Fale Ṭhihphaihnak Hi Hrial A Herh:

Atu hin na tlaihchan tukmi le na bochan tukmi nih Tuah kan fialmi na tuah lo cun kan kom ti lai lo.Ka nawl na ngaih lo cun kan kal tak lai. in ti sehlaw a cung ah naa lawm hnga maw na ngaih dah chia hnga? A ka dawt tuk caah a si tiah maw na ruah hnga asilole a duhmi ka tuah caan lawng i komh le dawt cu a ka dawt taktak lo ruang ah a si tiah dah na ruah hnga?

Caan tampi ahcun kan fale hna nih kan chimmi an ngaih lo tikah Kan daw ti lai lo.Kan kal tak lai.Kan kom ti lai lo.Eiding kan cawkpiak ti lai lo. tibantukin kan ṭhihphaih lengmang hna. Cu kan ṭhihphaih hna nak cu an ṭih tikah chikkhat cu chimh a ngaimi an lo i, kha ṭhihphaihnak kha a ṭha ngaimi chimhhrinnak ah kan ruah ṭheo. A taktak ahcun a linglet tu a si. Cucu pahnih tein ka hun langhter lai;

Pakhatnak ah nulepa dawtnak an fiang kho lo ti a si. Aruang cu dawtnak hi man loin tein nulepa nih pekmi siloin a hlawh in hlawh (earn) haumi ah an ruah. Phundang in kan chim sicun ṭuan man hmuhmi ah an ruah. Ṭuan man hmuhmi cu zeitik hmanh ah dawtnak a si bal lo. Cutikah an hun upa deuh i an lungthin ah a ummi cu ka nulepa nih an ka daw lo.

An lung ka ton hna le an duhmi ka tuah lawng ah mithmai ṭha le hmurka ṭha an ka pek ti kha a si. Fale nih nulepa dawtnak an teh khawh lo tikah nulepa tlaihchannak an ngei kho tawn lo. Cutin innchungkhar ah i tlaihchannak a um lo tikah i hlatnak a chuak tawn.

Pahnihnak ah ṭhihphaihnak in chimhhrinmi hna hi nulepa hmaika lawngah a felmi an lo i nulepa umlonak ah anmah bon an si ṭheo ti a si. Aruang cu ṭih dingmi a um ti lo. A taktak ahcun kan fale hna nih thil ṭhalo an hrialmi hi nulepa nih dawt lomi si an ṭih ruang ah siloin a ṭhat lonak an i fian ruang tu ah a si awk a si.

Tahchunnak ah mi velh ka hman cun ka nulepa nih an ka daw lai lo timi nakin mi velh ka hman cun hawikom ṭha ka ngei kho lai lo tibantuk. Cucaah ṭhihphaihnak in siloin thil sining, an tuahmi nih zeidah a chuahpi khawh i hmailei ah zeidah an ton khawh timi tu hi tampi kan cawnpiak hna a herh. An tuahmi thil a ṭhatnak le ṭhat lonak an i fian sicun cu nih cun khoika hmun le zeitik caan paoh ah an nun lam a hruai hna lai.Crd-Roro Fambawl