Kafa, a tu cu mu, na Nu chuanrawl hmanh ei manh lo tein na Nu le na Nau Hniang te kha na ruak in na fuh panh cuahmah hna.

Kafa, Titus Ngun Bawi Lian, a luancia thla 8 lio ah khan na chuahnak na Inn, na Nu le na Nau Hniang te kal tak in na U le na Pa he lawng in Mission rian kal nan i thawh. Na Nu nih sian lo bu tein caan karlak i tthen ta kun hna u sih mu, an ti hna.

Napa nih, “Ka rianh mi kan Pathian nih harsa tuk cun a kan chia bal lai lo, zeizong te a mah nih a khan dih ko lai. Zei khom a si ah i thawh ko u sih mu”, a rak ti.

Mission rian nan umnak ah nan Pafa rual lawng cun zohkhenh tu ngei lo arfa rual bang nan cangvai. Napa nih zing he zaan he rawl an chuan piak hna ah a thaw lo nan ti bal lo – nan Nu rawlchuan cu na ngai tuk tawn ve ko lai nain mu. Nan u-nau tein Zoom in kan i chawnh tawn hna ah khan, “kapa Lian, Hakha ka ngai, ka nu le ka nau Hniang ka ngai bik hna”, na ti tawn kha.

Thal chuah cun inn kan tlung lai nan ti; ka Nu le ka Nau he kan i tong deng cang na ti tawn kha. Na nu nih a tu X’mas ah kan rak tlawng hna lai an ti lio ah khan, “Fungvei le chi-hmui ka phorh te”, na ti kha. Na nu le na nau Hniang lunglawm tein nan Mission chumtual in don na timh hna kha. Nan i ceih len kha.

Tutan na dam lo ah, na Pa le na U te he lawng cun sizung ah zaan hnih nan tuar. Tu zingka na vawlei nunnak a dih hnu hmanh ah khan na cangluang tlunpi nak ding na Pa nih a tawlrel kar te hmanh khan cawngtu ngei lo tein sizung na ih khan ah nangmah te lawng chiah ta na hau. Cu ngai cu; chuahpi u nau, pi le pu, cingla rualchan ngei lo bang, kafa. Ka thin hi a fah in a fak, kan lung a kekkui dih ko hi ta.

Kafa, a tu cu mu, na Nu chuanrawl hmanh ei manh lo tein na Nu le na Nau Hniang te kha na ruak in na fuh panh cuahmah hna. Na inn tlun dan cu kan celh tung lo kafa. Na Nu tu nih mit-thli he an don ko lai cu dah. Pathian khuakhan hi ruahthiam a har ko mu ka ti.

Na thlachuah tu kha na tantak mi na Pa, na Nu, na U le na Nau Hniang te sin le cingla rualchan kan dihlak sin ah chiah ta dih kun mu. Rest in Peace Ngun Bawi!Crd-Thawng Tha Lian S

Be the first to comment

Leave a Reply

Your email address will not be published.


*