Kannih CHINMI cu Ramdang um mi Good Samaritans le CHIN Zionists kan in ngeih hna caah, nanmah thawng in zeizong kan tlamtlin.

GZ Ralkap ¼ Hi Meithal Le Kuan Semrel Loin Nan Kan Bawmh Khawh Ahcun Ralhrang Rallokap Cu Kan Thluk Bak Ko. Vanruah Bang Sur Thengmang A Herh Lem Lo

Pupa rothil le hlawnthil vialte zuar in Hriamnam a cawk mi kan si (PDFs / LDFs). CHIN Zionists nih pumpi rinh in bawmhchan mi CDFs / CNDF kan si. Ruah bang surh awk tiang in Meithal le hriamnam bawmh awk hi asi khawh lai tiah kan rak ruah ballo. Kan thluak le kan si nak nih a phak lo asi ko lai, hung kan ngaithiam uh.

Hriamnam Bawmhtu van hai in le NUG nih Meithal bawmh ding in kan hngak ah kan hngawng lawng a sau deuh, Tisatlam kan hluan cang. NUG nih meithal bawmh awk ah kan fanau le thisen le nunnak hi pa zeizatdah a herh rih hnga tiah, Khuate vangnau le Laikhal lei cu mah le mah bia I hal tawn asi. American nih Ukraine bangin kan bawmh ve sehlaw, MAH le Rallokap cu an pum chimh lo, an thlarau hmanh cihmih an si diam cang hnga kan ti tawn LAIKHAL nih.

Kannih CHINMI cu Ramdang um mi Good Samaritans le CHIN Zionists kan in ngeih hna caah, nanmah thawng in zeizong kan tlamtlin. Chin Mifim cheukhat nih Diaspora CHIN (or) Exodus of CHIN an ti. Exodus Timicu mi ram in mah ram lei ah kir asi. CHINRAM in Ramdang ah kal asi caah, Israeli Zionism he aa lawh dueh. Cu caah CHIN ZIONIST tiah min ka sak mi hi asi. Israel ram cu Ramdang um mi nih an sersiam. Cu phu cu Zionist an ti hna. American Jew ko khi a tam bik mi an si. CHINISM, CHIN Nationalist tbk ai awh in CHIN ZIONISM or CHIN ZIONISTS tiah ti khawh asi.

CHIN Phuntungtu le ram dawtu CHIN Zionists tampi ruangah kan nih CHIN MI cu hriamnam cawknak caah ngeihchiat chawva, hlawnthil vialte le Pupa rothil vialte zuar nih an kan phak lo. CHINMI Bantukin in ram dang um a tam lo mi PDF / LDF cu pupa ro thil vialte zuar in hriamnam an cawk cang hna. NUG bawmhnak ding hi an hnabei sei khawh ti lo. Acan a rau tuk an ti. NUG nih meithal bawmh awk ah nunnak zeizat thap dah a herh rih lai a timi a tlawm ti lo.

Hriamtling he kum 70 leng a upa cang mi Rallokap he I dohnak ah kan harsat bik mi cu hriamnam asi ko. Annih Rallokap cu chanthar meithal ṭhaṭha he an ra. Kannih nih Kutserh mi meithal le puahceh in kan kal hnawh ve hna. Pengtlang CDF tamdeuh le Kawlrawn PDF cu LAI meithal deuh I tlaih asi ko. CNA, KIA, KNU, KNPP (KA), AA, tbk EAOs (EROs) hna tel loin Ralhrang MAH te a thluk khawh ding kan si lo tiah Myaung PDF hruaitu pa nih a chim. CDFs / CNDF ralkap tampi zong nih an chim ve mi asi.

Pengtlang in relcawk lo dollar kan thawh cang ko nain, hriamnam tlamtlin kan ngeih khawh rih lo, chambau nak tampi aum zungzal rih. Kanmah lawng in Kawl Ralhrang a cihmih khawh ding kan si fawn lo caah, CNF / CNA kuttang ah kan rak um dih mi hi a dik mi asi. Aum rih lomi le um aduh lomi CHIN GZ ralkapbu vialte nih CNA tang ah um cang usih. Pengtlang zong nih CBCUSA, CHINLAND CLUBs, Vauraung Zuunthil tbk ah kan chaw pek ve cang usih. Aluancia mi Pengtlang nih mah tein phaisa pekchan mi nih nan dollar zat le nan lungthin le saduhthah zat in hma a kal lo, rian a ṭuan lo tihi kan hngalh cang ko.

CDFs vialte hi CNF / CNA he pumkhat ansi lo nan ti mi hi khuaruah har nan si. Oneness Bantukin pumkhat si nan duh asi ko lai. Trinity tuin pumkhat an si cang. Uniform rumro in pumkhat si hi CHINMI nih duh mi asi. Uniform cu Anaasin le Oneness, Centralization asi caah Federal muisam a ken lo mi asi.

Democracy muisam zong aum lo. CJDC ah pumkhat an si ning khi nan tuak khawh lo mi tu asi deuh men lai. CJDC ah pumkhat an si cang Bantukin kan chawva zong pumkhat asi aherh, Zeitintiah chaw umnak ah lungthin aum ti asi caah. Cucaah Pengtlang lei ah pekchan tuk ti lem loin CBCUSA ah hin kan chaw I pumkhat dih cang seh, Ralhrang le Anasin hmuahmuah thluk ding di cang rawh seh, a rau hlan ah, Culocun Khuapi le Rangoon lak dih hnu ah ruah bang in a sur ding mi Kuan le Zen hngak kan herh tak men te lai.

Ramdang nih bawmhtu a ngeih lomi Kawl lei PDF rual nih Hlawnthil le Pupa ro tiang in an zuar I hriamnam an I zalhnak kong tlawmpal kan ruah hna lai. Myaing Myone hi zoh tua usih. Myaing Myone ah PDF tampi aum.

NUG kuttang an um Bantukin mah tein dirhmi (Mah le khua cio ah dirhmi) PDF tampi aum rih. PDF 100 leng an um. Dr. Sa Sa nih bawmh ding kha an hngak zungzal nain a tlamtlin lo caah, pupa ro thil, hlawnthil an ngeih mi vialte an zuar hna I, hriamnam an I zalh. Ruah bang in sa sur ding mi kuanzen nih an lung a rawk ter chin hna.

PDF pakhat cio nih an Inn cio in Suiṭhi an rak chuak pi cio. Nuai 10 hrawng an hmuh. Suiṭhi vialte an khonh hnu ah meithal man a kai tuk caah le puaisa le kusale nih an ei tuk hna caah, meithal a cawk khawh lo. PDF nih an nu le pa cu an chimh hna I, pupa ro tiang an zuar piak hna. Nel Ekah 2 an zuar I nuai 20 an hmuh. Meithal seh kan cawk an ti ah, nuai 25 man kha nuai 100, nuai 150 a phak tikah an cawk khawh ti lo.

Cucaah nelthuan mi caw le cawleng tiangin an zuar. Chan ṭhat lio Nelthuan caw tuakhat hi nuai 60 a si nain, nuai 30 in an zuar. An nu le pa nih kan hni le puan zong kan zuar dih lai, tak lawng in kan um zong ah apoi loh, Ralhrang cihmih nak asi poah ahcun an ti. CHINMI Cheukhat lungput he cun dan sup.

Ralhrang Rallokap nih Jet Fighters, Helicopters, Hriamngan lawng te an hmang tikah, an I cawk cia mi Autogun tlawm te cu hman awk an ṭha ti lo. Duh ning in mipi an khumzual khawh lo ti lo. MAH nih a thluak in khua mi cu a lem cang hna. PDF an um caah nan khua mei duah asi, Vanlawng in kah nan si, tiah an ti hna I, an hlawh tlin pah ngai. Ngaichiat tuk bak kan si ko.

NUG kuttang ah PDF ralkap hi nuai 10 leng an si men lai dah. Azapi tein cun kan ti ve lo. Myaing PDF caah a herh mi meithal ¼ hi an kan bawmh khawh ahcun MAH le ralhrang cu kan thluk bak hna lai tiah Myaing, Pale PDF le Bo Nagar te nih cun an ti bak ko. Ruah bang sur ding in kan in hal hna lo, PDF minung zat I ¼ tal hi meithal kan bawmh ko uh tiah MPDF authawng cu asi. Kan chunmang Federal Democracy a hlawhtlin bak lai, TEINAK Lianngan a rau hlan ah kan hmuh fawn lai an ti.

NUG meithal hngak buin, mipi le PDF tampi an thih cang, Innlo tampi a ciamh cang. Ngawl kan timh hlei lo, kan hmuitinh kan phak hlan lo, kan ngeih mi tein Ralhrang an cihmih tiang kan doh hna lai tiah Fek tein an dirh lehlam. Pumpak miak nak caah asilo, bu khat caah asi fawn lo, PDF siṭhatnak caa zong ah asi lo, Hi Dohthlennak kan tei ahcun: Saal in kan luat lai: Rallokap hremhnak a thih cang lai: Kan ram le mipi nih kan herh bak mi Federal Democracy kan hngah lai: Mipi nawlngeih nak le mipi tang ah Mipi cozah a um cang lai: tbk vialte ruahchan in, meithal lo pi in, nunnak le thisen tampi pek in hmai nawrh an I timh ko.

Paucan Dohthlennak kan tei tiang in kan nung rih ahcun: Thanthling kung a kai nih an kai rih lai, Rua tawi a kawl mi nih an kawl rih ko lai: Nelthuan mi nih nelthuan asi ko lai: Hmailei bawi sinak le uktu si kha kan I timh mi asi lo. Zeitintiah, lothlawh thingphawr mi le mi sifah rual nih meithal tlaih in Ralhrang MAH kan doh ti cu Vawleipi hngalh asi ko tiah MPDF nih an ti.

Ralhrang Rallokap huat tuk ah le cihmih awk ah hriamnam Dohthlen mi kan si caah, Dohthlennak rianrang teih a dih nan duh ko ahcun: Mah le khap tawk tein le mah le pahrang cio in, I zuk phir lo tein, rak kan bawmh cio ko uh tiah CDFs / CNDF nih kan in sawm hna.Crd-Zingtincuai Cinzah

Be the first to comment

Leave a Reply

Your email address will not be published.


*