Dr. Hmuh Thang a inn zong bomb an puah rih. Laimi kan pa bik a thinphan lai ning le a lungfah lai ning.

Laimi nih mi sawhsawh kan thah lio Pathian bawmh kan hal, a kan bawm duh hnga maw?Hniarlawn i Pu Phir Maung thah an timh i a inn ah bomb nganpi an puah ah khan sualnak ngeilo a nupi le a fale an thi ve lai timi bomb chiahtu le a fialtu upa vialte nih an tuaktan khawh cia ve ko. Hriamnam ngeilo Phir Maung amah lawng in va tlaih cu a harmi a si bak lo. Nain, zeitheilo a fale he an i hngilh lingcing ah bomb cu an puah hnawh hna i an inn a ciam dih nain minung an thi hraw lo, a nung Pathian a that khawh ning, an dihlak in a hupheng hna.

Dr. Hmuh Thang a inn zong bomb an puah rih. Laimi kan pa bik a thinphan lai ning le a lungfah lai ning. Laimi a kan dawt i a nun caan sunglawi vialte pek in ngandamnak lei a kan zohkhenh, a kan cawm, a kan thlop, atu cu a tar ve cang, a dawtnak sang bik kha โ€˜bombโ€™ in kan cham.

Cun, Mara pa zong a taksa tlek dih tiang an velh i a thi beh. Matupi fimcawn nak zung lutlai an thah. Hakha No.1 sianginn ah zeitheilo ngakchia thah ding bomb chiah kan timh fawn, Pathian nih sualnak ngeilo ngakchia an thih ding a siang hna lo i bomb kan chiah manh hlan ah a puak i bomb chiah a timhtu minung 2 an thi. Chim ding dang a tam tuk. Kawl lei zong ah hriamnam ngeilo khuabawi le USDP member thong tampi an thah cang hna, hngawng an tan ning tbk video zoh ah ISIS Muslim tuahser nak he an i dannak ka hmu bak lo.

Pu Phir Maung family le Dr Hmuh Thang family thah ding ah inn bomb an puah hnawh hna i Mara pa tihnung tuk in an thah hnu khan cun kei ka zumhmi Pathian cu kan lei ah a ttang bak lai lo ka theih cang. Khuachia pathian hmanh kan lei a tang duh lai ka zum ti lo.

Tuni tiang kan mino an nunnak a liam ning zong thuk deuh in ka zoh tikah kan ral kut in an nunnak a liammi nakin kanmah hriamnam lila in kan thih a tam deuh. Mah zong hi tuaktan caan a cu cang. โ€˜Pathian hna kan tla maw?โ€™ tiin.

Kan pastor hna zong nih David le Israel mi he kan i tahchunh tawnmi zong hi thlen cang hna u sih. Sullam a um bak lo. Annih cu mi sawhsawh thah an timh bal lo, mi sawhsawh thah ding zong thazang an pek bal lo, an aupi bal fawn lo. Kannih cu kanmah kan ruahnak ai hrawm ve lomi poah thah ding kan aupi, kan i dang tuk. Israel miphun cu Pathian duhning in a nungmi an si. An chung ah Pathian an nunter caah Pathian nih an ral a doh piak hna. Nain, an sual caan cun ral an sung ve, Joshua zong Ai battle a rak sung bal.

Dr Hre Mang a chim bang, Pathian hi Laimi nih kanmah duhmi tuah ding maw kan fial peng lai? Amah duhmi dah kan tuah hmasa lai? Pathian sin ah sual i ngaihchih in ngaihthiam kan hal hlan lo cu zeitik hmanh ah kan lei Pathian a ttang lai lo.

A sual tuk hringhranmi MAH kha kanmah nih sualnak in kan doh ve chung poah cu teinak lam a um bak lo. Muihnak cu ceunak in doh lawng ah tei khawh a si. Atu hi cu kap hnih in lainawng veve kan si ko caah a nungmi Pathian zong khawika lei hmanh a ttang duh lai lo.Crd.Salai Lungthli Tum

Be the first to comment

Leave a Reply

Your email address will not be published.


*