Lai holh in paid reviews ṭial awk ṭha ve sehlaw ka hei duh ning.

Lai holh in paid reviews ṭial awk ṭha ve sehlaw ka hei duh ning. A ngah ṭung lo le ka FB page te ah hin ṭial ve ko ne ning zei ti ṭha heheh!

Review ka ṭial hlan ah mah tuanbia tlawmpal ka van in teh ter ta hna la mu. Mah tuanbia a min cu Jane Eyre ti a si i a ṭial tu hi Charlotte Bronte timi nu a si. Bronte te unau rual hi nu panga an si i caṭial thiam lawng te an si. Mah Jane Eyre tuanbia hi kum-170 reng lo a rau cang nain nihin tiang a duai kho loh! Movie zong in voi-20 reng lo an zeih cang mi a si. Charlotte a nau nu Emily Bronte nih hin Wuthering Heights timi cauk a ṭial ve i nihin tiang an uar tuk mi le University tiang ah an cawn mi cauk a si ve.

Mah vial kha a ṭial tu kong cu va si rih sehlaw, Jane Eyre kong ah ka van kal cang lai. Jane Eyre timi nungak nu te hi a ngakchiat ten a nu le pa nih an thih tak i a nu ṭa nupi sin ah a ṭhang mi a si. A pu nih cun fanu pahnih le pafa pakhat a ngeih ve hna i a thih tak ve hna. A pu fapa nih cun Jane Eyre cu a tuah to tuk, a pamh hmeih tuk nain a pi nih cun ai theih ter bal loh. A pi nih cun Jane Eyre cu a hmu thiam lo tuk caah kum-10 a van tlin in ngakṭah sianginn ah a kuat. Jane Eyre cu sianginn zong ah cun nam neh nak phunkip a tuar ṭhiamṭhiam. Hawi kom ṭha tuk pakhat a ngei nain a hawi nu nih cun a thih tak ṭhan.

Jane Eyre nih a nute cu, zeiruang ah dah mah tluk hin na ka hmuh thiam lo nak a si tiah bia a hal. A nute nih a ti mi cu : Na nu le kan pa hi aa daw tuk mi ṭafar an si. Na nu nih hin na pa hi sifak tuk mi a si buin a vat caah a nu le pa nih an fa in an chuah. Na nu le pa cu pul rai in hnu hmai zul in an thi i na nu a thih lio ah hin kan pa cu ngakchia nuar bang in nguingui thlak in a ṭap.

Keimah hmanh hi thi ning law mah tihkhin a ṭap lai lo. Cun na nu a thih le cang ka in amah nih an lak i sin um pawl hmanh umh ter loin amah nih an chang. Fa pathum kan ngeih tiang hi a fale ho hmanh a pom cawi bal hna lo. Cun a thih lai ah hin a fale hmanh siaherh loin nangmah a sia na herh bik. Jane Eyre hi ka chungchuak fa bantuk in ka van dawt lai tiah na kaa in bia i kam tiah a ka kam ter ta sin um pawl hmai ah. Mah pawl ruang ah hin nangmah hi kan hmuh poh ah ka lung a fak i kan huat nak a si tiah a leh. ( Mah pawl cu Jane Eyre a nungak hnu a nute thih lai ah a hal mi si. Hnu hmai ka van thlen ta )

Jane Eyre cu a hung nungak i cu ka ngakṭah sianginn ah cun sayamah a ṭuan. Kum-2 a ṭuan hnu ah cu ka cun chuah a duh caah news paper hmang in a kong lam cawngia a tuah i rian a kawl. Ngakchia ca chim ding rian cu an van auh i ca chim sayamah ṭuan ding cun aa thawh. A chimh mi ngakchia nute cu Mr. Rochester timi mirum pa i a fanu a si. Inn pek ei cawm in Thornfield Hall timi inn ngan tak tak mi ( estate ) ah cun ca cu a chim. Zaan lai ah hin, tuk a sum tuk mi nih thawng a theih lengmang pin ah hi ka inn hi a huai tiah sin um pawl nih an i ceih thawng a theih tawn.

Cu inn ngei tu pa Mr. Rochester cu khual a tlawng zungzal mi a si i a inn ah cun kumkhat voikhat hrawng lawng a ra tawn. Nihnih thum a um in a kir ṭhan colh peng. Mr. Rochester kong hi ho hmanh nih an thei tuk lo. A ruang cu bia tampi a chim mi a si lo pin ah a secret tuk mi a si. Asinain a sin um pawl cu aa ruang ten a zoh hna i hlawh ṭha tein a pek hna. Mah khan a tuan bia kong cu za rih sehlaw review lei ah ka kal cang lai.

Review: 1983 ta zoh a nuamh khun nak le Timothy Dalton —
Charlotte a ṭial ning ah hin Mr. Rochester hi kum-35 in kum-40 kar minung a si. A mittlang hmul a chah i a sam a nak mi asi. A mit zong a nak i mi a zoh ah mi chunglei a hmu kho rua ti tluk in a mi zoh a pin mi a si. A holh tik ah deep voice a ngei i hlasak zong a thiam mi a si. A khan a sang i a liang dar kau mi a si. Annih chan lio ah cun beauty standard an rak tah dan aa dan caah kha lio chan mi dawh i chiah mi ah cun aa tel lem lo. Khi lio ah cun a sam a rang i a mit a pia mi, a tak vun a nuh mi kha muidawh ah chiah an rak si. Cu pawl cu Apollo tiah an auh hna. Mr. Rochester cu Vulcan tiah auh mi sen-nak ( Ngyio chaw ) phun a si.

Cun Mr. Rochester cu mi thek-vak ṭha a si i rang tum cit a uar mi asi. Rang leng ṭhaṭha a ngei ko nain rang pakhat le a ui co te Pilot timi he khual tlawn a uar mi a si. Bia a chim tik ah a thinhan le aa nuamh theih khawh tuk a si lo i aa capo le aa biatak zong theih khawh a si tuk lo. A ruang cu : a rum nak phen ah ngeihchiat nak a rak um i cun a chunglei in a rak broken ngai mi a rak si caah si. Mah vialte a character cu Timothy Dalton nih a tlinh dih. Charlotte Bronte hi rak nung rih sehlaw Timothy Dalton hi Mr. Rochester ding ah a lung a tlin lo ah cun a mak la.

Cun Jane Eyre hi mi nu hmete a si i dimple a ngei mi a si. Ngakṭah ten a ṭhang mi a si caah mi doitor a si. Mi nun nem a si nain a zumh mi a pom mi ah ralṭha ten a chim ngam mi a si. Pathian ai bochan i cathiam mi a ruahnak a kau mi a si. Kum-18 te lawng a si nain a khuaruah nak a puitling tuk mi a si. Mah character pawl hi Zelah Clarke nih a tlinh tuk ve.

Hi hna pahnih hawi dang nak in an thiam khun nak a ruang cu : zoh bak ah khin mak khawh a si ti loh. Midang cu voikhat pin ka zoh huam lem ti lo nain hi hna pahnih cu voi-5 tiang ka zoh cang nain ka vuai kho loh! Tuchan bang music le a color van ṭha sehlaw zeitluk in zoh a va nuamh hnga. 1996 le 2006 le 2011 ta pawl zong an ṭha tuk nain Mr.Rochester hi cauk ning an si deuh loh. An i hro tuk deuh silole an i capo tuk deuh ti bantuk in an si hna. Timothy Dalton an tluk khawh lo nak a ruang cu : Jane Eyre cauk hi voi tamtuk a rel hmasa ta caah Mr. Rochester sining a khen khawh tuk nak a si. Mah caah cun 1983 ta hi zoh a nuamh khun nak cu a si.

Annih chan lio 1800s lio hrawng hi nu nih tuah ding a rak um lo. Pasal ngeih le fa ngeih lawng an rian a rak si. Sianginn an kai zong ah an ṭuan khawh bik mi rian cu governess timi inn ca chim rian kha a rak si. Cun fapa lawng nih ro co khawh a rak si i cu hmanh ah cun fatir deuh kha usaa-pek deuh a rak si. An phun min le an ro kha midang kut phanh ter an rak sian lo caah mah le unau fale kha an rak umh ter tawn hna.

Nu cu ṭa a ngeih lo lawng ah ro a co tawn. Nupi pasal kawl kha bussiness pakhat bantuk a rak si i an farle pasal rum mi kawl piak kha an ṭa le rian rak si. Ṭa pa ṭhawng ṭha a ngei lo mi cu vaṭha ton khawh a rak si tuk loh. Chrihfa si ko zong ah Biaknak a hlei hluat tuk in kal pi le Bible a ning cang lo in i tleih nak nih hin minung duh thim nak vialte zeitluk in dah a rak kham i ngeihchia a rak si timi vialte zong hmuh khawh asi.

Hi vialte ka ṭial mi hmanh nih na lung an lak hlei lo si le Timothy Dalton tel nih cun an lak ko lai heheh!Crd.Robin Lian Bik Thawng