Mipi ralkap kan ṭhawn ti cu kan thinlung lawng asi rih.

Thazang Pakhat Ah Kan I Hlum Khawh Rih Lo Caah Ralhrang Kan TEI khawh Hna lo

NUG le Fans rual nih nan duh lo tuk mi asi ti ka hngalh buin, Ral Tei awk kan bau rih mi le kan hrelh mi asi caah, Ralhrang MAH thluk khawh nak ding ah NUG sin ah caa kan kuat hna.

MAH te cu Ramkhel le Raldohnak he hmunkhat ah an kal ṭi khawh caah an ṭhawn lo tuk ko nain kan thluk khawh hna lo. Kan nih Ramkhel le Raldohnak kha hmunkhat ah kan kal ter khawh lo, Lamdang veve in kan kal ruangah kan ṭhawn tuk ko buin in TEITU kan si khawh lo.

Paucan Dohthlennak cu Ramkhel le Hriamnam Raldohnak he a kal mi asi. NUG nih Ramkhel lawng in kan kal I, Hriamnam phu nih raldohnak lawng in kan kal tikah, Thlarau he aa ṭhen mi pumsa bantuk asi, ṭhawnnak le TEINAK a um khawh hrim rih lo. Ramkhel le Raldohnak he lungrual tein, hmunkhat te ah, kan kal, kan ṭuanchuak lawng ah, timhmi kan phan khawh lai, TEINAK kan hmuh tuan lai nan theih cio, kan theih cio ko nain, kan hlawhtlin ter khawh bak lomi asi. Mipi nih kan in ngeih chun mi Lakhruak cozah NUG asi caah, hmunkhat ah; thazang pakhat ah funtom in a hlum tertu ding cu NUG asi caah, mah ca hi kan kuat hna.

Kum khat leng ralhrang kan doh cang hna, kan thluk khawh hna lo mi tham cu Meithal le hriamnam pei kan chambau tuk cu tiah nan ka leh dih men lai. Meithal le hriamtling hmanh ngeih usihlaw, thazang pakhat le lungthin pakhat ah, kan I hlum khawh lo ahcun TEINAK he kan I hlat tuk lai, Unity is Strength Lungrual nak cu teinak asi, Nuclear nakin a thazang a ṭhawn dueh ti cu kan hngalh cia mi asi. Kan lungrual nak cu bu khat sinak in kan langhter a herh ve. Kan lung aa rual ko tiah bu dang le phu dang in a um mi Vawleipi tuanbia ah aum bal rihlo. Paucan Dohthlennak ah kan Raldoh ningcang cu mah le Zubui khur cio cawh asi ko. Ralhrang MAH te thluk khawh ding ah a herh mi, Lungrual nak le thazang pakhat ah aa hlum khawh mi kan si rih lo. American nih Ukraine Bantukin hriamnam an kan bawmh zong ah Lungrual nak lo in le thazang pakhat ah hlum loin cun, TEINAK cungnung kan hmuh khawh lai lo. Thazang pakhat ah I hlum ding in ṭuanvo ngeihtu cu NUG asi caah, nihin tiang nan tuah khawh lo ahcun, minung tu I thlen cang uh law, a ṭha men lai. Pau Dohthlennak cu mipi nih an thawk mi asi caah, mipi nih an bochan mi hruaitu ṭha tampi an um rih. NUG upa le Vuanci hlun kha I din hna sehlaw, anmah tu hi rian khinh ahcun: kan hlawhtlin deuh men lai. Ahmun ah Raldoh mi an si caah Mipi Mandate tuah deuh mi an si ve.

Paucan Dohthlennak a dih nak cu MAH te Ralhrang kan TEI hna lawng ah asi lai. Raldohnak in kan tei hna lo ahcun an cihmih khawh asi lailo. An cihmih timi hi thah dih khi asi lem lo. Ralhrang an si ti lo nak hnga kan tuah khawh dih hna ahcun: a ci a tlau lai caah Hmaikum cin in a kho awk a um ti ve lai lo. Kumdang ah kan cin thotho lai lo caah, can sin ah a ci a tlau ding in tuah khawh asi. That dih rumro lawng khi tuak hlah uh. Can sin ah a tlau ding mi asi.

Target, chunmang le strategic planning aa khat dih buin Raldoh asi nain, TEINAK kan hmuh rih lo cu, Hruaitu le kuri tu ah a um mi minung santlaih lo asi ko. MAH te ralhrang a doh mi kip, an target le chunmang cu Ralhrang cihmih ding, Federal Democracy Ramkomh dirh ding timi 2 te lawng hi an si ko. Kan doh mi ral aa khat, planning le hmuitinh aa khat dih, hmunkhat ah lungrual tein le thazang pakhat ah hlum in kan kal khawh lo mi tuak tikah khuaruah har lehlam khi asi. Mipi le GZ mino cu MAH te ralhrang doh uh tiah fial a herh lo lio can asi fawn. NUG upa????

Aa tel ding mi vialte he, nan I ruah I, hmunkhat ah funtom in, ram le miphun caah Harnak le Retheih nak a intuar mi upa lungfim rual he, upadi, Charters, Phunghrampi tuah cuahmah asi ti cu kan hngalh ko. Tlangcung mi, EAOs, Ramkhel Parties, le hriamtlai mi phu vialte he biaruah in thil nan tuah ko ti zong kan hngalh ko, nain nihin tiang pumkhat sinak ah hlawhtlin khawh asi lo. Nan serchuak mi Upadi, Policy le phunghrampi cu Ralṭhat ngai in an dirhpi lai I, an phuang ngam lai, an kal pi fawn lai ti cu kan hngalh ko nain, Raldohnak ah MAH kan TEI lo ahcun Pakpalawng an si dih ko lai. Cucaah raldohnak he pehtlaih in NUG kan chambau tuk caah minung thlen uh.

Paucan Dohthlennak cu CRPH le NUG nih thawk mi asilo. `Mipi nih thawk mi asi. Mah le humhual mi ram cio ah, Ramkhel le raldohnak he biatak tein a ṭhithruai khawh tu Upa le hruaitu ngeih cio asi. Anmah le a tulio NUG ah rianṭuan lio mi hi thlen ahcun: Pumkhat si cia, thazang hlum cia asi lai. A rau hlan ah MAH kan thluk cikcek fawn Lai. Zeitin nan ruah cio?? NUG nih Ramkhel lawng in kal nan thiam. Ka langh ter mi upa hna cu Ramkhel le raldohnak he hmunkhat ah a kal pi khawhtu Mifimthiam le Paralṭha / Pasalṭha hna an si. Raldoh mi PDF CDF CNDF ralkap nih an zumh bak mi hruaitu an si fawn. MAH he practical in nifatin Raldoh mi Hruaitu an si. Lamhla le online in bia tam mi, thli tam mi an si fawn lo. Practiced Men an si hna.

Raldoh cuahmah lio mi, nunnak le thisen a pekchan cuahmah mi CDF CNDF he rianṭuan ṭi khawh lo mi, an cung ah Saya / ma le bawi si lawng a duh mi, fir hmang NUG kusale vialte cu dinh ter cang rawh uh. A hmunhma bak ah mipi he harsatnak le thihlohnak a tawn mi le a intuar pi mi, Raldoh pi mi, Upa le hruaitu tampi kan I ngeih cang hna. Zeiruang ah dah an mah cu hmunhma nan pek khawh hna lo, nan reng nan kianh duh hna lo. Mipi nih dirhpi mi si nan duh ve lo maw? Mipi lawnglawng nan ti ko nain mipi he aa hlat nak bik ah nan zam dih. Nan rum I, nan siṭhat dih fawn. Mipi cu MAH thah hmanh herh loin tirawl lo le innlo lo in a thih khawh mi kan si hi nan philh tawn rua. Cucaah MAH Thluk a duh mi NUG kan si ahcun: Minung hi Reformation tuah tengteng a herh. Rian ṭuan zia a thiam lomi, a rian ah Hlawhtlinnak a hmuh lomi, tbk vialte cu zanram lo tein phuah dih ko uh. An pahrang lo rianṭuan mi cu Dr ansi zong ah phuah ko uh. Ahmun ah MAH he Raldoh bak mi Ralbawi le Upa nih nan rian in chawng cang hna seh, Na AMEN Khawh maw?

MAH te Ralhrang kan doh nak kum khat leng asi cang. Tutan cu Raldohnak fak ter deuh awk ah NUG nih nan thanh fawn. Raldoh awk le raldohnak hruai awk ah Ralram ah rat in nan kan hruai bal rih fawn lo. Pathian Vancung mi bang, upa 2-3 cu phiangkum bantuk tein an rak langh ve sawh lawng asi. Si khawh sehlaw, kan ral hi bia lawng in kan Tei hna awk si loin, raldohnak hmun bakin singkhaw ngam tu kan herh ve cuh. Nal lawng in aza ti lo. Khuate parik le Laikhal khua tiang in Raldoh cuahmah mi he I pehtlaih zungzal a herh Bantukin, an mah sin ah um can le Raldoh pi can zong aum ve awk asi. NUG kusale tal hi Aizawl lawng ah um loin, Ralram le raldohnak hmun ah voikhat te tal cu an um ve awk asi. Nain an hruaitu upa le ralbawi rual kha NUG minister’s ah nan tel khawh hna ahcun an lung tlin ve ko lai, pumkhat si le lungrual nak hi automatic in an tlin colh ve hnga. Thazang Hmunkhat ah aa hlum colh lai caah 2023 thimhnak an tuah hlan ah kan thluk hna lai, NUG nih rampi ah uktu an si ve colh hnga.

Hriamnam hi nan kan bawmh khawh lo zong ah a man adik mi le thildik kan hmuh khawh nak lai, a dinfel mi puaisa le kusale he kan tawn ter uh tiah NUG upa hna sin ah kan nawl duh ko hna. Tucu mah tein hriamnam I zalh le I cawk asi, puaisa le kusale nih athapthap in an kan hlen, hriamnam man van an tawng, a poi loh kan ti nain, thilri hi a due an tam tuk. Ralram ah hmangrua a ṭha lomi lawng te an si ngawt hna. Adik mi le a ṭha mi hriamnam an kan zuar khawhtu ding Ram le Co. Ltd le Puaisa / kusale tu hi kan kawl piak uh / kan tawn piak uh / Kanchimh piak uh NUG nih. Aman kong ah kan buai ti lo, Hlen le thilri due nih an kan sim tuk cang rawh.

NUG kuttang ralkap lawng bawmhnak le meithal pek timi policy zong thah cang rawh uh. Mipi ralkapbu vialte cu Raldoh thiamnak Training le tindan kan pek uh NUG nih, Ramdang in mi fimthiam kan sawm piak uh, Israel le American, NATO ralbawi hna tbk. Ramdang ah Raldohnak he pehtlaih in tidan kai awk ah lam kan sial piak fawn uh. Thla 1-2-3 -6 in tindan kan kai ter uh. MAH thluk nak caah kan hmang khawh Bantukin, NUG nih rampi hruai tikah a Dotla mi Ralkapbu si a herh lai caah, a tu tein a herh mi fimthiamnak kan I ngeih cia a herh lai. MAH te cu Japan le Singapore, Russia, India tbk nih rat in an cawnpiak hna. Kannih cu CHINTHLUAK he.

Nipidaw, Rangoon, Mandalay in thawk in, Chin Khuate lei Laikhal khua tiang in Raldoh mi ralkap he hmunkhat te ah, ralkapbu pakhat ah sersiam a herh tuk cang. Kan I fumton can a rang dueh lai, MAH kan thluk tuan deuh ve lai. Tucu Plan le mission suai tu nih a dang in, Raldoh mi kanmah nih adang in tiah Raldoh asi caah MAH kan thluk khawh ti lo. Alang tlang in planning le mission lawng tuah, raldohnak hmun ah asi can mi hngalh lo pi in raldohnak tactics le planning suaisam ti cu ral teinak asi ve lo cu ta. NUG nih nan bawmh hnihkhat te thilri zong Dalaan ruangah le Mizo ram / Thailand ah an kan tlaih mi an tam deuh.

NUG upa le Dr te nih Ramdang he I tawn zungzal, planning suaisam zungzal, a hmun ah aum mi kannih CDF PDF LDF CNDF cu bomb 5-10 le meithal 2-3 tein nihin tiang Raldoh asi mi hi asi awk hrim an si ti lo. A dinfel lomi NUG Kusale rual le Puaisa hna hi an hnu zulh in hlathlainak le dantatnak zong tuah cang ko rawh uh. Atu cu a har lo tuk mi le a bul mi hreitlung in thingkung nganpi nan kan hauh ter bantuk asi. Hreitlung tat chawm, hreitlung hlawk nih le ṭha fawn hlah, A tu le tu an tlawngh lengmang. Hreitlung zong a ba, kanmah zong kan baa bak cang ko, I pheh thuh lo tein. Peh zulh tein thingkung hauh can a um lo, Hreitlung remh le bunh ṭhannak ah can a dih, kan kut zong a kok dih I, aa hlai dih ngawt cang. Minung zong kan baa ngamsam.

Mipi ralkap kan ṭhawn ti cu kan thinlung lawng asi rih. Hmunkhat te ah, lungkhat tein, hruaitu pakhat tang ah, thazang hlum tein kan um khawh ni le ral kan doh khawh ni khi cu MAH kan thluk cikcek Ni le Ralhrang hmuahhmuah an cihmih dih Ni asi ve lai. Mipi nih 100% bawmh le support cia si caah, MAH te ralhrang thluk cu chimh lo, Nika, Thlapa hman kan thlak lai, Minmei cung tiang hmanh kai in Ral TEINAK ahmuh khawh ding mi kan si. Abau mi cu hruaitu ṭha, hmunkhat an kan pumh khawh tu hruaitu kan herh tuk hrinhran ko.
Crdit-Zingtincuai Cinzah