Hi ui fir pa 6 hi fim sawhsawh ding an si lai lo.

Thantlang inn le lo a khaang dih tu Min Aung Hlaing ui fir pa 6 CDF le CNA nih an tlaihmi hna hi zeiti i tuah ah dah a ṭhat bik hnga ti ka ruat i rawl ei zong ka tlolh viar.

Hi ui fir pa 6 hi fim sawhsawh ding an si lai lo. Tlangtlang i an ṭhut dir ning le cawlcangh ning pawl, inn an khangh ning, thil an fir mi, an camp um tu ning, le duty an hngahter ning hna tbt. vialte hi hal hna i video ṭha te in thlak bak ding. Inn an khangh ning le thil an fir ning pawl an chimmi cu zapi sin bak ah tar te ding.

Thantlang khua ruak i a cam rihmi ui fir dang pawl zong a rauh hlan ah an i ap/surrender ve te hrim lai. Kan ralkap (CDF/CNA) hna Pathian nih in umpi hna seh law in kilveng peng ko hna seh. Upatnak kan in pek hna.Crd-Vanceuuk Khenglawt

SAC Nih Uknak A Laak Kum 2 Chung Ah Hakha Ah Tualchung Mi 14 Nunnak Liam, 370 Leng Tlaih An Tong – CDF Hakha

2023 February 1 in Min Aung Hlaing nih hramhram in uknak a laaknak kum 2 a tling cang. Hi chung ah lamzawhnak in siseh, CDM tuahnak in siseh, CDF-Hakha min in siseh, Hakha peng chung ah kan ram le miphun luatnak caah tiin dothlennak kan tuah. Lam a zawhmi minung 50,000 tluk kan rak si.

CDM a tuahmi zung rianṭuan minung 4,000 tluk kan rak si. Hriamtlaimi minung 3,000 tluk kan si. Hakha ah Chin State zung, District zung le Township zung tiin a ummi hna rian an ṭuan kho lo. Mizapi nih ralhrang cozah nawl an ngai duh lo. CDF-Hakha nih ral voi 166 kan tu cang, ralhrang 510 kan fim hna i 222 kan hliamh hna. Hakha khuapi chung ah kahdohnak voi 65 kan tuah cang. Hakha peng ahcun ralhrang nih zeihmanh an tuah kho lo. Hakha khuapi zong caan rau lo te ah kan lak khawh cang lai.

Kum 2 chungah ralhrang hna kut in mipi nunnak a liammi minung 14 an si, hliam a tuarmi minung 6 an si. Ralhrang kut in inn a kangmi inn 30 le a rawkmi inn 4 a si. Tlaih a tongmi minung 374 an si. Mizapi hna mah inn le lo ah um ngam loin ral a hrialmi le harnak a tongmi tampi an um. Mipi ralkap chung in minung 19 nih ram le miphun caah nunnak an pek i minung 41 nih hliamhma an tuar. Hi vialte hi kan ram le miphun luatnak ding ca ah an si.

Ralhrang uknak a hram in a cah hlan tiang pehzulh in dohthlennak kan tuah lai. Ralhrang uknak kan cohlang lo. Ralhrang nih a tuahmi thimnak zong kan cohlang lo. A dikmi Federal Democracy a chuah hlan lo dohthlennak kan tuah lai. Mizapi hna zong nan si khawhnak cio in hi dohthlennak ah i tel cio ding in kan in sawm hna. Tutan raltuknak cu kan miphun le ram ca ah a hnu bik raltuknak a si.

Hnulei kir awk zong a ṭha ti lo. Kan sungh ahcun zeitikhmanh ah ralhrang ralkap uknak le miphun dang uknak tang in kan chuak kho ti lai lo. Kan ram le miphun luatnak cu kan dihlak ṭuanvo a si tiah Chinland Defense Force – Hakha Council nih 2023 February 1 ah cathanh an chuah.