Laimi hi ca tampi in kan rel a hau, ca a phun2

Laimi hi ca tampi in kan rel a hau, ca a phun2. Mah lo ahcun thil kan theihmi a tlawmtuk lai caah sualnak le thilthalo kan tuahmi zong sualnak ah kan rel lai lo i upadi he a kalh in le Pathian duh lo ning in rian kan ttuan peng ko lai. Stalker (misual) pawl hlang in midang cungah tthat lonak tuah zong lentecelh bantuk ah kan ruah ko lai, thil kan theihmi a tlawm tuk ahcun. Cucaah cun ca tampi in kan rel a hau. Ca kan relmi a tlawm tuk i kan theihmi a tlawmtuk ahcun rawhralnak le vanchiatnak zong kan tong lengmang ko lai.

Aruang cu kan tuahmi sualnak zong kha sualnak ah kan ruat lai lo, lentecelh bantuk men ah kan ruah ko lai. Mah tik ah Pathian dantatnak le hremnak nih a kan zulh lengmang ko lai. Ca tampi kan rel i thil tampi kan theih ahcun stalker/stalking hna hi US cozah nih sual ah a pommi si ti hna kan i fiang lai tik ah kan tuah ngam nemmam lai lo/a hlang zong kan ngamh lai lo. Bible le biaknak lei ca dang hna zong tampi in kan rel ahcun stalking cu Pathian mithmuh zongah sualnak ngan tukmi a si ti kan i fiang lai.Crd-Van Tum

Laimi tamdeuh cu boih (degree) pakhat har lengmang in kan van dih tik ah ka lim cang kan ti i carel ti lo le catuah ti lo ding phun in kan i ruat. Aruang cu carel le catuah kha a har tuk i boih lak hnu cun mah vialte kha ngol bak ve ding tiphun in kan ruah/kan um. Miphun dang cu an si ve lo. Tuluk (China) phungthluk ah a ummi cu “Nihin i boih a lami cu thaizing i ca a rel lo ahcun, kiptuh ahcun ABC bantuk a si ko lai” ti an nei. A hman tuk. PhD kan ngah zongah carel le catuah kan ngol ahcun kan philh dih ko lai kan thiam ciami zong. A philh khomi minung pei kan si cu. Boih kan lak dih hnu ah ca tamdeuh hmanh kan rel awk lehlam ding a si.

Be the first to comment

Leave a Reply

Your email address will not be published.


*