Ka Dawtmi Chin Pasal Ṭha Hna Sin Cakuat

By, Senri Iang Nan sinah ka si khawhtawk cakuat tawite ka rak ṭial. Kei cu nan ka theih bang nan lungduh hmanh in an hnem kho mi hna ka si lo, nan rianṭuannak ah ngeihchiah thazaang zong in an bawm kho hna zong ka si lo. Asinain Chin Nu pakhat ka sinak in ka tikhawhtawk te nan rianṭuannak ah a tlamtlin khawh ding hi mitthli he zantin in nan caah thlaza ka rak in campiak hna timi hi nan rak ka theihpiak ve ahcun mah cu kei i ka lunglomhnak nganbik cu a si ko. Nan sin ah ka mipum in kaa tel kho lo nain nitin thindomh in di-de ka rak ngai zungzal. Thawngpang hi ka rak rel zungzal.

Dothlennak cu ka dawtmi ka ṭa le hna, keimahnak in nan i fiang deuh ko cu ta, harnak tampi, rawlṭam, tihal, mitkuh cim lo, lungretheihnak phunkip tuar in sianghnuai meithel pai in keiṭial sa bang fingtin nan cul zawn ah kan Chinram kha nan ngai hringhran ko lai. Asinain nan tuahṭuanmi dothlennak cungah Chin Mipi nih kutchuan upat kan in pek hna. Nan thachia hin hlah uh. Pathian nih an umpi hna.

Harnak na ton, ralsa lak na kal tik zong ah an daw i an vengtu Pathian kha pakhatnak ah rakchia zungzal ko ulaw ti kha nan far nu kei nih a langtlang in biacah kan duh hna. Ralram si bang, harnak phunkip nan tuar, nan duhdawt tukmi hrin semmawng, thaisung, lengnu hna kha nan mitthlam ah cuang in nan lungthin nan taksa in nan hlam ko hna lai. Nan taksa hrim in nan hlam hna lai ti cu ruah ngam lo tiang in kaa fiang. Na fanu dawt, fapa dawt kha na ṭangnem toi ah pom in duh tawk in pom le amah he lungdiriam in mirhṭi, na hrinsemno hna mithmai panh tein an um lio kha hmuh na duh tuk ko lai, cu chung ah ralram na ummi na sinning ka ruah tikah ka nun nih a rak celh ve hnin lo.

Hi tluk in nan tuarnak vialte hngalh piak lo in Kawl cozah ralkuan ngannak in a fak deuhmi Chinmi chung in an biafak hna nih na lungthin an khuaituk ding zong kha ka hngalh cia ko. Asinain mu ka ṭa le hna nan tha maw chia lai ucih. Nanmah nih lungdong in nan hriam kha chia in nan dothlennak kha ngol ulaw kan Chinram a mithmai khi zeiko khi dah a va lawh hnga mu. Dohtu tam mi lak ah ngeihhchiah chawva, caan le sining dihlak in an dirkamhtu minung a thongza in an um ko timi kha rak hngal peng ko mu ka ṭa le.

Ni nikhat cu teinak thantar he lunglomhnak le ngaihchiatnak( Ramca nunnak thap pasal ṭha hna sining ruah buin ) kan ram ah tlun caan a phan te ko la.

Tluangchin ram ah dothlennak rian a ṭuanmi ka ṭa le hna nan lung ṭhawngin kan biak zingnu Pathian nih lunun damnak in pe hna sehlaw thluahchuah vanni he in veng zungzal ko hna seh.
Nan farnu Senri Iang

Be the first to comment

Leave a Reply

Your email address will not be published.


*