Kan chan hi chan chia a si rua

Thantlang ti awk hmanh a um ti lomi Thantlang kha ka ngai ruangmang tawn. An khua chuah hauka laipawnglung in seihpiozi sang le lungṭial sang tiang, TABC le biakinn sang in market sang le thlanglei pi sianginn sang tiang, nichiar zung kan rak kai tawnnak party council cozah zung umnak le hawikom rual he lakphak ti kan rak din tawnnak zunghmun sang he Fung Cung nu lakphak dawr le U Hlawn lakphak dawr hna kha mitthlam ah an cuang ṭheo.

Thantlang ti awk va um ti hmanh hlah seh, Thantlang karceh in a luang tawnmi lahva nel le buhva nel hrawng kha cu an hmun ko rih lai dah. Bawlung puai vialte lakah minthang ṭaungcaw bawlung puai kan rak chuih tawnnak ‘’Lal Luai Certual’’ belte kha a kin tuknak ah ui fir hmanh an kal ngam ti lai lo i, an ning a ṭi ve cang ko lai mu ka thin zelzul!

Atulio Laimi kan chan hi chan chia a si ko rua. Chan chia ah kan um. Atulio a nung rihmi Laimi hi kan van a chia ko. A poi tuk ti pinah chimding biafang a um ti lo. Chan chiat lio cu ahopaoh hmunkhat te ah kan tuar ṭi hna a hau ko. Kan i bawmh lulh cio a hau. Kan i zuanhnawh cio a hau. Kan i kurit cio a hau. Thazaang kan i peek cio a hau. Hnangamnak kan i hrawmh cio a hau. Thla kan i campiak cio a hau. Pakhat le pakhat kan i thangchiat len ding a si lo. Phukhat le phukhat kan i soisel len ding a si fawn lo. Nangmah maw keimah kan i ti len ding hrimhrim a si lo.

Chan chiat lio ko hi hruaitu ṭha kan herh khun. Hruaitu ṭha kan herh tluk tein hnuzultu ṭha si zong kan herh bak ve fawn. Hruaitu a simi hna hi minung an si ve caah an tlamtlin lonak a tampi ve lai. Cozah ser an si lo i, kung cung hmin zong an si hlei lo. Sihmanhsehlaw, an kan hruai lio a si ko caah an hnu zultu hna nih hruaitu hna mit-au le mithmai zoh thiam i, an hnu zulh khawh kha a biapi tuk ve. Chan chiat lio ah bia tam tuk kan chim ding a si lo. A bikin hnu zultu hna kan rian bak a si. Ca zong duh tawkin kan ṭial ding a si fawn lo. Hmanthlak chinchin cu a hmanthlak paoh kan ‘’post’’ ding a si lo. Nuamhnak puai tuah lio hmanthlak le rawl thawthaw ei lio hmanthlak hrimhrim cu a ‘’post’’ in ‘’post’’ lo ding hen ta mu. Zeicatiah, Laimi cu thlachiat a ruatmi miphun dahkaw kan si fam cu.

A ngaingai tiah, Pathian a ṭha timi biafang hmanh hi kan chim sawhsawh men ding a si rua lo. Pathian nih a kan dawt timi biafang zong fawi tukin kan chim sawhsawh men ding a si fawn lo. Pathian a ṭha timi cu a hmaanmi a si ko. Pathian nih a kan dawt timi zong a dikmi a si fawn ko. Sihmanhsehlaw, nihin kan dirhmun le kan tonmi thil ah Pathian a ṭha ko hon ti awk ngaingai le Pathian nih a kan dawt hon ti awk ngaingai ah a fawi bak lomi mi cheukhat an um kho ve ti khi kan philh lo ah a ṭha. Cucu thlachiat ruat timi cu a si.
Sifah lio le canfah lio ahcun aho sual phawt awk ngaingai kan ṭha bal lai lo nain, hnu zultu pawl hi hna a chet ngaingaimi kan lo.

Dohthlennak a va dih te tikah aan neng bik minung a tlawm bik pathum i thim hna law na duh paoh in tuah hna ti khi siseh law, Min Aung Hlaing le Zaw Me Lung khi ka thim theng hna lai lo. Annih pawl khi cu aa thim hnga ding an tampi sawk ko lai. Keitu cu kan Laimi chung bakin ka thim ko hna hnga i, zeizei ti loin khu lengmang in ka bengh ko hna hnga. Minung pathum hmanh an tlawm deuh men lai.Crd.Perhkalh Thawng

Be the first to comment

Leave a Reply

Your email address will not be published.


*