Unau pa/nu Bible ca (Pathian Bia) original holh Hebru Holh (Biakam hlun) le Greek Holh (Biakam thar) an tialnakmi thilri hi Cauk/Catlap cungah asi lo dahkaw, ziah Bible Sianginn ah na cawn i cauk phunphun ah na rel bal lo hlah maw? Bible original an tialnakmi cu Moses nih (Lungtlap cungah) a dang Biakam Hlun tialtu Prophet pawl le Biakam Thar tialtu vialte nih Saphaw cungah an tial dih tung.
Atu zongah hmuh na duh ahcun Israel ram Museum le Italy ram Rom khua Museum hna ah na zoh khawh rih ko dahkaw. Ziah hme nangmah duh in Cauk/Catlap cungah tialmi thengmang lawngah Bible Bia hi hmual a ngei i IPad le Phone te pawl cungah tialmi Bible ca( Parthian Bia) hi hmual a ngei lo na ti khawh ee. Khuaruahhar in..
Zeipaoh hi a chan kalning in thlen le tial asi caah Lungtlap in Saphaw ah, cun Saphaw in Cauk/Catlap ah, cun atuchun fim chan, technology chan ah Cauk/Catlap in IPad le Phone cungah Bible Ca (Pathian Bia) cu tial asi i, cu lawng hmanh siloin Zumtu nun ahcun minung nih hmuh khawhmi thilri pawl cung lawng hmanh ah si ti loin Minung kan Thinlung chungah Thiang Thlarau nih Pathian NawlBia cu hlan i Lungtlap cung lawngah rak tialmi cu atu ahcun a tial cang (2Kor. 3:3-4; Heb.10:16; Jer..31:33; Eze.36:26).
Cucaah, na Lairuahnak le thluakin Cauk/Catlap cungah tial lomi Bible ca cu hmual angei lo na ti lengmangmi hi nangmah ruahnak sawsawh lawng dahkaw asi. Bible ca (Pathian Biatak) cu khuazeika hmun le thilri ah an tial zongah asullam le ahmual ngeihnak kha aa thleng bal lo.
Nangmah naa ziakmi le na duh tukmi Cauk/Catlap cungah aa tial pek, cun na hman thiam tuk lomi le naa ziak tuk lomi iPad le Phone le computer cungah aa tial pek ah Pathian Biatak cu aa thleng bal lo i hmual a ngei peng ko. Cucaah Cauk/Catlap cungah tialmi thengmang lawng kha a hman timi na ruahnak bite he khan midang kha biaceih lengmang duh hna hlah. Thil a hmu kho le cawnnak kau a ngeimi caah cun zangfah ngai ah an in ruah sual lai.
Nangmah tu kha iPad le Phone le Computer cung i aa thialmi Bible ca kha hman thiam i zuam ve. Zeicahtiah iPad ahcun Bible ca pakhat te lawng hmanh si loin voikhat le pakhat te ah awl tein Bible biafang na fian khawhnak caah an bawmtu cauk phun tampi, Bible Dictionary, Encyclopedia, Commentary, Bible study books, Theological books, Original Bible languages,
Devotional books le Academic books pawl tampi Volume million in naa khen khawh lai i na thawngtha chimmi zong kha ca cawng lo pawl le ca rel lo pawl lawng nih i lungjmuih siloin ca cawng le ca rel le cawnnak sang a ngeimi khuaruat kho pawl zong nih an i hlawkpi deuh lai. Lai Bible Cauk or Mirang Cauk/Catlap cung i thialmi lawng kha naa tlaih peng ahcun atu na ziaza na sining bantuk te hin Pathian Biatak kha na tawlh in a pingah na kalpi sual lai.
Bible ca (Pathian Bia) cu zeibantuk thilri cungah aa tial zongah cun a kengtu nih Lungtlap in a ken pek, Saphaw in a ken pek, Cauk/Catlap in a ken pek, iPad le Phone in a ken pek hmual a ngei peng i asullam aa thleng ballomi Biatak asi kha philh lai cih.
Cucaah, unau pa/nu Biatak tu kha buaipi law, mi nunnak a thleng kho lomi thilri ah khan buai duh ti hlah.
Dawtnak le zawnruahnak nganpi he,Na unau pa Robert T. Zam (Laimi)Bawipa thluachuah in pe chin chin seh!
Leave a Reply