Lam lai Lungpi

Nizan (22/8/24) cu, Sangau in Farkawn lei tlawn kan i thawh. Cherhlun in KM 2 tluk kan phak ah lamchak vawlei min nih lam a kan kham. Lam lai ah, leivawr nih a rak khuhmi lungpi a rak i thup i a ngantuk caah JCB zong nih an thial kho lo. Cucaah kan khual lam peh kho ti lo in zan 6:48 in Sangau lei ah kan kir than ve.

Babel innsang saknak kong (Gen.11:19) kha ka lung ah a chuak. Thang chuah duhnak, phorhlawt ruankainak lungthin he inn an sak ti tik ah a donghnak ahcun an bia an i theih piak kho ti lo, khua an khang ti kho ti lo, an tuan ti kho ti lo i, an hlawh a tlin lo pin ah i thenthek dih in an um ti kha kan hmuh.

Nifatin, minung hawi he nunnak khuallam kan zawh ti lio ahhin, hmuh khawh lo mi kan lungthin chungah, thial khawh lomi lungput tha lo KEIMAH tinak a um sual ahcun, Babel inn sang sami bantuk si a fawite ko.

Thial khawh lo mi dawtnak, dinnak le zumhnak lungput nih cun a rawkmi hmanh kha a remh. Sinain, thial khawh lo mi phorhlawt ruamkainak, mah zawn lawng i ruahnak, mah siaremnak lawng kawlnak, mah ruah ning lawng a tha bik i ruahnak, langhsar duh le hmuh ruah lawng i thil tinak, ka fimthiam bik ti i ruahnak, thutdan i cuhnak tibantuk lungput cu hnu kirtertu, thiotu le thektu, sungh zatlaknak le thisen tiang a luantertu lungput tha lo lungpi an si hna.

Phungthluk bia 6:16-19
Pathian nih a huatmi 6, a fihmi 7 an um: phorhlawtnak mit, a sual lo mi thisen chuahtu kut, thatlonak khua a khangtu lungthin, thatlonak lei i kulrang in a tlimi ke, lih a chim lengmang mi tette, u le nau karlak i rem lonak thlaici a tuhtu.

A hakmi lung a kuaiter khotu, a nemter khotu cu kan Bawipa Pathian a si. Lam khamtu lungpi si lo ding in Bawipa nih kan ser than zungzal cio ko set.
Salm51:10; Ezekiel 18:31,36:26.Crd-Neely Lianuk

Be the first to comment

Leave a Reply

Your email address will not be published.


*