Governor of Western Australia, Chris Dawson APM nih kan umnak state i communities hruaitu pawl cu a kan sawm i Cozah Innpi ah a kan ton.

Governor of Western Australia, Chris Dawson APM nih kan umnak state i communities hruaitu pawl cu a kan sawm i Cozah Innpi ah a kan ton. Vuanci, MP, MLA, Councillors, le Cozah zung lutlai tampi an itel hna.

Program a dih hnu, lakphak din lio ah pakhat hnu pakhat in kuttlaih pah in bia ka hei ruah cio hna. Kan ram lei sining kong ABC TV Channel nih Documentary a tuahmi cu rak zoh cio hna kaw, an kan ngeihchiatpi taktak. Hi taitai asi lai hi kan ruat ballo an ka ti. “Kan in dirpi hna, nan lung dong hrimhrim hlah seh” tiin thazaang peknak an ka chimh len.

Kan Governor pa cu; TV i na zohmi hmunhma pawl kha nai ah ka va cul dih tiah ka chimh cu a lau khotuk. Nundam le himte in na rak kir kho i lawmh a um hringhran a ka ti.Crd-Ram Tinthei

Tuni cu Thantlang in kan zamnak thla 8 asi cang. Kan zamnak khua i khuami hna nih an kan dawt le an kan cehkenh dan lung a hmui hrinhran. Khrihfa bu zong nih an kan zohkhenh ngaingai. Ule nau chuakkhat bang an dumchuak le an kawm chuak zong an kan hrawmh. A harnak cu a tampi nain… kan khua kan ram asi lo cu mu. A chel caan ahcun chungkhar tlingte in khua kan sak hna kan ngai theu ve tawn ko. Kanpa nih a kan liamtaknak kan hnuzarh khan kum 6 tling kaw ka li hna a leng ngaingai. Ho sin tal ka lungum bia chimh awk le ka hngal fawn lo. Thantlang i chungkhar tlingte in khua kan sak hna kha mit thlam ah an hung cuang, ka ngai ruangmang tawn ve ko.

Ralzam in a van idor vemi Ceute nu nih mehhang hna kawl usih ca tiah ngahring dawi a vun ka sawm. Voidang bang ka thatho lem loh nain ka lilen hna kian deuh seh tiin kai thawh phot ve. Minung 5 kan si. Thlantlang khua kan sak hnu in, ngahring hi ka dawi kho tilo, ngahring vun dawi than cu ka thiam huaha tilo. Hlan kan cutzat ka te kan khua i, leng le vaal hna ngahring dawi caan hna kha ka ka vun ithei than le.. ka li a leng ngaite.

Tuni cu nga kan tlaihmi a tam ngai le, Lian Lian hna nih ngaikuang ka tlaihmi te hi imeh ve sehlaw ti hna ka lung ah hung chuak. LianLian hi ka sin a um lonak ka vun tuak le, thla 9 lei a vun si cang. Ka fapa hniang ngaikuang a duh ningte kha ka vun thei le, ka ngaih a hun zual. Kan hnu Christmas kha a donghnak kan iton asi kha mu ka ti, a ka ngai theu ve la dah mu. Phone line um hlah kaw phone hmanh kan ichawn khawh lonak a sau rawh.

Zanlei ni vun nem deuh kaw huamsamte in innlei kan vun panh. Khua hauka in mawtaw saikel in Tlangval pahnih an vun rat khi maw chilchialte in ka hei hmuh hna. An vun kan naih deuhdeuh le, pah an kan timh hlah maw ti khin lamkam ah hrial ka van timh hna. Ka van kianh hna ka ti cu, ka kamte ah an van dir le.. kanu na ba tuk maw? Na thil kan in chang la an ka ti. Cu fa hna fim cu dah… ziah ticun an vun ka dawt hnga tiin khuaruah har ngai in ka vun zoh hna. Kum Upa deuh pa nih… kanu zeiti khom si ah.. na lung thawng ko seh mu.. Lian Lian kha tuni ah ralram ah ral kut in a liam i, zeitin hlemh awk zong kan in theilo kanu…. zeitin chimh le hlemh awk zong kan in theilo … an vun ka ti. An pahnih in ka thil cu an vun ka lak piak.

Zeitin leh awk ka thei hnalo. An pahnih cun ka zoh hna, an mithmai ah ngeihchiatnak he an hmai a panhlo taktak. Ka dir buin tluk kai zal.. khua ka ruat… ka nun ah chunmui a tlung. Ka kam kai seh zanlei nikhua a ceu rih nain zeihmanh khua ka hmu kho tilo. Ka mit a mui, ka vaan a sang, ka thu le vawlei ah kai bual… faak piin ka au. Maw… Lian Lian kafa dawt.. .. na biakam bang na nunnak cu na pek taktak cang ko maw. Ka fapa dawt… na hliamhma hmanh domh piak manhlo in maw na ka liam tak ai ne… a faak tuk e ka fa. Na pa zuunthing hmanh ka tuar rih ai hi, nang nih na ka kaltak tuan e.. tiin nguinngui thlak in lamka pi ahcun ka tap le kai bual.
Ka hawile cu lamkapi ahcun an dir ko… an ka zoh ko. An vun ka kuh le… zeitin tluanh awk an ka hngal lo, an ka tahpi.

  1. Kafa…. zeitin hme nanu lawng ka rak tuar lai e. Na zuun in zeitik caan tiang khi dah ka hram lai ka fa…. teinak kan hmuh in Thantlang ah kan kir te lai na ti lo maw? Na lungum bia zaza na ka ruahmi vialte kha kafa … keimah lawng in maw ka kir te ne lai kafa…Thluai Cin nu diary 17/04/2022

Be the first to comment

Leave a Reply

Your email address will not be published.


*