Falam Khuachung Ah CNA Le SAC An I Kap

Chinram, Falam khua BEHS-No 1 pawng ah nihin January 18 zaanlei slm 3:30 hrawng ah CNA le SAC kar kahdohnak a chuak i SAC kuttang palik 2 cu hmakhat teah an ril colh tiah theih asi.

Kahdohnak a dih in mino 30 hrawng SAC ralkap nih an tlaih hna, Kahdohnak ah SAC lei 1 a thi i 4 hliam an tuar tiah theih a si, Cheukhat nih cun 2 an thi tiah an chim ve.The Chin Post

Papui nih aka thangchiatnak cabia ka vun let ta ve.Kum 22 tlangval note ka rak si lio 2013 ah a si, Hakha Post nih Yangon ah thawngpang latu reporter kan herh an ti i ka rak tuan piak hna. Thancho ka duh tuk, Hakha Post paper kehlei kam te ah an tar zungzalmi riantuantu min cazin ah khin ka min hmuh ve ka rak duh tuk lio a rak si.

England sianginn ka sawk pah buin Yangon i Laimi thawngpang zeimawzat cu ka hlat piak ve hna. Umkalnak bus+taxi man le news kuat tik internet dawr thutnak phaisa zong a rak dih ngai. Laimi bawlung puai tbk tampi cu bus a kal lonak ah an tuah caah taxi in kal a rak hau tawn.

Ka caan sunglawi le ka phaisa tampi dih in ka kal hnawh i ka lakmi news 70% cu Hakha Post tadinca ah an telh bal lo(telh awk a tlak deuhmi news dang a tam deuh caah a si ko lai), rethei tak in ka lakmi news an ka hnon piak caan ah cun ka lungfah ka celh tawn lo. Riantuantu min cazin tarmi zong ah ka min an rak telh bal lo. Ka pekmi news an tial caan lawng ah news a donghnak ah khin (Salai Lungthli Tum pekmi) tiah an tial chih tawn. Riantuantu pakhat ah an rak ka cohlang bal lo tiah ka rak ruah, ka lung a rak tha lo ngai.

Ka uarmi journalist rian dara ka tuan ka ti nain Hakha Post newspaper khi Hakha Mann gate in an ka kuat i Yangon ah an ka zuar ter, Hlaing Thiri le North Dagon 46 um Laimi inn kip ah ka rak zuar tawn. Khualeng ummi Yuzana Garden um Laimi sin tiang ka rak zuar. Zarhpini fatin te LBC or YLBC hmai ah ka zuar hna. Pastor Ukte nih ‘biakinn ah cazual zuar hlah’ tiin aka sik caan zong a tam ngai.

Thancho ka duh hringhran lio a si caah an ka kuatmi dihlak zuar dih khawh kai zuam. Ka manh dih lo hmanh ah 50,000 man an ka kuat ah cun Hakha Post sin ap than a haumi 50% a simi kyat 25,000 cu ka rak kuat zungzal hna. Voikhat kei ka dam lo he ai tong i ka hawile ka zuarter hna i pakhat hmanh an zuar ngam lo, nain kyat 25,000 cu keimah phaisa ka rak kuat thiamthiam hna. I porhhlawt a lo men lai nain 2013 ah cun ka ule 5 cu USA ah an umnak kum 5 a si cang, Hakha um ka nulepa zong a sifakmi cu an si lem lo. Kei zong Bible sianginn pakhat ah BTh he MDiv siangngakchia English ka rak chimh chih hna. Newspaper ka rak zuar kha phaisa ka herh tuk ruang ah si loin journalist si ka duh tuk ruang le zuar a herh an rak ka ti caah asi. Thlahnih thum ka tuan i journalist tiah aho hmanh nih an rak ka thei lo, Hakha Post paper a zuarmi pate tiin an rak ka theih, Yangon lampawng i newspaper zuartu bantuk khin an rak ka hmuh, tampi nih an ka zangfak. Nain, Papui nih cun ‘keimah thawng in mizapi theihmi a vung i chuah’ tiah a tial.

‘Hlawh kan pek’ ati fawn. Hakha Post ka zuarman 50% kai lakmi khi a chim hnawhmi cu a si. An cazual cu tuai khat 500 in zuar asi i tuai zakhat (50,000 man) zarhkhat ah voikhat an ka kuat. Manh lomi he cun zarhkhat kyat 15,000 (60,000 per month) lawng khi ka ngah khawhmi zat taktak cu asi. Cucu news lak ding ka kalnak le ka tialnak internet dawr thutman ah a rak dih tawn. Kei England ka kal i Papui a naupa Kawipui nih a zuar than, pakhat hmanh a zuar khawh lo caah an ngol beh. A ngaingai ti ah cun kei kha ka ngahmi nakin ka dihmi tu a rak tam deuh.

#Yangon ah khin Hakha Post paper na zuar lai i na zuarman 100% nai lak lai tiah tulio Lai mino vialte khi fial hna sehlaw a duhmi an um lai ka zum lo.

Thla 6 Yangon ka um hnu 2014 ah Pathian thawng in MBA kai ding in England ka phan. Keimah tein media lei riantuan ding lam tampi ka kawl, website in news tial hram kai thawk. Hakha, Thantlang le Kalay ah hlawh pekmi news latu tampi ka ngei hna. Rang bik in news lak khawh kan i zuam, zaan hnih chung ih loin news tial ka peh caan hna a tampi. Hakha ah daily newspaper tiang kum khat deng kan rak chuah khawh ve. Hakha Post khi website an rak ngei lo, online an tar lo cu a pam ka ti i phaisa in ka cawk hna, aman zong tha tein kan ceih hmasa. A ngaingai ti ahcun credit pek in free in midang nih an i lak tawn ko, kei ka duh lo i ka cawk hna kha a si. Nain, kei nih anmah an tlangtar hman ka duh lo, mipi lunglak deuh ding tlangtar ka thlen tawn caah a hnu ah cun cawk an duh ti lo. Cu hnu cun anmah news pakhat hmanh kan rak hmang ti lo, kanmah lak khawh zat le ramchung ram leng news deuh ka rak tial ko.

England ka phak hnu in Hakha Post riantuantu si rih ding a sawk than tiah Papui nih a tialmi zong khi a dik bak lo, sullam a um bak lomi a si. Papui he hin Yangon ka um lio lawng ah voi 2 lawng kan i chawn. Fb ah a kan block dih a timi zong a dik bak lo, Papui cu Laitlang lei boruak a tial tawnmi a si i friends si ding khi ka rak duh ngaimi asi, ka add i aka confirm lo caah ka cancel than. Cun, kei hi biachiakha tuk comment tial a hmangmi lawng ka block tawn hna. Anih cu Pathian rian tuan bal a si fawn caah biachiakha a chim ka hmu bal lo, ka block nak ding a ruang hrim khi a um lo. ‘Kei aka block i ka hawile zong a block ve hna’ a timi hi cu 100% lih a si.

Saya Papui hi tanghra ka awn kum 2008 Khuabung civui ah cawnpiaktu a rak si i kai tel ve. A biachim le a cawlcangh ning ka upat ngai vemi a si. Aka thangchiat nak cabia zong ka rel tikah a bia a nem, upa lungfim deuh asinak tampi a lang— lihbia cu ai tel pah ko, nain a naupa Salai CBT bantuk in ‘f**k you’ tbk le thah ding tbk biachiahru ai tel lo. Hmai lei ram a that tikah coffee dinti awk a tlakmi minung ah ka hmuh zungzal mi a si ve.Salai Lungthli Tum

Be the first to comment

Leave a Reply

Your email address will not be published.


*