LAI CAPO IN NGAKCHIA CAPO I SUM A HERH:

Lai capo in ngakchia kan capo lengmangmi hna khi a ṭha hrimhrim lo. Lai capo ka ti tikah chim duhnak cu Laimi nih i caponak ah kan hman tawnmi ’soisel’ khi a si.

Hawi bantukin a ṭhang kho ve lomi hna khi «Na hmet ning cu.» tibantuk asilole «Na ha a beu, tar na lo.» tibantuk, an tlamtlin lonak le a zoh dawh lo deuhnak zawn char in soi kan hmang ṭheo. «Ziah ti cun na ti e?» tiah hun i ca usihlaw «Ka capo ko cuh.» kan ti hoi lai. A tak ngai ahcun a hmemi «Na hme.» ti le a nakmi «Na nak.» ti te hna khi capo a si bak lo.

Pum lei in a tlamtling lomi zong an tlamtlin lonak soi, an kalning cawn le an holhning cawn tibantuk zong kan hmang. Thluak lei in a tlamtling lomi hna cung zongah tuah kan hmang. Kan fa kan naule cio khi tlamtling loin um hna sehlaw mi nih an kan soipiak ah zeitin kan ruah cio lai ti khi kan ruah ngai a herh. Cun kanmah cio zong hawi kan tluk lonak khi kanmah soiselnak ah hmang cio hna sehlaw zeitin kan ruah cio lai ti zong khi ruah a herh.

Ngakchia hna hi upa bantukin a ṭha lei in khuaruah khawh aa harhmi an si tikah caan tampi ah an sining hawi an lawh lonak kong ah an ngaih a chia i an ning a zak. Ngakchia dang sinin soiselnak le namnehnak hna an ton tawn tikah hawi sin chuah langh an ning a zak tawn. Cu hlei i upa nih soisel chin le caponak i hun hman chin cu an ca ah thilrit tuk a rak si tawn.

Ka dawt ruang ah ka capomi si.» hei ti le «Nuamhnak ah ka dainak si ko cuh.» ti te hna khi a dik lo ngaimi a si. Kan dawt hna ahcun bia ṭha le bia thlum in chawn hna usihlaw, an ca i thazaang a simi bia tampi ruah hna usih. Nuamhter kan duh hna sile an duhmi lente celhpi ko hna usih. «Na nah ning cu.» ti te hna khi ngakchia ca ah ningzahnak dah ti lo nih hrim a chuak lo.Crd.Roro Fambawl

Be the first to comment

Leave a Reply

Your email address will not be published.


*