khrihfa kan si ko ahcun nuhmei ngakttah le santlai lo le sifak hna cungah teh zawnruahnak le zaangfahnak kan nei taktak maw?

Khrihfa kan si ko ahcun dawtnak teh kan nei taktak maw? zaangfahnak teh kan nei taktak maw? nuhmei ngakttah le santlai lo le sifak hna cungah teh zawnruahnak le zaangfahnak kan nei taktak maw?

Ngaihthiamnak lungthin kan nei taktak maw? a lungsau mi teh kan si taktak maw? dinnak tuah a duhmi le a tuahmi teh kan si taktak maw? thleidannak a neimi kan si sual maw? hnahchuahnak a nei ngaimi hna kan si sual maw? Myint Aung Hlaing cozah le uknak tthalo he rianttuantti kan duh lo bantuk in teh miphun dang misual le mithalo (mirang, minak, tuluk le korea le japan le latino) he teh rian a ttuantti mi kan si sual maw?

Pathian thluachuah kan hmuhmi cu a pingpang lo ah kan hmang sual maw? Khrihfa cawnpiaknak cu mah hlawknak le miaknak le siaremnak le larnak caah ningcang loin kan hmang sual maw? Mah miphun hawi cungah tthat lonak tuah a hmangmi kan si sual maw? Bible zong rel bel fawn ttung lo le pumh le thlacam zong fel lem fawn ttung loin Khrihfa biaknak cu thih ngamh in a ttanhsual mi kan si sual maw? Mah pawl hi thuk deuh le kaudeuh in ruat tti hna uh sih law ti ka duh.Van Tum

Chin miphun, Khrihfa kan sinak hi kum 125 nawn a si cang, zarhpi nitin kan i pum, crusade le camping zong kan tuah a tlawm ti lo, pastor le evangelist zong kan tam, gospel singer zong tam ngai kan nei kho cang, khrihfa mi nih tuah awk a simi tete zong kan tuah len hna nan Khrihfa cawnpiaknak cu nitin kan nunnak ah hmuh ding a tlawm/kan i nunpi kho tuk lo ti khawh a si.

Nitin kan nunnak le tuahsernak zohtik ah chambaunak tampi kan nei ti khawh a si. Mahhi aruang ka hei ruat ve tik ah a si lai tiah ka zumhmi pakhat cu phungchim (sermon) kan ngaih tik ah phungchimtu a thiam maw thiam lo ti ah le a chimmi a thawngttha a ttha maw ttha lo tiphun rumro in kan ngaih caah a si tiah ka ruah.

Baptist pastor maw a thiam deuh UPC pastor dah tiphun in thawngttha chim ngaih kan hmang caah Khrihfa cawnpiak nak hi kan nunpi khawh lonak a si ka ti. Evangelist maw a thiam deuh pastor dah tiphun in thawngttha chim ngaih zong kan hmang fawn.

Thawngtthachim (sermon) kan ngaih tik ah kanmah caah sibik seh la mah cun kan i nunpi khawh deuh lai. Thawngttha an chimmi chung in zeitluk dah ka nunpi khawh ve lai tiah thlacam bu tein kan ngaih awk a si. Thawngttha chim (sermon), pakhat le pakhat zuamcawhter le cuaithlai hmang in thawngttha kan ngaih ti awk a si lo.Van Tum

Be the first to comment

Leave a Reply

Your email address will not be published.


*