Malaysia Thimnak: Party 4 chung in hodah Prime Minister chuak te kho

Cozah term kum khat deng aa duh rih nain kan hnu October 10 ah Malaysia Parliament cu dihter asi. Cu an dihter thok in ni 60 chung ah thimnak tuah ding asi bantukin November 19 (Saturday) cu thimnak ni ah fehter asi.

Kum 2018 hnu in Malaysia ramkhel boruak aa theng ngai. Kum 4 (2018 – 2022) chung ah Prime Minister pathum an i theng.

Tutan thimnak ah aa dang ngaimi pakhat cu Prime Minister hlun pathum (2018 – 2022 karlak a tuan ciomi) Party dang cio in zuamnak ah an dir. 2018 thimnak lio ahcun Pu Najib hruaimi BN (UMNO party) tei khawhnak ding ah party dang vialte an i fon i Pakatan Harapan (Alliance of Hope) timi Party in an rak dir. Kum 50 reng lo Cozah a tlai pengmi UMNO party pi cu an rak thlak khawh taktak hna PH party lutlai asimi Pu Mahathir zong Prime Minister a tuan than. Tu tan thimnak ah ho party dah a thawng lai i Prime Minister zong asi lai timi ruah chung khawh pah asi.

1. Anwar Ibrahim (PH Party)
Tu kum thimnak ah mipi nih an uar ngaimi cu PH party hi an si. PH party hi 2018 thimnak lio ah teinak le Cozah tlai zong an rak si ko nain kum 2 hnu ah an i rawk. Pu Anwar hi Party lutlai (Chairman) asi caah teinak an hmuh ahcun Prime Minister si ding cu a fiang ko. Amah belte 2018 lio bantuk PH cu an si ti lo. A rak i fonhmi party cheukhat cu a dang in an dir than. Nain Anwar hi mipi an uar ngai caah teinak zong hmu kho an si.

2. Ismail Sabri (BN or UMNO Party)Ismail Sabri hi 2021 -22 karlak Prime Minister asi. BN (UMNO) party Vice President zong asi. Anmah party lutlai lei deuh pawl hih BN party nih teinak an hmuh ahcun Ismail hi Prime Minister a si than lai tiah an chim pah theo nain Party President asimi Zahid nih a tuan lai tiah ruatmi zong an um.

3. Zahid (BN or UMNO party) Zahid hi a tu lio BN le UMNO party lutlai (President) asi caah hi party nih teinak an hmuh ahcun mah nih Prime Minister a tuan lai tiah an zumh. Nain a mah hi eihmuarnak ruangah tazacuai le biaceihnak an tuah lio asi. Cozah term a dih hlan Parliament hrawh i thimnak tuah ding ah Prime Minister a tuna liomi Ismail zong forh lengmangtu hi Zahid asi caah a mah nih Prime Minister tuan a duh caah asi tiah an zumh ngai.

4. Muhyddin (PN party) Pu Mudyddin hi (2020 – 2021) karlak Prime Minister a tuan vemi asi. 2018 thimnak lio ah tangti PH (Pakatan Harapan) party ah a rak i fonh vemi an si nain tu kum thimnak ahcun a dang tein an dir ve than. A mah nih a rak dirhmi Bersatu Party le a dang fonh in Perikatan Nasional (PN) Party in an dir. Hi party nih teinak an hmuh ahun Prime Minister tuan ding a fiang cia.

5. Mahathir (GTA party) Pu Mahathir hi kum 97 asi cang ko nain ramkhel rian hi a chuah taak kho ve bak lo. Teinak kan hmuh ahcun Prime Minister ka tuan kho rih ko lai tiah a chim. 2018 thimnak ah PH party nih teinak an rak hmuh lio ah Prime Minister a tuan (2018 -2020 tiang). Tu kum thimnak ahcun a mah dirhmi Perjuang Party le a dang party pawl fonh in Gerakan Tanah Air (GTA) timi phufonh in a dang tein an dir ve hoi cang. An party nih teinak an hmuh ahcun Prime Minister zong tuan than rih dawh.Kei ka saduhthah cu Anwar te party nih teinak hmu hna seh tiah.Crd.Ceumi Lian

Be the first to comment

Leave a Reply

Your email address will not be published.


*