Maw ka thin a poi tuk e.Indaw Ah CDM Sayamah 3 Telh In Minung 19 Tlaih An Tong
Sagaing ramṭhen, Indaw ah PDF bawmhnak nan pek hna tiin March ni 3 in ni 5 tiang, ni thum chung ah CDM sayamah 3 telh in tualchung mi 22 tlaih an tong i cu chung ah minung 3 cu March ni 5 ah an thlah ṭhan hna tiah tualchung mi le PDF chungtel hna nih an chim.
March ni 3 ah tualchung hriamtlai phu chungtel minung 2 SAC ralkap nih an tlaih hna hnu ah, tlaih a tongmi hna he pehtlaihnak a ngei tiah an puhmi hna cu lunghrinh in an tlaih hna tiah Indaw peng PDF chimphuannak nawlngeitu nih nihin March ni 6 ah a chim.
“March ni 3, zinglei ah pahkahphah PDF chungtel 2 tlaih an tong, tlaih a tongmii hna he pehtlaihnak an ngei, bawmhchanhnak an tuah tiah an ruahdamhmi hna minung 22 an tlaih hna, cu chung ah 3 cu an thlah ṭhan hna i 19 an taang” tiah a chim.
Tlaihkhih a tongmi hna chung ah CDM tuahtu sianginn cachim sayamah 3 an i tel. Tlaih a tongmi hna dihlak hi Indaw hrambunh SAC khahmahyiah 186 nih an tlaih hna tiah tualchung mi nih an chim.
SAC rallap hna cu nihin March ni 6, zinglei zong ah khuachung hmunkip ah leilawng in an i chawk i ngiatthlainak fak piin an tuah tiah Indaw khuachung ummi pakhat nih a chim.
March ni 3 lioah Indaw khualai lamtonnak hmun ah ralvennak a tuahtu SAC ralkap zulhmi leilawng cu PDF phu chungtel 2 nih bomb puahhnawh ding in an i timhtuah lioah ruahlo piin i chuahsualnak a can caah Indaw PDF chungtel 2 an nunnak a rak liam.
Nunnak liammi mipi ralkap 2 ruak va zoh ding in a kalmi PDF chungtel 2 cu March ni 3 ah SAC ralkap nih an rak tlaih ve hna.
Cu hnu ah March ni 4 in March 5 tiang, ni hnih chung ah CDM tuahtu sayamah le khuachung mirum deuh cu an tlaih hna tiah tualchung ummi nih an chim.
Ramkhel lei thongtla bawmhnak a tuahtu AAPP nih March ni 3 ah a langhter ning ah SAC ralkap nih uknak an laak kum hnih luan chung ah ram pumpi huap in tualchung mi 16,120 tlaih an tong, cu chung ah Sagaing ramṭhen in 2,112 an i tel tiah a langhter.The Chin Post
Leave a Reply