Hi thawi i a min cu “Phawhthumvak Thawi” a si ti zong in a thar in theihternak tuah than kan in duh ko hna

PALH MI REMHNAK -Upat mi hawile hna, A I D I I nih 2020 December lio ah “Tungkul Thawi” ti in thuam pakhat post ah kan hun langhter. Cucu Tungkul thawi a si lo tiah nai te lawng ah a thar in kan cawn caah kum 2 chung a si lo mi min in theihternak kan in tuah mi hna cung ah kan ngaithiam hram u tiah kan in nawl ko hna.

Hi thawi i a min cu “Phawhthum vak Thawi” a si ti zong in a thar in theihternak tuah than kan in duh ko hna. Kan hnu ah khan Parborhsung thawi kha Tungkul thawi a ti mi an um pah caah hlathlai nak kan tuah than i kan theihnak a si. Tungkul thawi timi tu cu hi post ah kan langhter chih mi Hnitial kha a si. Ma E tungkul Thawi ti zong a si chih. Tungkul thawi hnitial hmanthlak a kan hmuhsak i post nak nawl zong a kan pe mi ka u Thin Hnem Htwe cung ah kan ilawm tuk fawn.

Kan palhmi a kan remh piak tu le Thawimin a kan chim tu cu thiam le la kong ah kum 60 leng a cawlcang mi, labuh le thiamthawi a phunphun kong ah kan i bochan mi Pi Hniang Ki (Chan Hei Nu) a si. A cung ah kan ilawm tuk.

Thiamthawi min ah hin peng le tlang cio in aa i dannak tete an um cio caah, Phawhthumvak thawi kha siseh, Tungkul thawi kha siseh min dang in a thei a hngal mi hna nan um cun rak kan chim ve hram u. Tutan kan chim mi kan palh rih a si le a hman mi thawi hmanthlak fiang mi le a min an chimtu thiamtak min he kan remh piak hram te u.

Lainu kutzung a ningcang te a si ding Lainu zapi kan rian a si ti mi thinlungput te he kan palhnak a um cun kan iremh thluahmah hna lai. Upatnak he, A I D I I