MAW DAWTNAK

‘’ Min Aung Hlaing le Zaw Me Lung nih ram le miphun kan dawt ko an timi khi Aung San Suu Kyi nih a uico a dawtmi hmanh a tluk lo’’.

Aung San Suu Kyi thong a tlak lai ah a uico a kal taak timi cu Media ah kan rel dih cio. Zei ruangah dah a kal taak timi bel an ṭial chih lo caah kan thei cio ve lo. Asinain, ruahdamh khawh pah cu a si ko rua tiah ka ruah.

Mah a uico kha ‘’Tachido’’ an ti maw kha, a fapa hniang ‘’Kim’’ nih a peekmi a si an ti i, a dawt zong a dawt ngai an ti. Uico cu zeitluk in va daw ko hmanh sehlaw, saram a si ko cu mu. Minung dawt he aa lo bal lai lo cu.

A mah Aung San Suu Kyi hmanh Min Aung Hlaing le Zaw Me Lung nih fir a phunphun an puh ngam ko i, tazaa zong an cuai ngam fawn ko i, thong hmanh an thlak ngam rih ko lioah a dawt tukmi a uico te kha saram hmanh si ko sehlaw, thong tlak ve a sianh lo tuk bia a si ko lai timi hi a kal taaknak a ruang a tampimi chungah pakhat in aa tel ve hrimhrim lai.

A uico lawng hlah, Aung San Suu Kyi nih hi bantuk dawtnak a ngeih hi a nunning ah hmuh khawh tukmi a si. Min Aung Hlaing le Zaw Me Lung nih an ngeihmi dawtnak belte khi pulpit cung dawtnak a si ve.crd-Perhkalh Thawng