Malaysia Thangpang chia ngai .Ralring ngai a hau.Malaysia ramchung dihlak Polik lamkham (lam block) a um lai

Malaysa Police (Bukit Aman) nih ramchung dihlak abiapit deuhnak hmunhma hna ah November 22 thok in lamkham (lam block) nikhat ah suimilam 24 chung kan tuah lai tiah thawng an thanh.

Hi kan tuah duhnak aruang cu mipi humhimnal le siaremnak caah asi. Cucaah mipi lei zong nih kan theithiam uh cun hi kan tuah ruangah lau ding le thinphan ding asi lo tiah Polik bawizik  (Inspector General of Police) nih a chim.

Ramdangmi le ralzaam zeihmanh neilomi ca-ah cun ralrin ngai kan hau. Zaan 8 PM – 6 AM karlak hrimhrim ahcun kal um ralrin deuh a herh.Crd-Ceumi lian Cherhchan: the Star (23/11/2022)

Ruah ning bantuk, ruah lo ning bantuk asimi Malaysia thimnak phichuak.Malaysia Parliament thutdan dihlak 222 chung ah a tlawmbik thutdan 112 laak khawh lawng ah Cozah ser khawh le tlaih khawh asi bantukin tutan thimnak ah ruahning bantuk ruahloning bantukin thil a chuak taktak.

Abiapibik tangti party ngan pawl asimi Pu Anwar hruaimi Pakatan Harapan (PH) nih thutdan 82,  Pu Zahid hruaimi Barisan Nasional (BN) nih thutdan 30, Pu Muhyddin hruaimi Perikatan Nasional (PN) nih thutdan  73, GPS party nih thutdan 22 le a dang party nih 13 an hmuh hna.

Tutan ah khuaruahhar ngai pakhat asimi cu Pu Mahathir (kum 97) hi asi. Kum 50 reng lo a pennak le zuamcawhtu nei loin buan a co tawnnak Langkawi ah kengpuak in an huai ve ruangmang cang. A chan aa lim ruangmang tinak asi.

Cun a ho teitu party dang sin hmanh ah cini le cawhnuk bu i put in va len kai haulo bak in kum 50 renglo Cozah buanco asi pengmi Pu Zahid (Pu Najib chawngtu pa) hruiami BN (UMNO party) zong an i ruah ning in thil a kal naisai lo ve lo. Tu kum cu voikhat lio Hakha i CND paih zuamnak lio i Rung Lian Ceu nih pakhat pa favai vamh in a vamhmi bantuk bak khan PH le PN nih an vamh ve hna. 2018 lio nak in an sungh daan a faak deuh.

Nain BN pawl hi Hakha patawng tleicia Pu Sui Cung kha an lo. A rak thawngcia hraat cu humhaam an nei. Tu tan zong ah an mah sawm lo ngai cun a hohmanh Chandaih hmai ah a kal ngam ding an um lo.

Zeikhom si ah a tu ning te cun Pu Muhyddin hi Prime Minister tuan than dawh asi. Aruang cu BN (thutdan 30) le GPS (thutdan 22) kha va roih khawh dawh asi. An mah comi thutdan 73 he fonh ah 112 leng an si hnga i Cozah an ser khawh. Pu Muhyddin hi tutan thimnak ahcun a hlawhtling ngai. Aruang asi kho pah dingmi cu thim lai te ahkhan PH (a sen)  pawl hi Jews pawl le Khrihfa pawl nih an dirpi caah Malaysia hi Krihfa ram ah canter an duh tiah a chim. Cutikah cheukhat an rammi Muslim pawl cacun ruahnak phundangpi a chuahter khawh.

Zei va si poh ah Pu Anwar hruaimi (PH) hi zaangfaak ngai an si. Zapi uarbikmi Popular vote ahcun a tambik an si nain thudan tling an hmu kho lo. Hawi sawm hau in an um. Pu Zahid bu (BN) va sawm ti-ah le Meheh le Uico bantuk an si. Pu Din bu (PN) ti-ah le Tii le Mei bantuk asi fawn.  A dang ti-ah le an tling deuh hoi lo. Nain Pu Anwar (PH) ca-ah ruahchannak a um rihmi cu 2018 -22 karlak bantuk an si ahcun Cozah caan kum 5 (2022-27) karlak ah Cozah tlai le Hruaitu (Prime Minister) i thlen than lengmang khawh an si. Party komh (fonh) i Cozah ser cu lungtlin lonak um sual ahcun rawh than asi tawn. 2018-22 (kum 4) chung ah Prime Minister pathum an i thleng ko cu mu.

Umm zei Cozah le Hruaitu an va chuah zong ah ralzaam cungah dawtnak le zawnruahnak an naih ahcun lawmh ding si ko hnga.Crd-Ceumi Lian

Be the first to comment

Leave a Reply

Your email address will not be published.


*