Hitler nih Israel mi 6 million tluk a thah hna ruangah Israel mi tthawng chin in an dir i kum 2000 ram ngei lo mi hna

Six Days War le Nihin kan dirhmun.Israel cu Pathian thim mi Miphun an si nain Pathian a bia lo mi ram hna nih an rem lo i tuk ding in nihin tiang an tlerh peng mi a si nain mi tlawmte le ram bi te a si nain nihin tiang fekte in a dir kho.

1967 June 05-10 Niruk raldohnak ah minung thazang le hriamnam thazang in tuak ahcun van le vawlei tlukin an i thlau ve. Israel nih ralkap aa ngeihmi cu 50000 tluk lawng a si lio ah amah a dohtu cu 240000 leng an si. Israel nih raltuknak Tank 250 a ngeih lio ah a dohtu cu Tanks 2504 an ngeih. Ralkap thazang le hriamnam thazang in an i thlau bak ko nain Israel nih a tei hna. An teinak hi an lungrualnak le teitu Pathian an sinah a um caah a si ko.

Nihin kanmah zong ralkap thazang le hriamnam thazang i thlau tuk hmanh sehlaw lungrual tein kan dir tti i Pathian kan i bochan ko ahcun minung ruahnak nih a phak khawh lo pin lei ah teinak a ngeitu Pathian aa phuang tawn.

Hitler nih Israel mi 6 million tluk a thah hna ruangah Israel mi tthawng chin in an dir i kum 2000 ram ngei lo mi hna nih ram an hung ngeih bantuk in, mi tha lo Min Aung Hlaing nih a kan thahnak thawngin pakhat le khat mawhchiat le soisel si loin tthawng chin ti i zuam ve uh sih.

Dietrich Bonhoeffer cu mifim cathiam a si i kum 22 in Doctorate a hmu mi a si nain saram bantuk in mi a thahtu Hitler hi zoh sawh awk a tha lo. Mi hliam a tuarter mi hlop maw a tha deuh maw mi a hliamhtu pa thah dah a tha deuh? ka doh a hau tiah Hitler a doh i Hitler nih a thah ve bak nain a miphun cu teinak an hmu.

Nihin ah a kan thah cuahmah mi pa zoh sawh in hliamhmi hlawm len nakin a kan thahtu pa thah kha kan rian a si ve cang. Mi pakhat nih vawlei co dih hmanhsehlaw a nunnak a sungh tung ah cun zei tal a miak hnga maw? miak hlah a ti bantuk in a sunglawi bik nunnak a kan la cuahmah ti hi cu kan doh cu a hau ve cang.

Israel mi hna nih Zionism tiah an ti i an ram caah an fimthiamnak vialte an chawva vialte le an thazang vialte an pek i an ttang tti tikah an ram an kilven khawh bantuk in Chin Miphun upa bik in hngakchiat bik tiang Chinism tiin kan chawva, kan fimthiamnak le kan thazang kan hman dih cio a hauh caan a si. A kan cawmtu Chinram caah Chin fa hna kan thawh a za cang.

Chin Miphun le Vakok nun kan i tahchunh bantuk in kan thazang le hriamnam nih tlinh lo zongah Chin Miphun hna Chiandeih sehhmang sinah kan lu kan khun kho hrim lo. Kan thazang le hriamnam nih tlinh ruangah si loin kan ngeih lomi chungin Miphun le ram dawtnak zumhtlak in kan dir caan a cu cang.

Vakok nun a ngei mi Chin Miphun hna kan thazang le hriamnam aa thlau tuk ruangah Chinram hnu chit sual lai u cih. Kan thazang le hriamnam nih a tlinh lo zong ah Chin Miphun cu Chin mi nih nunnak le thisen in kan ven a herh. Pathian a bia mi Chin mi hna nih Pura hmai ah a kun mi Chiandeih sinah kan kun kho lai lo. Kan Pathian nih a kan bawmh le khamh khawh lo tal zong ah miphun le ram caah kan lu i phum ko u sih. (Cucu kanmah le ti khawhnak lam in i zuam a hau ka ti duhnak)

Thah hrulh mi cu an hrang khun bantuk in kan doh lawlaw cang mi a dihdongh tiang doh i zuam u sih.  Minung lei sinak in cun aa thlau tuk mi hriamnam le thazang lawng hmuh a si tikah lung a dong kho nain Elisha le a sinum cu Siria ralkap nih an kulh hna nain Elisha nih anmah ralkap bu nakin kanmah lei ttang mi an tam deuh a ti bantuk in, mit in hmuh khawh lomi vancung mi a kan thhlahpiak kho ti khuaruahhar Pathian a ngei mi kan si.

Pathian hi kan i bochan i sawm peng ko ahcun minung lung a dongh hnu ah khin teitu Pathian a sinak a langh te hrim ko lai.

Miphun le ram caah nunnak, thisen le kut le ke, mit le hna a pe cang i aa zuam cuahmah mi vialte upatnak sang bik kan in pek hna. Miphun le ram caah nan min chimrel a dai ti lai lo.Crd.Salai Pa Thawng

Be the first to comment

Leave a Reply

Your email address will not be published.


*