Maw ka thin A poi tuk ee.SAC Ralkap Nih Tayetpinwun Khua An Khangh Caah Inn 50 Leng A Ciam, Khuami An Suingun Chawva An Firpiak Hna

Maw ka thin A poi tuk ee.SAC Ralkap Nih Tayetpinwun Khua An Khangh Caah Inn 50 Leng A Ciam, Khuami An Suingun Chawva An Firpiak Hna

Sagaing ramṭhen, Shwebo peng Tayetpinwun khua cu SAC ralkap nih an khangh i inn 50 leng a ciamh pin ah khuami an suigun le chawva zong an firpiak dih hna, tiah theih a si.

SAC ralkap 200 hrawng nih rallam hmun 3 in Shwebo peng Tayetpinwun khua ah an sial i, January ni 31 zing sml 7:45AM ah Tayetpinwun khua cu an khangh. Febuary ni 1 tiang ah inn 54 a ciam, tiah Shwebo Local PDF in ṭuanvo ngeitu pakhat nih a chim.

“Tayetpinwun khua lei kalnak lam zulh loin khuami an lei hmun in rallam hmun thum in an sial i khua cu an khangh. Cu pinah khuami an sui, ngun le thilri mansung vialte zong an firpiak dih hna. Febuary ni 1 ah hmunhma thianhhlimhnak kan tuah i innkang mei zong a mit rih lo,” tiah a chim chap.

SAC ralkap cu Shwebo LPDF nih an kah hna caah hliamhma pumi an tam i sianginn chungah an i thlop hnu ah sianginn zong an khangh chih, tiah Shwebo Local PDF nih an langhter.The Chin Post

Thawngpang Dang relchap: Htantapin, Phyu Le Pakokko Peng Ah Pyusawhti Pathum Le Khuabawi Pakhat Thah An Tong
Bago ramṭhen, Htantapin peng ah Pyusawhti hruaitu “Myint Thein” cu Febuary ni 2, zanlei sml 4:10PM ah “Nan Hteik Aung” min in Htantapin peng Pah Kah Phah nih an fimhlawm, tiah theih a si.

“Anih hi SAC ralkap he i bawm in rian a ṭuanmi a si. Innhmun 100 a ngeimi pa a si i SAC ralkap sakhan kam ah a ummi a si,” tiah Bago Region PDF in ṭuanvo ngeitu nih a chim.

Cu pin ah Phyu peng Myabago khua SAC kuttang rianṭuantu khuabawi Ngunt Win cu Febuary 1, zanlei sml 3:00PM hrawng ah kahthah a tong, tiah theih a si.

Khuabawi Ngunt Win cu SAC ralkap he i bawm in khuami hna cu an hro an cer hna. PDF an cawlcangh ning vialte zong ngiatthlainak a tuah i, SAC ralkap sin ah thawng a pek lengmang hna caah Phyu Pah Kah Phah nih kan fimhlawmnak a si, tiah an langhter.

Cu ṭhiamṭhiam in Febuary ni 1, zanlei sml 6:00PM hrawng ah Pakokko, Kyinwai in a kirmi Pyusawhti pawl cu Myaing Pah Kah Phah Battalion 1 nih chekhlatnak tuah ding in an dirter hna i an dir duh lo caah an kah hna, Pyusawhti 2 an thi, 3 hliamhma an pu, tiah theih a si.

Hliamhma pumi ah Myaing peng Electric zungukbawi pakhat zong aa tel i, anih hi tangka in lente aa celhmi a si i a sungh caan ah khuami hna cu mei man a khawlh tawn hna. Atu zong lentecelhnak hmun in a ṭin cang tiin thawng kan theih caah aa citmi motor cu kan kah i Pyusawhti 2 an thi, Electric zungukbawi pakhat le Pyusawhti 2 hliamhma an pu, tiah Myaing Pah Kah Phah Battalion 1 nih cathanh an chuah.The Chin Post