Lang Ak le Putar ( Magician )

Lang Ak le Putar ( Magician )
(Tuchun ka dam pahlo i pumhlo in Inn ah ka um , umhar phen ah atanglei tuanbia te hi ka vun tial , arel huammi caa ah)

Voikhat cu Putar pa khual atlawng , laam pi ah rirang kung nai dem tang ah adin. Cu aa dinh lio ah cun Riraang kung in, Lang Ak vate, ngaihchia ngai in atap mi ahmuh. a mithli cu Putarpa lu ah atla. Zeiruang ah dah na tah i na ngeih achiat ko tiah Putar pa nih cun ahal. Lang Ak nihcun ” ka sining hi ka ruah lengmang tik ah ka lungtling lo? va vial te lak ah vanchia bik ka si ko, thah awk men ah an ka duh, aho hmanh nih uarmi le duhmi ka si lo, ee tiah lungrawk ngai in ati.

Putar pa cu LangAk a ngaihchiat ahmuh tik ah azangfak tuk i bia ahal, ” Cutluk na ngeih chiat le na lungfak cu zei tin dah kan bawmh lai, na duhmi cu vun chim tuah tiah ati. Camh-thiam- Magician ka si caah na duhmi cu kan tuah piak khawh men ko dakaw tiah avun ti. Lang Ak cu aa lawm tuk i, ” keimah hi Vanzuang( Parrot) bantuk si ka duh ko e tiah ahal , zeicaah tiah Van zuang khi ka zoh lengmang tik ah aadawh tuk i, anuamtuk fawn tiah avun ti. Ok asiahcun Vanzuang si na duh tuk caah na duhmi kan tuah piak hlan ah , Vanzuang sin ah vakal law asining dihlak va hlat hmasa tiah afial.

Vanzuang sin ah cun ava kal i, nangmah bantuk si hi ka duh ve , keimah bantuk in na nakk lo, nangcu na dawhtuk i, minung zong nih zoh an in duh tuk mi na si tiah avun ti, Vanzuang nih alehmi cu ” Keimah cu ka dawh nem mam lo, minung nih an ka tlaih i bawm ah an ka hren hi na hmuh lo maw ? keimah nak in adawh deuh mi va pakhat aum, Awtaw ( Peacock) sin va kal ati. Awtaw cu a kawl i, Saram zuatnak ( Zoo) ah a va hmuh.

Awtaw sin aphak ahcun mitampi nih an rak kulh i an zoh kha ahmuh. Awtaw cu bia ahal, nangmah hi na dawh bik ko tiah an in ti, vawlei cung va vialte lak ah aa dawh bik le avan ttha bik asi ko lai an in ti, Cucaah nangmah bantuk si ka duh ve tiah ati. Awtaw nih aleh mi cu ” Kaa dawh ruang ah hin pei harnak tampi ka tawn cu, ka duhmi rawl le ka duhnak hmun hmanh kal kho lo in saram zuatnak kawm chung ah an ka hren hi na hmu lo maw? ka hmul hi lutonh tamp nak ah an phoi lengmang i afah ka celh lo , keimah nak in nangmah pei na nuam deuh cu tiah aleh.

Lang Ak nih cun ” Asi ahcun vawlei cung ah hin zei bantuk vaa phun khi dah anuam bik le attha bik asi kun hnga ? ruahnak ka pe tuah tiah ahal, Awtaw nih alehmi cu ”

Hi saram zuatnak-Zoo ah hin va phun kip kan tling dih. nangmah bantuk LangAk hi pakhat hmanh nan umlo i, tlaih le hren mi nan um lo, nan van attha tuk, nan duh nak hmun ah nan zuang kho i zalong ten aum kho mi cu Lang Ak lawng hi nan si ee ati.

Lang Ak nih cu-bia atheih tik ah lomhnak in akhat i, vawlei ah vanchia bik tiah ka ruah mi kha rak si tunglo, van ttha bik tu pei ka rak si hi ti kha avun i fiang. Putar pa sin ahcun ava kir tthan i , Ka Pu ” Kan halmi vial te kha ka pe hlah, ka sining te hi ka duh ko ee tiah ati.

Biapeh ” Vawlei ah hin , minung nih kan tonmi lungretheihnak hi LangAk tuanbia bantuk hi tampi aum. Kan mah sining le midang sining cuaithlai tuk kan hman ruang, mah le mah lungtling lo in kan um tawn. Mah le sining cio ah harnak le buainak angeimi lawng te kan si hna, duh atling mi aho hmanh kan um lai lo. Nahchuahnak le hakkauhnak faktuk angei mi nih duhdim nuamh-lomhnak an hmu kho lo.

Kan mahnak in , asang deuh le niam deuh , afim deuh an um bang, ahrut deuh an um ve , aa dawh deuh an um bang, muichia deuh an um ve lai, arum deuh um bang, asifak deuh an um lai,, cucu vawlei ah aum zungzal ding asi caah kan mah le kan sining tawk ah lung atling mi( aherhlo ah) midang nun a uaar- a hngar tuk mi kan sinak hnga lo hi tuanbia tawi nih ruahnak kan pe cio seh. Reltu nan dihlak cung ah kalawm….Crd-Ral Eng Khenglawt