Laiphung ah a hrut nih fimchim an timi kha

1.Micheu nihcun, na minung sinak in an in zoh lai i, thilttha na tuah zongah an in fak  lailo pinah, na tuahmi thilttha ah an chia  hlei lailo,thei cia.Keimah zong nih cucu ka theih cia.

2.Thilttha tuk ah na ruahmi cu,  nangmah nih chim loin, Midang, mirum asi lo-ah an upatmi chim ter deuh. Keimah bang Minauta na si ahcun, an in pompi hlei lai lo. A chimtu in an in zoh lai. Thei cia.Cucu ka theih cia.

3..Pathian Ram, Miphun le Mipi caah a ttha lai tiah na ruahmi cu, Minung zoh loin aupi thluahmah ko.Na dam lioah na chim I na aupi lo ahcun, na ngaichih te lai. Pathian hmai na tlun tik ah, na ngaichih khun lai..Cuticun ka tuak.Crd-Liante Lai

Pathian Biakinn Daihthlanh Awk A Si Lai Lo!Nehemiah 10: 39 b “…Kannih nih kan Pathian inn cu kan daihthlanh awk a si lai lo,” an ti.

Nehemiah nih Babylon in a kirpi hna i Jerusalem kulhnak vamping an remhnak kong,  biakinn an remhnak kong, tlangbawi hna le mizapi nih Pathian sin ah biakamnak an tuahnak kong kha kan rel. A donghnak te ah an kilhnak catlang cu tuzing ah ka relmi hi a si. “Kannih nih kan Pathian inn cu kan daihthlanh awk a si lai lo, ti hi a si.

An Biakam mi hi a dihlak cun a sau lai. Pathain sal Moses sinah pekmi Pathian phungbia kha zulh awk le Bawipa kan bawipa nawlbia vialte le phunglam hnale a bia hna kha ulh awk le tuah awk ah chiat an serh i biakamnak an tuah. An miphun kilvennak, biaknak fehternak le upatnak, Pathian biakinn ah rianttuan tu hna nih raithawinak ding a herhmi le an i cawmnak caah a herhmi zong thawh ding in bia an i kam.

Ram uknak lei riantuantu nih an ngeihmi hriam tlai phu nih ram a himnak le ram daihnak cu zeimaw zat an tuah khawh. Uknak le hruainak in fim cawnnak zong hi a um kho ve. Ngandamnak lei zong a um kho ve. Uknak lei vawlei lei hruainak nih a tuah khawhmi tampi hi a um hrimhrim.

Uknak lei nih a tuah khawh ve lo mi a um. Miphun thianhlimnak, Kawl ram ah upadi in, Thitum nak lei Phung, Monogamy law an ser kha theih a si. Biaknak zong ah Upadi sermi kilven an timh kha theihmi a si. Sihmanhsehlaw a tuahtu hna lila nih an chim mi kha “Saveh rap kan chaih le kan mah kan i awh” an rak tibal kha! Hi phung in taza aa cuai mi bia a si.

Hibantuk pawl hi cu nunphung le Biaknak nih a kilven khawhmi a si. Kan nunphung chung ah a ummi miphun lungput fek kan ngeih ahcun zeimaw zat cu a zia lai. A dihlak cu a khamh kho hlei lai lo. Mithi Rev. C. Hniar Kio nih a rak ttialmi Thihnak nih a kan tthen tiang in, timi cauk ah “Kan phun a dang lo, kan phung aa dang” ti mi cathluan bantuk hna kha ttha tein nihin ah rel tthan le theih a herh ngai.

Kan biaknak zong hi cawh awk a ttha lomi a si. Biaknak ai khah ko zong hmanh ah kan phung ai dang mi tampi nih fonhawk ah a harngaimi sining a langhter. Hi bantuk hna kan i kilvennak cu Pathian biakinn hi a si ve ko.

Pathian biakinn chung ah kan i cawnpiakmi le chungkhar in kan i tthanpimi lungput nih kan miphun hi zeimaw zat cu a kan kilven lai. Kan Pathian biakinn hi kan daithlanh awk a si lai lo. Isarelmi nih Nehemaih hruainak tang ah biakamnak an tuah tthan le an i cawnpiak bang in kan nih zong nih kan herh ve. biakinn cu khang hna hmanh seh law, kan  Zumhnak le kan  miphun sining cu an khang kho lai lo.Bil Hmung

Be the first to comment

Leave a Reply

Your email address will not be published.


*