Hnemtu Nan Sinah Lawnnak Bia

A tu tan ka pate Pu Van Ceu nih hi Vawlei nunnak in a kan kal tak lio can, kan ngeih chiat tuk lio can le kan lunglilen tuk lio caanah,  dawtnak le siherh zawnruahnak thinlung he kan ngeihchiatnak a kan tuarpi,

a kan hramhtu ramchung/ramleng hmunkip ah um mi kan khua mi hna le, kan khua chingchang Tluangram, Ngalang, Lawngtlang, Khuabung, Hriphi le Vuangtu khua hna in a rak ra kho mi dawt tu hna le, a fa le hna umnak hmunhma cio ah hnemtu le tuarpi tu hna nan dihlak thawngin kan tuar a nem deuh hringhran ko.

Nan cungah kan i lawmhnak hi hmurka in kan chim kho lo, Bawipa nih a theih ko. Bawipa kan Pathian thluachuahnak le deihnak nan cung cio ah um ko seh, tiin thla kan in campiak hna.By-Cung Lian Bik (Kal tak mi fa le vialte le rualchan aiaw in).

Minung Lak Ah A Cangpengmi Sining Chungah Pathian Bochanmi Hna Nun!Genesis 35:17-18 Cu ti i a ngan a fah lio ah cun nau hlawmtu nu nih khan, “na thin phang hlah, fapa na ngeih tthan,” a ti. Cun a thaw hmanungbik sinah cun a cahpah khan, “Ben Oni run ti u,” a ti. A sinain a pa nih cun Benjamin tiah a min cu a sak.

Jocob nih a dawtmi a nupi Rachel a thihnak kong kan relmi a si. Rachel hi Jacob nih a co khawhnak ding ah kum 14 Laban a renhmi kha a si. Pathian nih nau ngeiter lo in a um ter. Jacob cung hna ah a thin a hnung, Nau na ka pek loahcun ka thi lai a ti. Jacob zong nih Pathian ai cu ka rawlh khawh tuang lo a ti. Nau ngeih kan timi zong hi duh paoh in a si lo. Pathian pekmi a si.

Rechel nih a hu ah fapa a ngeih. Cu fapa cu Josef tiah min an sakmi kha a si. Josef cu a unau nih a rem lo caah Izipt chawlet pawl sin ah an zuarmi kha a si. Josef a chauh hnu ah Rachel cu Pathian nih a nua inn a hnun pia ki fa a pawi tthan. Fapa a hrin. Fapa hrin nak in naucung in a thi. Rachel nih a thawchuah hnudung bik sin ah min a sak ta. Ben-oni hun ti u a ti. Ben-oni ti cu ka vanchiatnak fapa tinak a si. Rachel caah Ben Oni a chauh cu a thihnak a si. A vanchiatnak, a nun donghnak a si taktak.

Jacob hi a pasal tiah laimi nih kan timi lungput a ngei. Rachel nih a thawchuahhnu bik sin ah a chim tami kha a tuah lo. Ben-oni ti cun auh siseh law a zungzal in a nu intuarnak le harnak kha a langhter peng lai. Rachel nih cun a duhmi zong a si kho men. Philh lonak ah a sak tami a si. Jacob tu nih cun Benjamin tiah a sak. Ka van tthatnak fapa, siloah, Ka orhlei kut fapa tinak a si. Benjamin le a pa kong hi Baibal ah kan relmi a tam lo.

Josef nih a u le sinah nan nau nan rak ratpi hrimhrim lai a ti mi kong an chim lio ah Israel nih Bernjamin nan i kal pi ahcun fa loin pei nan ka chiah lai hi, a tinak; Josef hrai Benjamin sawngkhoi ah an chuah tikah an launak le an ngaihchiatnak ti bantuk deuh kha a si.

Israel hi Rachel nih Ben Oni a timi fapa kha Benjamin tiah a au khomi pa a si. Rachel a thi. Sihmanhsehlaw Bnejamin hmaithar an hmuh. Vawlei cung ah a cang kho mi sining kha Jacob techung khar cung ah a chuak ve ko. Hi bantuk can ah Jacob lungput hi a pical taktak. A herhmi kha a tuak tan. Fapa min zong ruahchannak a simi min a sak khawh. Rachel thla zong a ser. Lungphun zong a tuah. Rachel a dawtnak kha a langhter.

Baibal kan rel tikah tuchan zong ah kan ton lengmang mi sining hi a langhter peng. Nau ngeihnak in thih ti zong hi a rak um ve ko. Min sak tikah vanchiatnak le santlaih lonak hna i sak zong hi a rak um bantuk in ruahchannak a langhtertu min zong sak a si ve. Kan sining hi cathaing chung ah kan rel lengmang. Kan sining hi cathiang chung ah kan hmuh lengmang. Hi bantuk can ah Pathian bochan in nunnak karhlan peng hi a herhmi a si. Kan nih zong minung lakah minung pakhat kan si venak cu harnak zong kan in tawn caah ah hin a si.Bil Hmung

Be the first to comment

Leave a Reply

Your email address will not be published.


*