Kan Chin miphun Bawipa sin ah kir hna usih

Hitluk ram fate, nelrawn umlonak, fing le tlang, lungpang le horkuang tamnak le thingkung, ramkung an phonnak ram hna le

Ram lak zawng bantukin a nungmi, misen phun, mi niam le mi hme phun, mi ṭhawng lo phun, mi dawh lo phun, mi fimthiam lo phun le mi that hmangmi phun hna le

These ram bantukin a um i zeihmanh a chuak lomi hmun ummi Chin miphun hna hi, Zeizong vialte Sertu Bawipa nih zeiruang ahdah “Jesuh Khrih thawngṭha” a rak phak ter i vawlei ram rum bikmi hna le fimthiam bik ram hna ah MUPI bangin a kan cawi i,

chawva, thilri, fimnak le thlarau in van ruah bangin kan pumpaak le kan innchungkhar kip cio ah a rak sur ter i ceunak chungah a kan hruai hnga?

Kan fanu/fapa hna nih an ei bal lomi an ei, an tongh bal lomi an tongh, an thiam bal lomi an thiam, an phak/lamh bal lomi an phan.

Kan Chin miphun caah Bawipa ruahnak, aa tinhmi, a khuakhaannak hi hngalh khawh asi hrim lo.Bawipa kan dawt ruang, kan dinfel ruang, a nawl kan ngaih ruang, kan zumhnak feh ruang le a duhnak kan tuah khawh ruangah asi hrim lo.

Bawipa dawtnak le a vel thawng lawnglawng in asi tihi ngakchia in thar tiang nih hmuh khawh asi.Bawipa nih kan Chin miphun thluachuah a peknak kum 20 a rauh hnu ah atubantukin kan ṭih tukmi, raldohnak, sungzatlaknak, puicimhnak, rawhralnak, hremnak le thihlohnak chungah zaan mangmanh bantukin kan ihngalh karlak ah muihnak chungah a kan hruai ṭhan.

Kan Chin miphun cungah Bawipa a ruahnak, a khuakhaannak le aa tinhmi hngalh khawh asi hrim lo.

Isreal miphun hna a thim hna i thesa ram kha thluachuah a pek i, ceuhnak umnak ram leiah a hruai hna bangin kan chin miphun zong hi Bawipa nih a kan thim i a kan hruai ve tihi ka zumh!

Asinain thluachuah an hmuh tikah cun Israel miphun nih Bawipa an kal taak i an hlawt, a nawlbia an ngaih lo i Siasel an biak caah harsatnak le saltaannak chungah a cawnpiak hna bantukin,

kan chin miphun hi thluachuah tampi a kan pek i kan thinlung tlangsaang i porhlawtnak in kan khat i Bawipa thangṭhat le lawmhnak chim kan huam ti lo i vawlei he ihawikomhnak he kan nun caah Bawipa nih a kan cawnpiak i a kan chimhhrin tihi ka zumh!

Bawipa kut chungah Chin miphun hi kan um. Bawipa nih a thimmi hna miphun cu a kawh hna, thluachuah a pek hna, ceunak ah a hruai hna, a cawnpiak hna, a chimhhrin hna i amah kut lila in a chuah ṭhan ṭhiam ko hna.

2022 kum in hmailei caan ah zeitindah Bawipa nih kan chin miphun a kan hruai lai kan hngal kho lo. Asinain hmailei a ngeitu Bawipa asi i, Bawipa kut ah kan um ko caah Bawipa cu ka bochan.

Kan chin miphun hi a ṭhabik in Bawipa nih a kan hruai hrim lai tihi ka zumh ko! Bawipa nih a tuahmi kip hi ruang ngei loin thil a tuah bal lo. Cun a fale hna, kan caah ṭhatlonak khuakhaan in tinhmi angei bal lo.

Kan chin miphun Bawipa nih a kan dawt caah le kan caah thilṭha a kan tinh piak caah asi tihi ka zumhmi cu asi.

Kan Chin miphun nih “Bawipa nangmah duhnak bang si ko seh!“ kan ral hna le kan harsatnak le kan temhinnak vialte hi na kut cungah kan ichanh dih! Kan kaltaak hin hlah law” tiah thlacam hi kan caah a ṭha bikmi asi.

Cun mi zeipaoh kan si ah Bawipa nawl hi ngai ko hna usih! Bawipa hngak ko hna usih! Bawipa ibochan ko hna usih! Bawipa sin ah kir hna usih!

Ram dang ummi hna hi Bawipa nih cawimi lawngte kan si i, kan chin ram/miphun “taksa, chawva, fimthiamnak le thlarau” in cawmtu ding le sersiamtu kan si hi philh hrimhrim hna hlah usih!

Carson le Laura an thisen/luruh a hmunh chung le a au chung cu Bawipa nih a kan philh lo. Bawipa auhnak aw ngai in kir hna usih!

Zeiruangah, zeitindah ram dang ka phak tihi iruat cio hna usih! Kan ratnak, kan ithawhkehnak philh hrim hlah usih!
Suithantlang!Crd-James Vanneilian

Be the first to comment

Leave a Reply

Your email address will not be published.


*