Minhla Ah SAC Ralkap Sin Thawngpeknak A Tuahtu Innzauk Fimhlawm A Tong.

Minhla Ah SAC Ralkap Sin Thawngpeknak A Tuahtu Innzauk Fimhlawm A Tong.

Bago ramṭhen, Tayawady pengkomh Minhla peng Kyunkone khua ah February ni 13, zinglei suimilam 8:00AM hrawng ah innzauk Soe Naing cu Minhla peng tualchung hriamtlai phu le Tayawady Ganung phufonh nih an fimhlawm tiah theih a si.

Innzauk Soe Naing cu Minhla peng ah SAC ralkap he i fonh in a thli in thing an fir lengmang caah, thing fir ding in an kalnak lampi ah tualchung hriamtlai phu nih voi hnih an kah caah, kah a tonnak hmun ah a thi tiah theih a si.

SAC kuttang um innzauk Soe Naing cu SAC ralkap hna he i fonh in tualchung mipi hrocernak le a nawlngeihnak langhter in tlerhkhonhnak a tuah tawntu a si. Fimhlawm a ton lio a kutcung ah phone pakhat le phaisa sing 135,000MMK kan laak tiah Bago Region PDF in ṭuanvo ngeitu pakhat nih a chim.

Fimhlawm a tongmi innzauk Soe Naing nih SAC ralkap sin thawngpeknak a rak tuah ruang ah Minhla tualchung hriamtlai phu an umnak sakhan cu a luancia July 7 ah luhhnawh in kahdoh an rak ton caah PDF in ṭatkhuaihmu pakhat a nunnak a rak liam tiah theih a si. Ayeyarwaddy Times

Valentine’s Ni Ah Parachute Zuan A Cawngmi Nu Ralkap An Zuan Lioah Inncung Ah An Tla.Yangon ramṭhen, Hmawbi peng vanlawng umnak sakhan ah SAC kuttang um nu vanlei ralkap hna cu Parachute zuan an cawn i an zuan lioah minung umnak inncung ah an tla tiah tualchung mi nih an chim.

Nihin February ni 14, zinglei ah Hmawbi Joint Operations and Parachute Training Institude in nu ralkap hna cu Parachute zuan an cawn lioah cheukhat cu an vanlawng he sang chung mipi umnak inncung ah an tla tiah tualchung mi nih cun an chim.

“Nihin zinglei ah SAC kuttang um nu ralkap hna cu Parachute zuan an cawn lioah cheukhat cu an vanlawng he inncung ah an tla, an nundam le dam lo cu kan thei lo, mizaw phur motor in an kalpi hna” tiah cu thil a cannak sangchung ah ummi pakhat nih a chim.

Hmawbi vanlawng umnak sakhan in Parachute zuan a cawngmi nu ralkap an tlaknak kong ah thil sining fiang tein theih a si lo nain, an tlaknak kong cu a dikmi a si ko tiah SAC ralkap he naihniam in ummi pakhat nih fehternak he a chim. Ayeyarwaddy _ Times The Chin Post