Elon Musk cu vawleicung ah mirum bik a si.

Elon Musk Cu Mi Zeidah Si?Vawleicung mirum bik, Elon Musk nih  social media platform ah minthang bik a simi, Twitter cahmai a cawk mi nih tulio thawngpang vialte a khuh dih. Elon Musk cu mi zeidah si? zeiruangah a minthan? Zeiruangah a rum? Zeibantuk ruahnak a ngeihmi le a pommi dah a si? timi hi aho paoh nih theih duhmi le hngalh duh ciomi a si.

Elon Musk cu vawleicung ah mirum bik a si. US$ 267.1 billion a ngeimi a si. Finland le Chile ram he an ngeihmi a tluk luklak. Pakistan, Ethiopia, Puerto Rico le Ecuador ram nak in Elon Musk a rum deuh ti si. Amazon ngeitu Jeff Bezoz nak in a rum deuh caah Time Magazine nih Person of The Year 2021” timi minthannak an pekmi a si.

Elon Musk cu South Africa ah a chuakmi a si nain atu ahcun billionaire entrepreneur ah a chuah cang. Electric motor sertu Telsa company ngeitu, van le vawilei khuatlawnnak le kherhhlainak SpaceX company ngeitu, phaisa kuatnak le ipek chanhnak Paypal company a rak sertu zong a si. OpenAI, Neuralink, the Boring Company le Starlink Company a dirhtu le a ngeitu zong a si fawn.

Mars planet ah khual tlawnnak, minung umnak ser ding le a herh ahcun a peem zong peem ding in chunmang a manhmi a si. Computer in minung kan thluak theih khawhnak tiang a zum cuahmah liomi a si.

Elon Musk cu June 28, 1971 ah South Africa ah a chuak. Kum 50 lawng a si rih. Pretoria khua ah a tanglian mi a si. Anu, Maye Musk cu Canada ah a chuakmi, South Africa model minthang pakhat a si. 1969 ah Miss South Africa zuamnak ah finalist tiang a phanmi muidawh a si. Apa Errol Musk cu engineer pakhat a si. A nule a pa cu 1980 kum ah an I then. Elon Musk cu ngaknu pakhat le nupi pahnih a ngei.

Elon Musk cu Canada rammi catialthiam, Justine Wilson he kum 2000-2008 tiang an um. England mitami, Talulah Riley he 2010 -2016 tiang an I um. Justine Wilson he fa 6 an ngei I, a ngaknu hlasakthiam Grimes he fa 2 a ngei.

Elon Musk cu Kum 1995 ah the University of Pennsylvania in bachelors degrees pahnih a ngah.  A ngahmi cu Physics and business in a si. Stanford University ah physics in PhD a tuah nain a ngol than.

Elon Musk nih 1995 kum ah US$ 15000 in Venture Zip2 software company a dirh I, sipuazi tuah hram a rak I thawk. A hnu ah investor pawl le a pa nih US$200,000 an chuah piak chap. Zip2 company cu 1999 kum ah 300 million in an zuar khawh caah mirum pakhat ah a hun I chuah.

Elon Musk hi zeibantuk party hmanh ah a lutmi a si lo. 2018 ah Twitter a tialmi cu, Conservative ka si lo. Independent in registered a tuahmi ka si, politics ahcun moderate ka si. Asinain a zeizong tein moderate ka si fawn lo, humanitarian issues  hi ka caah a biapi tukmi a si nain midang nih  zeiruangah a biapiter lo timi hi ka hngal kho lo” tiah Twitter ah a tial bal. Russia nih Ukraine internet vialte an hrawh piak hna caah a company starlink nih Ukraine rammi vialte cu intenet free in a pek hna.

Amah hi Democrats pawl an thawnnak Californai ah hram a bunh hmasa mi a si nain atu ahcun Republican an thawnnak Texas ah a thial cang. Amah hi zalonnak a uar ngaingai mi a si caah Free Speech hi democracy caah a hrihhrampi a si” tiah a chim lengmang. Twitter cahmai ah zalong tein biachimnak a um lomi zong hi hlan tein a rak doh ngai cangmi a si. Twitter nih Republican le conservative a dirpitu hna an phihkhar, censor an tuahmi hna hi a dik lomi a si a ti. Democracy ram ahcun zalong tein chim phuannak nawl a um ding hrimhrim a si tiah a chim lengmang caah democrats le liberal pawl nih an huat ngaingai.

Elon Musk nih Twitter cu 44 billion in a cawk cang.  A cawkmi hi 9.1% lawng a si. Asinain amah hi share tam bik a cawtu a si caah nawlngeihnak sangbik a ngeitu ding a si cang. Cucaah Twitter nih ningcang loin an phihkhar mi hna zong a rauh hlan ah Twitter nih luhnak nawl an pek hna lai tiah zumh a si. Cucaah President hlun Donald Trump, Republican le Conservative pawl caah cun thawngtha taktak a si bantuk in Liberal democrats pawl caah cun thawngpang chia taktak a si fawn.Credit-Salai Lairamthang

Be the first to comment

Leave a Reply

Your email address will not be published.


*