Hakha ah Meithal he lam kan rak zawh

2021 April 29 Hakha ah har ngai le thinphang ngai in kan rak luh hnu nithum chung ramtang ah kan i din.

2021 May 2 suimilaam 2:00PM khi Hakha mizapi lamzawh rak i timh a si. Lam a zawh mi hna, “Tlaih le khih,” an ton sual a si cun kan thuat colh hna lai. Meithal in kan ven hna lai, lam kan zawh ve hna lai tiah kan rak i tim.

Cu ticun May 2 kan hun phan. Lamzawh ding hmun le hma ah mipi cu an kal thluahmah. Minung an thahnem ngai. Ralhrang pawl kan rak hlen hna i phu hnih in lamzawh tu kan rak i then. Cunglei he tanglei he tiin lam kan rak zawh.

Lamzawh kan van i thawk tlawmpal ah ralhrang cu an chuak taktak. Kan bawh hna nain kan sin ah an rak chuak lo. Ralhrang le Palek nih kan kal nakding tu kha an rak kan phih dih. Lamzawh cu tlik le leek pah le har ngai in kan rak i lim. Hini lam a zawh mi poh a baa lo te an rak um lo. Dillo sang a cho taktaknak le lam a chiat taktak in rak tlik a si.

May 2 i a biapi in kan i timh mi kan Mission cu suimilaam 5:00PM ah Innwa Bank kah ding a si. Lamzawh a vun dih bak in mission kan neih nakding hmun ahcun kan tli colh. Innwa Bank hi nidang ahcun ralhrang pakua hra te lawng an rak um.

Kah kan rak timh mi hi Dalan ruang ah an rak theih (Kanmah chung ah Dalan an rak um rua). Hmunhma kan laak cuahmah ah ralhraang cu Kouh-Kun lampial in Innwa bank lonh tiang khi hmunhma an rak laa dih cang (a tlawm bik 100 hrawng cu an si lai dah). Kan nih lei hi minung 7 lawng kan rak si.

Hmunhma kan laak cuahmah lio ahcun ralhrang nih kan hawipa an hmuh. Meithal in kah loin an kutdong in an kan sawh (Pathian a tha tuk). An kan hmuh le cangka in liklak kan i chawn hna i kap manh loin hnu kan pil than.

Rak kap hna u sihlaw kan nun buin an rak kan tlaih lai. Cu si lo hmanh ah kan rak thi dih lai. Tliknak lam pakhat te lawng a rak um. Pathian thawng in kan rak luat.

Kan zaam tlawmpal ah ruah a sur. Lampi in tar le upa nih an inn chung in thazaang an kan pek. Ngakchia tete zong nih kutzung thum thlir in an kan lawmhpi.

Aw e ka philh deeng… Atu ka dl hi CDM a tuah hnu a voi khatnak mah ni ah a nu theih loin lam a rak zawh ve. A lennak in a si i a kedan hi la-bar te a si.Ka peh than te la…Crd-Salai Tluangte

Be the first to comment

Leave a Reply

Your email address will not be published.


*