Mah Thantlang kanghnak hla, Ttial Uk nih a phuahmi nihhin ka thinlung a ka khoih bik,

Mah Thantlang kanghnak hla, Ttial Uk nih a phuahmi nihhin ka thinlung a ka khoih bik, hladang zong a tampi ko nan. Thantlang ah inn le lo ka nei lo nan TT cu ka khua bantuk in ka tlaihchan ve i ka dawt. Aruang cu sianginn kan rak kainak le kan tlonlennak le saupi pi kan umnak khua a si.

Kum 1988-89-90 lio i sianginn kan rak kai lio hrim kha philh a har ko lai. Thinlung ah a cam tuk. Khuapi nun ka teh hmaisa biknak khua zong a si fawn. Khuate inn 80 khua hna in Thantlang i sianginn kan van kai i kan um ahcun a khuapi tuk le a nuamtuk in kan rak theih.

Minung hrim an tamtuk in kan rak thei. Kum 1989 lio i No. 1 High School i taang 5 kan rak kaipi pawl zong kha Thantlang ahcun a dawh bik le a lar bik an rak si ko hna. An min zong kan chingchiahmi an tor rih a hlan ngai cang nan. Thantlang khua hi a hnubik ka pal cu kum 2005 a si rua ka ti, ka chingchiah ti lo. Ka pal ti lo hnu ah Thantlang ah innlo tthattha an karh.

A kangh ka hmuh hnu lawng in innlo tthattha an karh zong ka fiang. Thantlang a kangh cu lung a fak i atu tiang hi a tak a si rua lo tiphun in ka ruah peng rih ko. Thantlang kangh hi Pathian dantatnak a si ka tinak si lo nan Thantlang lei minung hi kan ziaza le kan lungput cu kan i sersiam bak a hau ko tiah ka ruahmi a um. Tuanpi tein ka rak ruah cangmi zong a si.

A der deuhmi le santlai lo deuhmi le a sifak deuhmi kha a bu a rual in a tthawng deuhmi pawl nih zomhtaih le serhsat le nehsawh kan hmang tiah ka ruah. Cun kan zer bak fawn. Cheukhat kan zer ning le bang cu tthat lo lei deuh in kan zer fawn. Mirum le bawi deuh an i uah bak i midang kha nauta tuk in hmuh an hmang. Kan biachim kan holhrel hrim a tum a tlang tuk a puam tuk. Mizei rel lonak lungthin kan neihmi a ngan tuk. A dang zong a um len rih ko lai.

Cucaahcun Thantlang khua chung khuasa le ramleng khuasa vialte kan thinlung put le kan ziaza le kan ruahnak cu tampi kan i sersiam a hau ko tiah ka hmuh. Mah ka ruahnak hi a luancia kum  20 lio hrawng in a si cang. Mah ti ka chim tik ah Thantlang khuami nih cun a duh lo le a pom kho lo nan tor ko lai. Asinan mah zonghi keimah hmuhnak le ruahnak a si ve ko.Crd-Van Tum https://m.youtube.com/watch?v=i1_-3__z3NM&feature=share#dialog

Be the first to comment

Leave a Reply

Your email address will not be published.


*