kawlram le chin boruak zohnak

NLD chan lio ka rak duh lo ngaimi cu tlangcungmi party hna kha akhwintaye (chance) an rak pek lo. Tlangcungmi party lei nih parliament ah a thami proposal hna an lut pi zongah an conghlang duh lo. usdp chan lio he a lo ngai. naypyitaw ka kal bal i mah lio ah shan lei mp pakhat nih a chimhmi cu parliament ahhin (tlangmi party lei nihcun) zeihmanh chim khawh si lo ati.

Anmah party lawng nih luhpi mi kha bia ah an rel. nld nih anmah cu kawlram bup huapmi party tiah anni ruah i hmunhma vialte ah an i cuh dih. chin party hna kha party hme an si, zeihmanh an tuah khawhmi a um lo an ti. Nationalist deuhmi tlangcung party hna nihcun usdp bantuk in kawl lawng nih hruaimi le kawl hmuisam a kengmi party tiah an hmu.

Pakhat a ummi cu 2008 phunghrampi nih kawl hruaimi party hna nih tei le uk khawh pengnak ding caah lam a siar piak i tlangcung party hna caah a har ngaimi a rak si.

kawlram i political culture asi mi “a teitu nih lak dih” phun in kawlram cu a tu tiang an kan hruai. Miphun tampi i umnak ram ahcun mah bantuk kapkhat lei lawng ruahnak le kalpi ning hi a dam lo ngaimi (very unhealthy ) politics a si.

Kawl mipi hrimhrim nihzong nld lawng kha party ah an ruat ve. Kan pi le amah party a um ko. Anmah tluk ram le miphun caah rian tuanmi an um lo. Party dang a herh timi ruahnak an rak ngei ve. Tlangcung mi hna an feeling taktak kha an rak hmu kho lo.

A caan ahcun chinmi boruak he kawlram sining hen a lo ngai. Kanmah nih thapekmi bu lawng ah i rak fonh dih ding kan duh. Mah bu a do mi bu caah tangka khonh ti lo ding, kanmah lei nih kan pek lo ahcun zeidik an rak lawh lai timi a dam lo ngaimi ruahnak a ngeimi kan tam. bu hna i komh in zeitin rian an tuanti kho lai timi ruahnak lei kan kal lo. Asi kho lo dingmi thil tu kha kalpi kan i timh. chin ka dawt kan ti mi hi chin zapi maw, asi lo ah kanmah miphun lawng kha maw timi kan i theih fiang lo.

Chinmi hi miphun kan tam. Kawl bantuk in a milu in cun majority group kan um lo. Asi nain tangka le a dang resource ngei deuhhmi group hi zeilei poah hruaitu (dominant group) ah a cang khomi asi. Asi nain group pakhat khat nih kawl bantuk (dominant group) in a rak kalpi ahcun kan i thenthek chinchin lai i mah tin a kalpi mi bu cungah remlo nak a karh chinchin lai. I ralring uh sih.Kham Tin Thang

Be the first to comment

Leave a Reply

Your email address will not be published.


*