Matupi Peng Ni 6 Chung Ah Kahdohnak Voi 15 A Chuak, SAC Ralkap 40 An Thi

Matupi Peng Ni 6 Chung Ah Kahdohnak Voi 15 A Chuak, SAC Ralkap 40 An Thi. Chin ramkulh, Matupi peng chung ah SAC ralkap le Chin hriamtlai phu kar February thla ni 6 chung ah kahdohnak voi 15 a chuak. Cu kahdohnak ah cun SAC ralkap 40 an thi, 20 leng nih hliamhma an tuar tiah CDF-Zotung nih cathanh an chuah.

Cathanh an chuahmi chung ah cun 2023, February thla chung Chin ramkulh Zotung hmunhma ah rallam sialtu SAC ralkap minung thazaang 150 hrawng le Chinland Defence Force -Zotung, Chinland Defence Force – Zophei, Chinland Defence Force – Lautu, Chinland Defence Force – Mara, Chinland Defence Force – Senthang le CNA kar ni 6 chung ah fak ngaiin kahdohnak voi 15 a chuak. Kaphnih kar i kahdohnak ah SAC ralkap 40 nak tam an thi i minung 20 leng nih hliamhma an tuar. Chinland Defence Force -Zotung chungtel 2 le CNA 1 tiin minung 3 nih ram le miphun ca ah an nunnak an pek.

Ram le miphun ca ah nunnak a liammi mipi ralkap 3 hna nih an taantakmi chungkhar hna nan ngaihchiatnak kan in hrawmpi hna. Nunnak liammi mipi ralkap a sang bik upatnak kan in pek hna tiah Chinland Defence Force – Zotung nih cathanh an chuah.The Chin Post

Yesagyo Peng Siangsangrun Ah Umhmun Khuarmi SAC Ralkap PDF Nih An Kahdoh Hna, 2 An Thi.Magway ramṭhen, Yesagyo peng siangsangrun ah umhmun khuarmi SAC ralkap hna cu PDF phufonh nih February ni 12, deilei suimilam 2:00AM hrawng ah an kahdoh hna. Cu kahdohnak ah cun SAC ralkap lei a thimi an um tiah theih a si.

Sinmaye(ဆင်မရဲ) khua siangsangrun ah umhmun khuarmi SAC ralkap minung thazaang 70 hrawng cu PDF phufonh nih an kahdoh hna tiah Myingyan Black Tiger phu nih an chim.

“Cu SAC ralkap hna nih cun tualchung mi hna an umnak inn an khanghpiak hna, an thah hna, an thahmi hna chung ah a tam deuh hi NLD party chungtel an si tiah nitin in thawng an kan thanh caah zaanṭim ah kal hnawh in kan ngeihtawk kuanfang i put in kan va kahdoh hna. Mipi zong nih SAC ralkap hi ṭih hna hlah uh, kan hmunhma chung nan um poh ah cun kan nunnak pek tiang in kan in runven hna lai” tiah Myingyan Black Tiger hruaitu Bu Maik Khe nih a chim.

SAC ralkap hna cu Myingyan Black Tiger (MBT) le ṭangṭi tualchung hriamtlai phu 6 fonh nih an kahdoh hna tiah theih a si.
Ayeyarwaddy Times