Dr.Sa Sa hringtu a nu Pi Ma Zai nih a kan liam tak

Dr.Sa Sa hringtu a nu Pi Ma Zai nih nihin October ni 13 ah ral a zamnak hmun in a liam tak hna tiah thawng a thang.

Dr.Sa Sa le a chungkhar Bawipa nih hnem ko hna seh..R I P Crd-John Fambawl

Senthang Council Nih Phaipha Khuathar Sayate 5 Tlaihkhihnak Kong Ah Fianternak An Tuah Cang

Chin ramkulh, Hakha peng Phaipha khuathar ah sianginn cachimtu saya 5 cu CDF-Hakha Battalion 2(Senthang Council)nih October 10 le 11 ah an tlaih hna, tiah CDF-Senthang nih October 11 ah cathanh an rak chuah.

Cu sianginn cachim sayate 5 tlaihnak kong ah Senthang Council nih fianternak cathanh an chuah, cucu a tanglei bantukin a si;

Senthang Council (SC) cu Senthang mipi nih dirh mi a si bantukin Senthang ramchung ahcun Senthang Council lawng hi Senthang peng ah dotla mi le mipi dirkamh tu bu a si. Cucaah Phaipha (B) ah a cang mi sianginn buaibai nak kong he pehtlaiin Senthang Council zung nih tawlrel piak dingin ca an rak tial.

Ca an rak tial bantukin Phaipha (B) ah a um mi sianginn cu Phaipha (B) Khua Council le Senthang Council nih 2022-2023 kum ah a tu lio caan karlak cozoh kan ngeih mi NUG, CNA/F le CJDC he pehtlaihnak a ngei mi Senthang Council tang um Education Department nih hman dingin theihternak ca 9 October, 2022 ni ah tar a si.

1.Khua Council nih Sianginn ah ca tar mi cu voi khat an rak hrawh. Cun Senthang council nih a voi (2) nak catar than a si i mah zong cu hrawh piak than a si. Ca tar hrawh nak kong he pehtlaiin 10 October, 2022 ah Sang Hlei Hmung le Thang Lian Mang cu khuami sin in report a um caah Senthang Council zungah auh an si i upat nak he nawl ngai tein an ra.

2. 11 October, 2022 ah tonbiaruahnak ngeih a si tik ah Catar mi hrawhnak kong he pehtlaiin sualnak zeihmanh an tuah lo caah khua ah kir ter than an si.

3. Senthang Council le Khua Council ca tar mi hrawh tu hna cu Val Mang Hei Lian, Pu David le Pu Bawi Nawl hna hi an si tiah thawngfiang theih than a si.

Cucaah Senthang Council phungphai ningin tuanvo ngeitu hna nih 11 October, 2022 ni ah tonbiaruahnak ngeih dingin a nem nak tein voi thum tiang auh an si i an rat duh lo caah a herh ning in Senthang Council nih tuanvo lak an si.

Cozah pakhat dirhmun in a dir mi nih phung ning in ca tarmi an hrawh ahcun Penal Code pohmah 173 ning in thong thlakhat tiang asiloah tangka 50000 MMK, a siloah thong thlakhat tiang le tangka 50000MMK pahnih ning in dantat khawh asi.

Penal code pohmah 173 ning in tlaihmi minung pathum hna i an nu le pa hna cu 12 October 2022 1:00 – 3:00 PM ah Senthang Council zung rak phan dih ding  in auh an si i ṭha tein ton biaruah le biaceihnak ngeih hnu ah tlaihmi minung pathum hna zong nih kan palh kan sual ko an ti caah amahkhaannak in zanlei 6:00 PM ah thlah ṭhan an si. Senthang Council nih phung a buar lomi mipi tlaihkhihnak zeihmanh a tuah lo.

Senthang Council rianṭuannak he pehtlaiin bia hmanlo chimrel lo ding le Media ah a dik lomi thawng phozar lo dingin thawng kan in than hna. Council hi mipi nih dirh mi a si bantuk in mipi ca rian a ṭuanmi le dirkamh tu bu a si caah Senthang Council rianṭuannak a hnuarsuan tu le Senthang Council phungphai kalh in rian a ṭuantu bu siseh pumpak in siseh hmai lei caan zong ah   a herh ning in tuanvo lak an si zungzal lai.

Be the first to comment

Leave a Reply

Your email address will not be published.


*