Ming Aung Hlang Lampi Apit.

EAOs Tlangcung hriamtlai phu hna bu pakhat ah ai awhtu minung 2 cio rak i tlah ulaw keimah pumpak in kan ton hna lai i atakin remdainak kan ser lai, ‘tiah MAH nih EAOs a sawm hna. MAH nih atutan ‘biafang’ ahman mi hi phundang ngai asi. Cucu keimah pumpak in kan ton hna lai i atakin remdainak kan ser lai timi ‘biafang’ hi asi. Cuhlan NCA ahkhan hibantuk ‘biafang hi ahman balloh.

Cuhlan NCA lio ahkhan MAH nih tlangcung hriamtlai phu hi pumpak  cio in a ton bal hna lo. Meeting tu ah arak chuak i a duhmi bia achim i  ‘Meheh lu’ kha nan tar le ‘Uico sa’ nan zuar a ti salam hna i a chuak than ton. MAH nih zei akanrel lo ning hi Federal ‘biafang’ hman hmanh kha arak duh lo. Ka chim duhmi cu;  MAH nih atakin remdainak kan ser lai.  A rami phu paoh keimah pumpak in kan ton hna lai a timi nihhin cuhlan dirhmun he tahchun ahcun alungthin hnar cheu atla cang ti hi afiang  ngaingai.

MAH nihhin PPST hna hmang in, Inn chung lut aitmh. Abikin PPST ah lutlai asimi RCSS Chairman Yawd Serk kha a kawmh. Cucaah kan hnulei ah RCSS le SSA an ikap lio ahkhan MAH nih aralkap kha RCSS a vabawmhter hna nak  kha asi. Kan hnu lei ahkhan Yawd Serk nih achimmi ‘bia’ cu NGU pawl PDF hna hi tha tein nan control khawh hna lo ahcun ‘da niah’ ah an ichuah lai a ti. Hi bia nihhin Yawd Serk nih MAH zeitluk in dah adir pi tikha hmuh khawh asi.

MAH le Yawd Serk an ibawmh i SSA an va tuk hna i zohchia ngai in an sungh. Nizan tih ni ahkhan Yawd Serk ralkap RCSS minung 300 nih SSA ah an ifonh. RCSS le MAH hi an ibawmh nain, eibar an chuak lo tikah hmai an fong kho tilo. Cucaah RCSS nih PPST kha hnu an chit tak. Ka chim duhmi cu; MAH nih RCSS hmang in PPST in ‘innkaa’ onh aitimh mi kha atlam atling tilo.

Atulio PPST chungtel hna kan zoh hna tikah zei rua ram lo.’mah tein a dir kho lomi lawngte an si hna. Atulio PPST an hruaitu Khun OKker khi kut dong in relkhim mi ralkap lawng a neih hna. ALP khi ralkap nak in hruaitu an tam deuh tiah an capo mi hna an si, ABSDF zong khi amah tein ‘rawl’ ai kawl kho lomi dirhmun an si ve. Hibantuk dirhmun fek a neih lomi lawngte nihhin atutan MAH sawmnak hi an kai teh lai. Cucaah atutan MAH nih kawhmi meeting hi namtong in tupi ‘lo’ vat ah ithawh bantuk khi an lawh teh lai.

MAH nih aitimh mi cu; EAOs he remdainak ser in PDF tuk kha asi. Hi thencheunak policy hi atlam atling tilo caah alungthin hnarcheu atlak nak hi asi. Cucaah ra uh keimah pumpak nih kan ton hna lai i atakin remdainak kan ser lai,’timi ‘biafang’ ahmannak hi asi.  Hi biafang ahman mi nih hin alungthin hnarcheu atla cang tikha  fiang ngai in hmuh khawh asi.By-Van Neih Thang

Be the first to comment

Leave a Reply

Your email address will not be published.


*