlarau baptisma (hrinthannak) loin khamh na si lai maw?

Na sual naa ngaihchih lo ahcun, na zumh lo ahcun, ti le Thlarau in hrinthan na si lo ahcun khamh na si lai lo kan ti tikah vailam cung Khrih thihnak cu a tling lo, aa lim lo tinak a si maw?

Mi cu a sual bakin ka tlanh lai, sual man thihnak in ka khamh lai ti kha Pathian nih a rak timh cang. Cu khamhnak ding cu hitihin a si lai tiah Jesuh Khrih vawlei i a chuah hlanpi ah a rak chimchung dih cang. A chimchungmi vialte cu Jesuh vawlei a rat tikah a tlinter taktak. Cucaah “Cathiang nih a chimmi kha a tlin nakhnga …” tiah voi tampi Bible nih a chim . Cathiang nih a chimmi vialte le tuah ding a timi vialte a tuah dih, a lim dih caah “Aa lim cang” a ti i a cat.

Na khamhnak dingah Khrih nih a tuahmi (a lim cangmi) vialte kha na sual naa ngaihchih lai i na zumh lai. (Sualngaihchih loin zumh, sual buin hrinthan a si lo mu). Na zumh lai i ti le Thlarau in hrinthan na si tikah Pathian fa, rocotu na si i vancung pennak chung a lut ding khamhmi fa cu na si.

Vailam cung Jesuh Khrih thihnak cu mi vialte ca; zumh le zumh lo a um lo, na zumh hlan piin Jesuh nih a tuah cangmi a si. “Pathian nih vawlei hi a dawt tuk caah …” timi hi “Pathian nih zumtu/khrihfabu hi a dawt tuk caah” tiah rel ding a si lo. Jesuh Khrih cu ka caah vailam ah a thi ti lawng a za lo. Mi vialte ca a thimi thihnak kha naa hrawm ve a hau. Zeitindah kan i hrawm khawh lai? Zumhnak in naa hrawm lai tiah micheu nih an chim. Cucu Bible cawnpiaknak a si lo.

Khrih thihnak kan i hrawmnak cu lam pakhatte lawng a um. Khrih thihnak ah thih ve le an phumnak ah i phum ve le a tho thannak ah thothan venak lawng in a si. Hihi na zumh duh phun le na cohlang khomi phun a si lo men lai. Nain Baibal bia cu na el kho lai lo. Sualnak ah na thih a hau, vui na si a hau, vui na si hnu lawngah thawhter na si lai. Vailam cung a thimi Jesuh zumh loin hi vialte hi a si kho lo. Na zumh lawngah zumtu hna pek dingin biakammi Thlarau pek na si lai.

Be the first to comment

Leave a Reply

Your email address will not be published.


*