Ka NU na fapa kaa dang tuk cang

A hlan i cauk, cafung, laptop le camera ka rak tlaihnak a nem tukmi ka kut kha atu ahcun a durh i a hak dih cang.

A hlan i motorcycle pakhat he khuachung kaa chawh, ka helnak kha atu ahcun a thi ding minung ka si ti cha in meithal kaa bei i ralkap kedan he ramtang le tlangkip ah ka kal cang…

A nonal tukmi ka ruahnak ka muihmai kha a tu ahcun puitling muihmai le ruahnak tling in ka khat  cang…

Rawl ka ei i meh a thawt lo caan ka zai tawn mi, na meh kio rim chia tuk ka ti i ka hnar kaa phih tawn mi kha atu ahcun a thaw bik ngapih meh, tamsup tamsap he thaw tak in ka ei khawh cang…Ngapih meh ka hmuh ahcun ka nundi a riam…

A hlan i ihphah tha ka ih, thutdan tha ka thut, hnipuan tha kaa hruk mi kha atu ahcun ralkap uniform le pumhnak angki zuun khat te he kaa lungsi tuk cang…

Ringawn hnachet thawng le hlasak thawng ka rak theihnak ka hna kha atu ahcun bomb le meithal puahkehnak thawng lawng a theih cang…

Inn ah ka kut nam in a fate kaa ah sual hmanh ah atuamnak a tuamnak tiin ka rak au mi kha atu ahcun pasal nusal tha hna thisen lawng nifatin hmuh a si…

Sui le Ngun, Chaw le va kan ngeih lo zong a poi lo ka rak ti tawn mi kha atu ahcun meithal kuan cawknak man tal hi ngei usihlaw ti kaa ruahchan…

Na rak ka sik tawn, na ka hro tawnmi na awka kha ka rak huat ka rak duh lo nain atu ahcun ka si than seh ka hro than seh ti kaa ruahchan, (kan ngai ka nu)…

Ka nu… fahniang na ka ruah ah na thinlung a baa ko lai. Na ka ngai tuk ko lai… asinain, “RALKAP UKNAK,” timi hi kanmah chan hrim ah a dong lai ka nu…

– Hmailei kan fale kan naule ca ah atu hi kanmah nih kan tuan awk a si ka nu… kan rian kan tlinh lawng ah ka fanau an i nuamh ding a si ca ah kan tuan rih ko lai ka nu…

Kan ngai tuk ka nu…Teinak thantar he na sin ka rak kir lai…Lawmhnak mithmai le pangpar thirual he ka dong te mu.Credit-Salai Tluangte

Be the first to comment

Leave a Reply

Your email address will not be published.


*