Halkha cu Halkha a si ko, Thantlang cu Thantlang a si ko.

Min i sak ciocio ah hin ahohmanh nih sullam ngei tein chuankhannak he min hi i sak cio a si. Halkha le Thantlang zong khi cu bantuk in cun an rak sakmi an si ve ko lai.

Kan lai holh ah a um i chimnak ah an hman tawn țheomi cu min an sakmi hna nih khin an min an phurh khawh lo ahcun an hrut tiah an ti tawn cu nan theih cio ko lai. A hrutmi paoh khin chim duhmi a si hrimhrim lo mu.

Thantlang khi Sui Thantlang tiah ahohmanh le mi zeihmanh nih min an rak sak balmi a si lo. Kum le caan a hung liam chin lengmang i a hnuah cun i uantlarnak lungput le i porhlawtnak thinlung he Sui Thantlang tiah mi pakhat khat nih min a rak sak i cuticun zei ruat huaha loin mi kip nih Sui Thantlang tiah an auh lulh cio.

Thawngțhachimtu pakhat nih a rak chim balmi cu Jesuh Khrih nih vailam a put lioah a tlukpi lengmangmi khi kan sualnak a rih tuk ruangah a neh tuk i a phurh khawh lo ruangah a tlukpinak a si tiah a rak chim bal. Amah ruahnak le a purhdah chommi zong a chimmi a si kho ko, a chimtu kan si ve lo i hngal ve ruam hlah. Chim duhmi cu țha tein min rak sak ko cangmi kha a hnuah sui e, daimond e tiah Sui Thantlang, Sui Halkha tiah sak țhan kha a herh lomi a si. A herhnak zong a um hrimhrim fawn lo. Mi pakhat khat nih uanthlarnak in siseh, porhlawtnak in siseh, namnehnak in siseh sui Halkha a hei ti zongah mi kip nih i cawn lulh cio le media kip nih Sui Halkha tiah țial lulh cio phung zong a si lo. Atu ah cun mi kip le media kip nih Sui Halkha tiah an țial lulhmi hmuh a si cang.

Minung min a si ah siseh, khua min a si ah siseh mah duh paoh in leet a ngah lomi an si. Cozah nih theihpinak he țha tein min thlennak tuah dih hnu i a ngah cang an ti hnu lawngah leet khawh a si. Thlanmual hmanh țhial duh ah mah nawl le duh paoh in țhial a ngah lo timi cu nan hngalh dihmi a si ko.

Halkha a si komi kha uanthlarnak le porhlawtnak lungput he Sui Halkha e Diamond Halkha e tiah nan ti thai a si ahcun Sui Thantlang a si lomi Thantlang a hluan te sual lai.

Siaherhnak he,Dinnak kha a cat lomi tiva bantukin luanter camcin ko u (Amos 5:24).Salai K. Biak Lian Thawng

Be the first to comment

Leave a Reply

Your email address will not be published.


*